O goberno de Flandres anunciou unha reforma da formación do profesorado que incluirá unha proba obrigatoria de neerlandés para quen queira ser docente. A medida aplicarase a partir do curso 2027-2028 e pretende garantir que os futuros docentes teñan unha boa competencia lingüística antes de comezar as prácticas nas escolas.

Fonte: Belga News Agency

As autoridades francesas decidiron autorizar o uso do nome bretón Fañch, despois de anos de polémica xudicial, pero continúan prohibindo no rexistro civil outros nomes procedentes de linguas minoritarias, como os cataláns Lluís e Núria. O caso reabre o debate sobre o recoñecemento das linguas rexionais e da súa onomástica dentro do Estado francés.

Fonte: Diari de la Llengua

A embaixada de Portugal en Dublín organizou unha iniciativa dirixida a estudantes para dar a coñecer a lingua e a cultura portuguesas. A actividade forma parte dos esforzos por promover o portugués no sistema educativo irlandés e por espertar o interese das novas xeracións pola aprendizaxe da lingua e pola cultura lusófona.

Fonte: Bom dia

A Oficina Quebequesa da Lingua Francesa enviará inspectores encubertos a uns 7.800 negocios de Montreal para comprobar se os clientes poden ser atendidos en francés. Trátase da primeira vez en tres anos que se realiza esta operación, co obxectivo de garantir que os establecementos cumpren as normas que protexen o uso do francés como lingua principal de servizo na provincia.

Fonte: CBC

O escritor portugués António Lobo Antunes faleceu aos 83 anos en Lisboa. Considerado un dos autores máis importantes da literatura en lingua portuguesa, publicou máis de trinta novelas e recibiu importantes recoñecementos como o Premio Camões. A súa obra converteuno nun dos escritores máis influentes da literatura contemporánea portuguesa.

Fonte: Alentejo Ilustrado

O Parlamento de Nova Zelandia aprobou un proxecto de lei para recoñecer formalmente o inglés como lingua oficial do país, xunto co maorí e a lingua de signos de Nova Zelandia. Aínda que o inglés é a lingua máis usada polas persoas e polo goberno, os detractores e a oposición sinalan que a lei é innecesaria porque non cambia nada na práctica e pode restar atención á protección da lingua vernácula. 

Fonte: The Guardian

O Goberno de Gales e a comisaria da Lingua Galesa, Efa Gruffudd Jones, propoñen unha reforma ampla na educación para impulsar o uso do galés. As cifras mostran que o número de falantes diminúe e hai falta de escolas e docentes en galés, polo que reclaman medidas innovadoras e estruturais para garantir o seu uso en todos os ámbitos e poder atinxir o millón de falantes para o ano 2050.

Fonte: Diari de la Llengua

O Consello de Europa publicou dous informes sobre Hungría, centrados nas 13 minorías nacionais recoñecidas e no uso das linguas minoritaria. O organismo valora o marco legal e o apoio financeiro existente, pero advirte de carencias na aplicación práctica dos dereitos lingüísticos. Tamén sinala problemas como a segregación escolar da poboación romaní e a necesidade de reforzar a loita contra os delitos de odio. Entre as recomendacións, pide promover a tolerancia, mellorar a inclusión social e fomentar o uso público das linguas minoritarias.

Fonte: Council of Europe

Un estudo publicado na Universidade York de Toronto explica que a educación bilingüe pode ter efectos positivos no cerebro infantil. Evidencias actuais demostran que a exposición regular a dous idiomas desde a infancia mellora habilidades como a atención, a memoria, a flexibilidade cognitiva e a capacidade de resolver problemas.

Fonte: Observatório do Terceiro Setor

Un informe elaborado polo medio de comunicación en liña Phayul revela que as autoridades da China están a endurecer as restricións sobre a expresión dixital tibetana na plataforma de redes sociais Kuaishou, censurando publicacións que inclúan escritura ou fala en tibetano, traxes tradicionais e ensinanzas relixiosas. As persoas usuarias enfróntanse a advertencias, suspensións temporais ou eliminación permanente das súas contas se comparten este tipo de contidos.

Fonte: ANI