O número de nenos e nenas que comezan a escolarización en lingua húngara en Eslovaquia manterase practicamente estable, con arredor de 3454 alumnos e alumnas, despois de varios anos de retroceso. A evolución supón un alivio para a minoría húngara do país, aínda que a estabilidade chega tras unha prolongada tendencia á baixa.

Fonte: Hungary Today

Paraguai celebrou o Día do Idioma Guaraní destacando a vitalidade dunha lingua que comprende arredor do 90 % da poboación e que se emprega habitualmente, soa ou mesturada co castelán, en boa parte do país. A conmemoración coincidiu coa difusión dun artigo de The Economist que cualificaba o guaraní como unha lingua "máis xenial" ca o español.

Fonte: Paraguay.com

A Universidade Sergio Arboleda, de Santa Marta, Colombia, impulsa unha iniciativa que implica a mocidade de San Basilio de Palenque e da Serra Nevada de Santa Marta na preservación das súas linguas, saberes e relatos culturais. O proxecto emprega recursos audiovisuais e sonoros para documentar e transmitir este patrimonio entre xeracións.

Fonte: Opinión Caribe

A protección da lingua francesa converteuse nun dos puntos de desacordo nas negociacións comerciais entre o Canadá e os Estados Unidos. O Goberno canadense rexeitou un acordo que, segundo o primeiro ministro Mark Carney, podía ameazar as garantías lingüísticas e culturais do país, mentres Washington considera algunhas destas normas unha barreira para as empresas estadounidenses.

Fonte: Notícias R7

O municipio de Vila Nova de Poiares, no distrito de Coímbra, organizará unha nova edición dun curso de portugués destinado ás persoas estranxeiras residentes no concello. A formación, que comezará en setembro, pretende facilitar a comunicación no día a día e favorecer a integración social e a participación na comunidade local.

Fonte: The Portugal News

Un novo libro afonda na figura de Dolly Pentreath, unha das últimas falantes nativas coñecidas do córnico. A obra, escrita por Jan Pentreath, investiga as incógnitas que rodean a súa vida e cuestiona algúns aspectos da súa historia, incluída a súa consideración como "a última falante" da lingua.

Fonte: Voice

O Consello de Cornualla solicitou ao Departamento de Transporte británico autorización para incluír progresivamente o córnico na sinalización viaria da rexión. A proposta pretende reforzar a presenza pública desta lingua celta e avanzar cara a un modelo de sinalización bilingüe, seguindo o exemplo do galés en Gales.

Fonte: Cornish and Devon Post

Unha investigación da Universidade de São Paulo analiza a evolución histórica, social e xeográfica da lingua galega a partir de entrevistas realizadas en diferentes localidades de Galicia. O estudo destaca a diversidade dialectal e multilingüe do territorio, así como a influencia das relacións sociais e das percepcións sobre a lingua no seu uso. Tamén aborda a persistencia de prexuízos e xerarquías que tradicionalmente asociaron o galego coa ruralidade.

Fonte: Jornal da USP

A libraría de Llanrwst, considerada a máis antiga do mundo especializada en libros en lingua galesa, reabriu tras ser rescatada por un proxecto comunitario no que participaron 550 persoas. O establecemento, con máis de sete décadas de historia, regresou ao seu histórico local despois de cinco meses nunha sede provisional.

Fonte: Daily Post