Puebla conserva sete linguas orixinarias, faladas por máis de 615.000 persoas, aínda que a perda de transmisión familiar ameaza especialmente o otomí, o tepehua e o ngiva. A discriminación, a migración urbana e unha educación bilingüe insuficiente aceleran este retroceso, malia que o náhuatl mantén unha ampla presenza. As comunidades reclaman ensino adaptado, intérpretes nos servizos públicos e recursos dixitais que garantan os dereitos lingüísticos e permitan ás novas xeracións manter vivo este patrimonio.

Fonte: Municipios Puebla

Alxeria reforzará a presenza do inglés no sistema educativo, que pasará a ser a única lingua estranxeira impartida desde o terceiro curso de primaria. O francés incorporarase un ano despois, mentres o Goberno prevé ampliar tamén o ensino do inglés na etapa secundaria. Esta reforma afonda nun proceso iniciado en 2022 para reducir progresivamente o peso do francés na educación, na universidade, na Administración e nas empresas públicas.

Fonte: AA

A Secretaría de Políticas Lingüísticas de Paraguai presentou na Universidade Nacional de Itapúa o proxecto para crear o primeiro Corpus Antigo do Español no país. A iniciativa, desenvolvida xunto coa lexicógrafa Estela Peralta e o filólogo José Luis Ramírez Luengo, permitirá reunir e estudar testemuños históricos desta variedade lingüística.

Fonte: Secretaría de Políticas Lingüísticas

Un estudo publicado en Science sitúa o momento de maior diversidade lingüística hai entre 1000 e 3000 anos, cando poderían existir entre 20.000 e 75.000 idiomas. O retroceso comezou coa expansión dos grandes estados e imperios, que estenderon as súas linguas ao tempo que desprazaban comunidades máis pequenas, e intensificouse posteriormente co colonialismo. A investigación conclúe que a supervivencia dos idiomas dependeu sobre todo do poder político e demográfico dos seus falantes, polo que a súa desaparición supuxo tamén unha perda irreparable de coñecemento cultural.

Fonte: Diari de la Llengua

O ministro de Xustiza de Malawi afirmou que os deputados e deputadas do país africano non poderán intervir nas linguas nacionais no parlamento mentres non se modifique a Constitución. A resposta chega tras unha proposta para permitir o uso de linguas vernáculas nos debates parlamentarios, xa que a lexislación vixente esixe o dominio do inglés para exercer como parlamentario.

Fonte: Constitutionnet

Unha atracción de Disneyland París inclúe por primeira vez sinalización en lingua irlandesa, coas palabras "Fáilte" (benvida) e "Slán go fóill" (até logo). A iniciativa foi posible grazas á campaña impulsada durante dous anos por un creador de contidos irlandés e supón un novo recoñecemento internacional para a lingua irlandesa.

Fonte: RTÉ

Diversas investigacións no Canadá conclúen que recibir atención sanitaria na lingua propia mellora a precisión dos diagnósticos, a calidade asistencial e mesmo pode reducir a mortalidade. Os estudos subliñan que garantir os dereitos lingüísticos na sanidade non é só unha cuestión de respecto e igualdade, senón tamén un factor clave para a seguridade e o benestar das persoas pacientes.

Fonte: Diari de la Llengua

Un proxecto impulsado nos Estados Unidos permite que nenos e nenas programen pequenos robots capaces de falar linguas indíxenas en perigo de desaparición, como o anishinaabemowin. A iniciativa combina robótica e intelixencia artificial para fomentar a aprendizaxe lingüística entre a mocidade e contribuír á preservación do patrimonio cultural das comunidades nativas.

Fonte: NPR

Varios centros educativos de Blaenau Gwent recibiron recoñecementos polo seu compromiso coa promoción da lingua galesa a través dos programas Siarter Iaith e Cymraeg Campus. As iniciativas fomentan o uso cotián do galés dentro e fóra das aulas e contribúen ao obxectivo do Goberno galés de alcanzar un millón de falantes en 2050.

Fonte: Nation Cymru

Unha investigación internacional na que participou a Universidade de Yale estima que a humanidade alcanzou o seu máximo de diversidade lingüística hai entre 1.000 e 3.000 anos, cando podían existir decenas de miles de linguas. O estudo sostén que o posterior ascenso dos grandes estados e imperios acelerou a desaparición de numerosas comunidades lingüísticas, moito antes da expansión colonial europea.

Fonte: Yale News