O aumento do alumnado estranxeiro en Portugal, que case se cuadriplicou na última década, está a impulsar iniciativas de apoio lingüístico en numerosos centros educativos. Nunha escola de Lisboa, onde o 39 % do alumnado ten orixe migrante, un proxecto baseado en actividades lúdicas e no acompañamento de persoas voluntarias axuda os nenos e nenas recentemente chegados a aprender portugués.

Fonte: UN News

O Goberno brasileiro aprobou a creación da primeira universidade federal indíxena do país, a Universidade Federal Indíxena (Unind). A institución terá a súa sede en Brasilia, mais contará cun modelo multicéntrico con campus noutras rexións para atender a diversidade territorial, cultural e lingüística dos pobos indíxenas.

Fonte: Diari de la Llengua

Un membro do Consello de Cornualles cuestionou que exista unha demanda social suficiente para xustificar o financiamento da estratexia de promoción da lingua córnica. Segundo sostén, non está claro se os obxectivos do plan responden ás prioridades da cidadanía no seu conxunto ou máis ben ás dun grupo reducido de defensores da lingua. O proxecto contempla investimentos para a próxima década e inclúe medidas educativas ambiciosas, como a introdución do córnico nas escolas e mesmo a creación dun centro educativo bilingüe.

Fonte: Cornish Times

A Asociación para o Ensino do Catalán (APLEC) reclama que o catalán estea dispoñible en todos os centros escolares da Cataluña Norte. A proposta busca garantir que todo o alumnado poida aprender a lingua propia do territorio en igualdade de condicións, con independencia do centro no que estude, reforzando así a súa presenza no sistema educativo. Esta iniciativa inscríbese nos esforzos por preservar e normalizar o uso do catalán nun contexto no que o seu emprego social segue a ser minoritario ou está claramente minorizado.

Fonte: Diari de la Llengua

O Goberno dos Países Baixos prepara medidas para reforzar a aplicación da obriga de dominar o neerlandés entre as persoas que perciben prestacións sociais. Os concellos que non fagan cumprir esta norma poderían enfrontarse a sancións económicas, mentres que se prevé aumentar tamén a redución das axudas para quen non mellore o seu nivel lingüístico.

Fonte: Dutch News

O presidente da República de Portugal, António José Seguro, pediu ás autoridades de Luxemburgo que amplíen a oferta do portugués como materia opcional nos currículos escolares. O mandatario lembrou que arredor dun terzo da poboación do país é lusófona e destacou a importancia da lingua portuguesa para fortalecer a cohesión da comunidade emigrante e ampliar as oportunidades educativas e profesionais do alumnado.

Fonte: TSF Rádio Notícias

O Ministerio de Educación do Xapón prevé pór en marcha en 2027 un proxecto piloto para ofrecer formación básica en xaponés a nenos e nenas estranxeiros antes da súa incorporación plena ás aulas. A iniciativa responde ao forte aumento do alumnado que precisa apoio lingüístico: no curso 2025 rexistráronse case 85.000 estudantes con necesidades neste ámbito, o dobre que hai nove anos.

Fonte: Nippon

O papa León XIV publicou a encíclica Magnifica Humanitas sen versión oficial en latín, algo inédito ata agora. A medida enmárcase nunha reforma lingüística máis ampla no Vaticano, que reduce o papel tradicional do latín e dá máis protagonismo ás linguas de uso internacional.

Fonte: Diari de la Llengua

A Cooperativa Árvore do Porto celebra entre xuño e xullo o Mes do Mirandés, unha iniciativa que inclúe exposicións, conferencias e actividades culturais para promover a lingua mirandesa e o patrimonio da Terra de Miranda. O programa pretende achegar esta realidade lingüística ao público urbano e destacar o valor da diversidade cultural en Portugal.

Fonte: Diário de Trás-os-Montes

Un proxecto da Universidade de Aberystwyth investiga a poesía medieval en lingua galesa para analizar como os bardos empregaban a linguaxe do amor, do afecto e do matrimonio ao describiren a súa relación cos seus mecenas. O estudo busca comprender a orixe e evolución desta tradición literaria propia do galés, así como o que revela sobre a lealdade, a identidade, a masculinidade e as relacións de poder na sociedade galesa da Idade Media.

Fonte: Cambrian News