Os bretóns acaban de acadar a súa identidade dixital. Os seus enderezos de sitios de internet poderán pronto rematar en .bzh. Trátase dunha vitoria para a asociación Point BZH que encabezaba o proxecto desde hai varios anos.

Fonte: Les Inrocks

Unha enquisa sobre o uso da lingua galesa polos profesionais do servizo británico de saúde abordará as "inconsistencias" actuais do uso do galés e garantirá un servizo sanitario "seguro" para unha nación bilingüe, declarou a comisaria da lingua galesa, Meri Huws.

Fonte: Wales Online

Unha investigación realizada pola Universidade de Columbia Británica (Canadá) e a Universidade París Descartes (Francia) desvelou que os nenos bilingües son capaces de distinguir sons e frases en diferentes linguas a partir dos sete meses.

Fonte: Befan

As entidades a prol das linguas minorizadas da República Francesa pedirán diante da sede da Organización das Nacións Unidas para a Educación, a Ciencia e a Cultura (Unesco) "asilo cultural" ante a "discriminación lingüística sistemática" que padecen os seus falantes.

Fonte: Nationalia

Con 83 millóns de internautas no mundo, a lingua portuguesa xa superou o árabe, o francés e o alemán e é o quinto idioma máis falado na web, segundo datos da Unión Internacional de Telecomunicacións. Os expertos prevén que, en poucos anos, o portugués poderá superar o xaponés e ocupar a cuarta posición.

Fonte: O Diário

Nun informe presentado recentemente con motivo do Consello dos Dereitos Humanos das Nacións Unidas, a experta Rita Izsak declarou que se está producindo un declive preocupante das linguas minoritarias do mundo e nalgúns casos débese a factores como a globalización e os procesos de asimilación cultural.

Fonte: Kashmir Times

O servizo de tradución de Google (Google tradutor) xa está dispoñible en máis de 70 idiomas. Recentemente incorporou o xavanés, o bosníaco, o cebuano, o homng e o maratí.

Fonte: Techtudo

O Ministerio de Cultura, Educación, Ciencia e Tecnoloxía da Arxentina, a través da área de Educación Intercultural Bilingüe (EIB), realizará catro encontros, na escola Tajy Poty de Paraje Yacutinga, para discutir a implementación de contidos da cultura mbiá guaraní no currículo escolar das escolas que existen nas diferentes comunidades da provincia de Misiones.

Fonte: Territorio Digital

Os impulsores do Foro das Linguas de Toulouse (Francia) insisten na necesidade de pechar o debate lingüístico facendo de Francia un estado "pluralista" e "democrático". Ao mesmo tempo, o Foro reclama que se redacte unha proposición de nacionalización das linguas e culturas de Francia.

Fonte: Nationalia

Os deputados presentes no momento da votación deron apoio por unanimidade á oficialización do corso. Porén, a aprobación non ten efecto legal inmediato: é a Asemblea Nacional francesa a que ten que outorgar a cooficialidade efectiva do corso e o francés. O estatuto adoptado prevé unha presenza importante do corso na Administración pública e na escola.

Fonte: Nationalia