As autoridades iranianas ordenaron o peche dun centro de lingua francesa vinculado á embaixada de Francia en Teherán. A xustiza iraniana acusa o centro de realizar actividades ilegais e de aproveitar a súa actividade educativa para establecer redes entre membros das elites do país e facilitar a súa saída de Irán. Francia rexeitou estas acusacións e anunciou que responderá á decisión.

Fonte: Asharq Al-Awsat

O Goberno de Montenegro prevé impulsar a elaboración dunha lei sobre o uso da lingua de signos, que aínda non conta con recoñecemento legal específico no país. A comunidade xorda reclama participar directamente no proceso e pide garantir intérpretes, acceso á educación e aos servizos públicos, así como formación e emprego en lingua de signos.

Fonte: Vijesti

Varios países europeos empregan diferentes medidas para facilitar a integración escolar do alumnado estranxeiro que aínda non domina a lingua local, como aulas de transición, reforzo lingüístico e probas desde a educación infantil. O obxectivo destes sistemas é facilitar a incorporación progresiva do alumnado ás aulas ordinarias.

Fonte: Italianismo

Miranda do Douro celebrou o Día da Lingua Mirandesa coa presentación do primeiro manual escolar destinado ao primeiro ano de educación básica e da tradución completa da Constitución portuguesa ao mirandés. As iniciativas conmemoran o recoñecemento legal desta lingua como segunda lingua oficial de Portugal en 1999. No curso 2026-2027, 565 alumnos do Agrupamento de Escolas de Miranda do Douro están matriculados na disciplina optativa de Mirandés.

Fonte: Jornal de Notícias

A Confederación Calandreta, rede de escolas de inmersión en occitano, foi distinguida coa décima edición do premio Robèrt Lafont pola súa traxectoria na promoción e transmisión desta lingua. A rede conta con 67 centros educativos e preto de 4000 estudantes. As Calandreta empregan o occitano como lingua de ensino desde a educación infantil e adaptan o modelo ás variedades lingüísticas propias de cada territorio.

Fonte: Diari de la Llengua

A demanda para estudar kurdo como materia optativa aumentou considerablemente en varias zonas de Turquía. No distrito de Esenyurt, en Istambul, preto de 1000 estudantes escolleron esta lingua para o curso 2026-2027, mentres que en Diyarbakir o número de alumnos interesados aumentou exponencialmente. Porén, a falta de docentes de lingua kurda impide atender todas as solicitudes: en Diyarbakir serían necesarios máis de 100 profesores adicionais. 

Fonte: Kurdistan24

A Bressola, unha rede de escolas que ofrece educación en catalán mediante a inmersión lingüística na Cataluña Norte, celebrou o seu 50 aniversario. O proxecto, que comezou en 1976 con só sete alumnos, conta actualmente con máis de mil estudantes. Coa situación económica estabilizada, a entidade prepara a apertura dun instituto e de novas escolas nos próximos anos.

Fonte: Diari de la Llengua

Unha investigación dun laboratorio de IA estadounidense descubriu que varios axentes de intelixencia artificial desenvolveron novas palabras, metáforas e expresións para comunicarse entre eles. A súa linguaxe combina termos técnicos con expresións de estilo poético e pode resultar difícil de entender para as persoas. Os investigadores advirten de que esta falta de transparencia pode complicar a supervisión do comportamento dos sistemas de IA.

Fonte: The Guardian

Unha enquisa de YouGov realizada en seis países europeos mostra que entre o 87 % e o 97 % dos adultos consideran útil aprender outra lingua, pero as diferenzas na fluidez son importantes. Dinamarca presenta a porcentaxe máis alta de persoas que afirman falar fluidamente unha segunda lingua, cun 74 %, mentres que en España a cifra sitúase no 47 %. Esta porcentaxe é aínda menor en países como Francia e Italia.

Fonte: Euronews

Máis dunha decena de universidades da China suspenderon os estudos de lingua portuguesa nos últimos tres anos. Segundo o Instituto Portugués do Oriente (IPOR), a oferta chegou a alcanzar entre 55 e 60 universidades, mentres que actualmente son 39 no territorio continental e cinco en Macau. O descenso prodúcese nun contexto de estancamento do ensino de linguas e de crecente interese polas carreiras de ciencia, tecnoloxía ou enxeñaría e pola incidencia da intelixencia artificial.

Fonte: RTP