Cada vez máis universidades de Finlandia ofrecen contidos en lingua inglesa, grazas á promoción do Ministerio de Educación finlandés. A Escola de Comercio de Helsinqui será a primeira en ofrecer un programa completamente en inglés.

Fonte: France Info

.

A Presidencia do Consello de Ministros italiana, a Provincia Autónoma de Bolzano e a televisión italiana (RAI) asinaron un convenio para a realización e emisión de programas de radio e televisión en lingua alemá e ladina na rexión do Alto Adige.

Fonte: IGN

O Ministerio de Educación surafricano imporá como obrigatoria a aprendizaxe do zulú en todas as escolas de primaria a partir do vindeiro ano, informou o xornal Mercury. A iniciativa ministerial chega despois de que a Universidade de KwaZulu-Natal anunciara que imporía a obrigatoriedade desta lingua. Porén, expertos advirten de que a falta de profesores podería obstaculizar a implantación da medida.

Fonte: Milenio

Co fin de atraer universitarios estranxeiros ás universidades francesas, o Goberno francés planea permitir a impartición de estudos superiores en lingua estranxeira. Os detractores destas medidas consideran que isto suporía unha nova ameaza para a lingua francesa.

Fonte: Deutsche Wirtschafts Nachrichten

O Goberno da India concedeu o status de lingua clásica ao malabar, cumprindo así unha das solicitudes pendentes do estado de Kerala. Con esta medida, o malabar entra a formar parte dun exclusivo grupo que inclúe o sánscrito, o támil, o telugú e o canarés.

Fonte: The Indian Express

Algúns membros ministeriais do País de Gales anunciaron un novo conxunto de normas que imporán obrigas de promoción da lingua galesa ao propio goberno, concellos e parques nacionais. O partido nacionalista Plaid Cymru expresou a súa decepción de que estas medidas non impliquen un maior número de organizacións.

Fonte: BBC

En colaboración co Ministerio angolano de Educación, o Goberno francés continuará a dar o seu apoio á expansión e desenvolvemento da lingua francesa en Angola por medio de programas nas escolas, sesións de formación para o profesorado e realización de concursos.

Fonte: Portal Angop

O francés será a lingua de traballo do futuro Goberno rexional de Baie-James (Quebec). Porén, este terá a obriga de traducir os documentos á lingua cree e mais ao inglés, tal como estipula o novo proxecto de lei aprobado recentemente.

Fonte: La Presse

No ámbito do programa de valorización das linguas macuxí e wapixana, o Instituto Insikiran da Universidade Federal de Roraima (Brasil) publicou recentemente dúas importantes obras: o dicionario bilingüe wapixana-portugués e a gramática da lingua macuxí.

Fonte: Globo

O Perú ten na actualidade 47 linguas nativas faladas por catro millóns de habitantes, residentes na súa maioría na selva amazónica. O 83 % deses catro millóns de falantes ten o quechua como lingua materna, o 11 % o aimará e o 6 % fala linguas amazónicas.

Fonte: RPP