A serie de debuxos animados da BBC Friends and Heroes retransmitiuse por vez primeira en 2007 e foi traducida a un total de once linguas. A última delas é o gaélico da illa de Man onde se distribuirán copias da serie nas escolas.

Fonte: BBC

O Instituto Tecnolóxico de Massachusetts e o Goberno de Haití asinaron unha iniciativa conxunta para a promoción do ensino das ciencias, a tecnoloxía, a enxeñería e as matemáticas por medio da lingua crioula, como parte dun proxecto para axudar os haitianos a estudaren na lingua que a maioría fala na casa.

Fonte: MIT news

A Sociedade da Lingua Galesa (Cymdeithas yr Iaith Gymraeg) denunciou que menos de 4000 libras, dun orzamento total de 17 millóns, se destinou á educación de adultos en lingua galesa no País de Gales.

Fonte: Wales Online

A lingua inuktitut pode gozar do mesmo status que o inglés e o francés no territorio canadense de Nunavut, mais a comisaria de Linguas, Sandra Inutiq, afirma que o seu uso está diminuíndo moi rapidamente e asegura que a súa promoción no sistema educativo debe ser unha prioridade.

Fonte: Nunatsiaq Online

A plataforma de almacenamento de arquivos en liña Dropbox anunciou que está dispoñible en seis novas linguas: ruso, polaco, indonesio, malaio, chinés tradicional e chinés simplificado.

Fonte: The Next Web

Tres deputados da Asemblea Lexislativa de Macau defenderon a necesidade de que o Goberno desta Rexión Administrativa Especial da China estimule a aprendizaxe do portugués nas escolas e engada unha disciplina de lingua portuguesa no ensino secundario.

Fonte: Ponto Final

Segundo un estudo do Instituto Brasileiro de Xeografía e Estatística, apenas o 37,4 % dos indíxenas brasileiros fala a lingua da súa etnia.

Fonte: Spanish People

Segundo o índice EF English Proficiency (EPI), Portugal é un dos países co dominio do inglés máis baixo de Europa e está só por diante de Francia, Italia e Rusia. Os países co índice de coñecemento máis alto son Suecia, Dinamarca, Países Baixos e Finlandia.

Fonte: Diário Digital

Un inédito proxecto financiado por CONADI (Corporación Nacional chilena de Desenvolvemento Indíxena) prevé a contratación e formación de 12 profesores que ensinarán a lingua rapanui na illa de Pascua a crianzas desde preescolar ata primaria.

Fonte: El Martutino

Un estudo publicado polo Instituto luxemburgués de Estatística e Estudos Económicos (Statec) revela que máis de dous terzos da poboación luxemburguesa fala a lingua vernácula no traballo, na escola e na casa. A esta lingua séguelle o francés, que o emprega máis da metade da poboación, e o alemán, falado por case un terzo dos luxemburgueses. O inglés e o portugués están igualados, é dicir, unha de cada cinco persoas fala unha destas dúas linguas.

Fonte: Le Quotidien