O conselleiro de Educación, Ernest Maragall, afirmou no Parlamento que o catalán é a lingua franca que se usa dentro das aulas de Cataluña. O conselleiro dixo isto cando lle preguntaron polo último estudo lingüístico do Consello Superior de Avaliación do Sistema Educativo de Cataluña sobre o idioma que usan os alumnos de cuarto de secundaria. Segundo o documento, a lingua de entendemento na hora do patio é o castelán.

Fonte: Europa Press

O Goberno balear atreveuse a levar a cabo unha ameaza que era vox populi: o persoal sanitario deberá aprender tamén catalán. O Servizo de Saúde (Ib-salut) elaborou un borrador de decreto no que se esixe acreditar nivel A ou B a todos os profesionais que desexen optar a unha praza fixa.

Fonte: El Mundo

O directo de Air Berlin para España e Portugal, Álvaro Middelmann Blome, reafirmou que a súa empresa non empregará as linguas cooficiais do Estado para dar mensaxes nos seus voos.

Fonte: Galiciae

O Concello de Montuïri, xunto coa asociación Paraula e o Centre de Serveis Lingüísticos, poñerá en funcionamento un programa de voluntariado lingüístico.

Fonte: Diario de Mallorca

A Comunidade de Madrid foi en 2007 o terceiro destino nacional dos estranxeiros que queren aprender español, con 37.920 estadías, por detrás de Málaga e Salamanca, segundo datos da Consellería de Cultura e Turismo, que asinou un acordo de colaboración coa Asociación Empresarial de Escuelas de Español en Madrid para potenciar a rexión como destino idiomático.

Fonte: Telemadrid

Zerberri.com é o primeiro buscador de noticias en éuscaro de internet. Os seus promotores, o informático Gorka Julio e o xornalista Haritz Rodriguez, presentaron ao público esta ferramenta que rastrexará a rede a partir dunha lista de cen fontes de información, todas elas en lingua vasca.

Fonte: Diario Vasco

Coalición por Melilla (CPM), principal partido da oposición e de maioría musulmá, reiterou a súa proposta de promoción e aprendizaxe do tamazight, lingua milenaria de orixe bérber, para acabar coa alta porcentaxe de fracaso escolar que se dá na cidade autónoma.

Fonte: Infomelilla

O Departamento de Educación vasco, que encabeza Tontxu Campos, de EA, decidiu comezar a aplicar este curso o novo sistema de exencións de estudar éuscaro, moito máis restritivo que o que estaba en vigor ata o momento. O problema é que se tomou esta decisión cando o curso xa comezara e arredor de 8000 alumnos xa se matricularan baixo as pautas do sistema anterior, polo que estaban eximidos totalmente cada ano do estudo e da avaliación da lingua vasca.

Fonte: El País

Aragón é trilingüe. Ademais do catalán falado na franxa oriental, a denominada de Ponent, e o castelán, utilizado en todo o territorio, en boa parte da provincia de Huesca e nun reducido número de municipios de Zaragoza fálase aragonés. Esta lingua, falada como máximo por unhas 24.000 persoas, sobrevive en diversos vales pirenaicos sen recoñecemento oficial ningún.

Fonte: Avui

Entre un 15 e un 20 % das 2520 prazas que Osakidetza sacará na oferta pública de emprego (OPE) de 2008 (os exames celebraranse a finais de marzo e a principios de abril do próximo ano) terá como requisito imprescindible o coñecemento do éuscaro. Esta é a previsión coa que traballa a dirección do Servizo Vasco de Saúde, que ultima estes días cos sindicatos as bases da convocatoria. Para o resto das prazas a concurso o coñecemento do éuscaro avaliarase como un mérito.

Fonte: El País