Un estudo realizado por investigadores da University College London e da Universidade de Tohoku revelou que as persoas con maior capacidade para distinguir matices sonoros aprenden a pronunciar outras linguas con máis rapidez e precisión. A investigación, na que participaron 67 estudantes xaponeses de inglés, suxire que prestar atención a aspectos como a entoación, a duración e as diferenzas entres son pode favorece a aprendizaxe. Os resultados apuntan á conveniencia de reforzar a percepción auditiva no ensino de idiomas, en lugar de pór o foco exclusivamente no vocabulario e na gramática.

Fonte: The Guardian

Siria abrirá cinco escolas con ensino en kurdo na provincia siria de Hama, mentres que tamén se solicitaron centros deste tipo en Daraa. A iniciativa pretende recuperar o uso da lingua materna entre comunidades kurdas e ampliar o seu ensino máis alá do nordeste de Siria. As autoridades kurdas reclaman que o kurdo sexa recoñecido constitucionalmente como lingua de ensino e que se garanta a continuidade das materias impartidas neste idioma.

Fonte: Rudaw

A Facultade de Ciencias Sociais e Humanas da Universidade Nova de Lisboa abriu a inscrición para un curso intensivo en liña de portugués como lingua estranxeira de nivel A2. A formación consta de 60 horas e desenvolverase do 23 de novembro ao 15 de decembro de 2026. Está dirixida prioritariamente a persoas candidatas ao programa Erasmus+ da universidade que queiran mellorar as súas competencias comunicativas en portugués. O prazo de inscrición remata o 13 de novembro.

Fonte: NOVA FCSH

O Festival de Cinema Itinerante da Lingua Portuguesa (FESTin) celebrou en Lisboa a súa 17.ª edición, cunha programación duns 60 filmes que mostran a diversidade do espazo lusófono. Sete realizadores de países africanos de lingua portuguesa presentan historias sobre memoria, migración, identidade, tradición e condición feminina.

Fonte: RFI

O Consello de Europa insta Croacia a reforzar o diálogo intercultural e a protección das minorías nacionais. Un informe sinala que persisten obstáculos ao uso oficial das linguas minoritarias, unha representación insuficiente destas comunidades nas institucións públicas e xudiciais e a discriminación contra a poboación romaní.

Fonte: Mirage News 

Marrocos continúa a impulsar o uso da lingua amazigh nos servizos públicos. Durante o primeiro semestre de 2026, desenvolveu plans de actuación en 26 áreas administrativas, ampliou a sinalización bilingüe e incorporou a lingua a vehículos oficiais e servizos de atención á cidadanía.

Fonte: Morocco World News

O deputado vasco Peio Dufau e o bretón Paul Molac presentaron no Parlamento francés unha proposta para modificar a Constitución e reforzar a protección das linguas minoritarias. A iniciativa pretende modificar os artigos 2 e 34 para que o feito de que o francés sexa a lingua da República non impida promover e utilizar linguas como o catalán, o éuscaro, o bretón ou o occitano.

Fonte: VilaWeb

O cantautor galés Dafydd Owain gañou o Premio de Música Galesa 2026 polo seu álbum Ymarfer Byw, polo que recibirá tamén un premio de 10.000 libras. O disco, inspirado nun período especialmente intenso da súa vida, foi recoñecido este ano como Álbum en Lingua Galesa do Ano no Eisteddfod Nacional.

Fonte: Wales247

O Comité de Educación, Ciencia e Innovación do Parlamento de Ucraína (Rada Suprema) recomendou aprobar na súa totalidade un proxecto de lei destinado a garantir os dereitos educativos dos pobos indíxenas e das minorías nacionais. O texto mantén o ucraíno como lingua de ensino, pero garante o uso das linguas das minorías e dos pobos indíxenas do país.

Fonte: Shelter

A profesora e tradutora Han Lili traduciu ao chinés Misericordia, de Lídia Jorge, unha obra que considera especialmente próxima ao público chinés polos seus temas universais, como o envellecemento, a soidade e a condición humana. A tradutora destaca a capacidade da autora portuguesa para superar as diferenzas culturais entre Portugal e a China e explica as dificultades que afrontou para conservar na versión chinesa a riqueza e o estilo do texto orixinal.

Fonte: Observatório da Língua Portuguesa