A asociación en defensa da lingua bretoa Mervent solicitoulle ao Estado francés a incorporación obrigatoria dunha hora de iniciación á lingua bretoa por semana no horario escolar, ao mesmo nivel que as matemáticas e a historia, así como o financiamento completamente público deste ensino.

Fonte: Ouest France

Un informe elaborado polo Goberno de Finlandia sobre a aplicación da lexislación lingüística conclúe que os dereitos lingüísticos dos falantes de linguas diferentes ao finés, concretamente, sueco e saami, non están o suficientemente protexidos no país escandinavo.

Fonte: Nationalia

Europa volve reclamar axuda para as linguas minorizadas. Desta vez foi a Comisión de Cultura do Parlamento Europeo, que aprobou por unanimidade un informe que insta á protección dos idiomas en perigo de desaparición e no que se lles pide aos estados membros que promovan a súa aprendizaxe na escola desde idades temperás, ademais de facer especial fincapé no ensino en preescolar.

Fonte: Praza Pública

“A expansión do ensino do portugués xerará riqueza para os países lusófonos. É o momento de que os gobernos destes países entendan a importancia do ensino do portugués, pois agora non é só unha cuestión cultural, senón tamén económica”, dixo á Axencia Lusa, Carlos Wesley, responsable do vídeo documental “O ensino do portugués gaña forza no mundo”.

Fonte: Sol

Dúas leis aprobadas pola Asemblea da Polinesia Francesa foron declaradas ilegais polo Consello de Estado francés porque unha sesión da Asemblea tivo lugar na lingua local, o tahitiano. O tahitiano está recoñecido oficialmente por persoas xurídicas privadas e individuos.

Fonte: Nationalia

O primeiro exemplar do dicionario das linguas de Honduras verá a luz como parte dun proxecto cultural que conta co apoio da Axencia Española de Cooperación Internacional para o Desenvolvemento.

Fonte: La Prensa

Das 47 linguas orixinarias que se identificaron no Perú, vinte delas contan xa con alfabetos normalizados e cinco levan camiño de ser consensuadas entre os seus propios falantes, informou o Ministerio de Educación do país andino.

Fonte: Rpp

A Organización das Nacións Unidas para a Educación, Ciencia e Cultura (Unesco) apoiará a Comunidade de Países de Lingua Portuguesa (CPLP) na creación dunha rede, denominada "Iniciativa Ciencia en Portugués", para reforzar a cooperación científica no idioma.

Fonte: Portugal Digital

Publicouse un novo espazo dixital de noticias e redes sociais en galés, PoblCaerdydd, desenvolvido co apoio da escola de xornalismo da Universidade de Cardiff, para dar servizo aos aproximadamente 36 000 falantes de galés de Cardiff.

Fonte: The Guardian

Un grupo de científicos descubriu unha nova lingua que contén trazos gramaticais innovadores e unha combinación única de elementos doutros idiomas. A lingua en cuestión fálase nunha comunidade remota de 300 falantes situada no Territorio do Norte de Australia.

Fonte: The Times of India