Lusofonía
A Universidade de Coímbra concede o Premio Joaquim de Carvalho a un estudo sobre a obra de Manuel Bandeira
A investigadora brasileira Maria Aparecida Ribeiro recibiu o Premio Joaquim de Carvalho pola súa obra Manuel, Bandeira: de uma língua. O traballo analiza a relación do poeta brasileiro coa lingua portuguesa e a súa dimensión literaria.
Fonte: Universidade de Coímbra
Un proxecto impulsa a aprendizaxe da lingua portuguesa no norte de Mozambique
O proxecto "Português Vivo" desenvolvido na Escola Básica de Napai, no norte de Mozambique, xa beneficiou 250 nenos e nenas de entre 7 e 18 anos. O obxectivo do programa é fortalecer e fomentar o coñecemento do portugués nesta zona do país africano.
Fonte: e-Global
As dificultades co idioma complican a entrada das empresas lusófonas no mercado chinés
O Círculo de Negocios da Lingua Portuguesa (CNLP, polas súas siglas en portugués) sinala que as diferenzas lingüísticas dificultan a expansión das empresas dos países lusófonos na China. A entidade destaca a necesidade de superar esta barreira e reforzar a cooperación empresarial para facilitar os intercambios comerciais entre os dous espazos.
Fonte: Forbes África Lusófona
A Universidade Católica de Colombia impulsa o portugués como porta de entrada á lusofonía
A Universidade Católica de Colombia desenvolveu un proxecto destinado a promover a aprendizaxe do portugués e o coñecemento das culturas lusófonas entre estudantes, docentes e persoal administrativo. O programa, realizado en colaboración coa Universidade Federal de Ouro Preto, no Brasil, e a Universidade Católica Portuguesa, incluíu cursos presenciais de lingua e permitiu reforzar as competencias lingüísticas, o intercambio intercultural e a internacionalización da comunidade universitaria.
Unha exposición percorre os vinte anos do Museo da Lingua Portuguesa
Unha nova exposición conmemora as dúas décadas de historia do Museo da Lingua Portuguesa e repasa a súa traxectoria como espazo dedicado á diversidade, á evolución e á difusión do idioma portugués. A mostra recupera momentos destacados da institución e pon en valor o seu papel na promoción da lingua e da cultura lusófona. Fonte: Boqnews
Portugal reforza o investimento no ensino do portugués para persoas estranxeiras
O programa PESSOAS 2030 reforzou o financiamento destinado á aprendizaxe do portugués por parte de cidadáns estranxeiros. A iniciativa busca facilitar a adquisición e certificación de competencias lingüísticas e favorecer a integración social, cultural e profesional das persoas migrantes en Portugal.
Fonte: PESSOAS 2030
Os portugueses len máis e recorren cada vez máis a libros noutras linguas
O Barómetro WOOK 2026 revela un aumento da lectura regular en Portugal e unha maior presenza de obras noutras linguas, especialmente en inglés. O 72 % das persoas consultadas afirma ler con regularidade e arredor dun terzo dos lectores habituais tamén le en inglés, principalmente por gusto persoal, necesidades profesionais ou para practicar unha lingua estranxeira.
Fonte: Sapo
Coímbra e Macau crean un laboratorio conxunto para investigar sobre linguaxe e humanidades dixitais
As universidades de Coimbra e Politécnica de Macau reforzan a súa colaboración científica coa creación dun laboratorio conxunto dedicado ás Humanidades Dixitais e ás Ciencias da Linguaxe. A nova estrutura pretende impulsar proxectos de investigación e cooperación entre as dúas institucións, aproveitando as posibilidades das tecnoloxías dixitais para estudar a linguaxe e o patrimonio cultural. A iniciativa contribúe tamén a estreitar os vínculos académicos entre Portugal e Macau.
Fonte: Universidade de Coimbra
Angola e Mozambique seguen sen ratificar o Acordo Ortográfico da lingua portuguesa
Angola e Mozambique son os únicos países da Comunidade de Países de Lingua Portuguesa (CPLP) que aínda non ratificaron o Acordo Ortográfico de 1990. Ambos os gobernos alegan que o texto non recolle adecuadamente as particularidades do portugués falado nos seus territorios, o peso das linguas nacionais e os elevados custos que suporía a súa aplicación.
Fonte: DW
A mocidade mozambicana pide reforzar o papel do portugués como lingua de integración na CPLP
No 30º aniversario da Comunidade dos Países de Lingua Portuguesa (CPLP), mozos e mozas de Mozambique destacaron a importancia do portugués como ferramenta para facilitar o intercambio de coñecemento, a cooperación e a integración entre os países lusófonos. Ademais, reclamaron máis iniciativas para promover a circulación de obras en portugués, fomentar a tradución e crear espazos comúns que reforcen a proxección internacional da lingua.
Fonte: ONU News
Boletín
Subscríbase ao boletín
