O vicepresidente do Goberno catalán, Josep-Lluís Carod-Rovira, presidiu o pasado luns día 15 de decembro o acto de celebración do vinte aniversario do Consorci per la Normalització Lingüística (CPNL) durante o cal destacou a aposta do executivo por esta “entidade de proximidade no terreo” que é “todo un referente”.

Fonte: Generalitat de Catalunya

"O Nadal e os xoguetes adoitan ser sempre fontes de ledicia. Que mellor que atraer os máis novos ao éuscaro a través desa ilusión". As palabras de Xanti Jaka, portavoz de Elkar Fundazioa, definen o espírito co que botou a andar a novena edición da campaña Euskara da oparirik onena -O éuscaro é o mellor dos agasallos-, que percorrerá sete municipios guipuscoanos co obxectivo de promover os produtos en lingua vasca nas compras do Nadal.

Fonte: Noticias de Gipuzkoa

Documentais, dramas, obras románticas e versións cinematográficas de clásicos da literatura traducidos á lingua de signos española serán algunhas das proxeccións que poderán verse no Círculo de Bellas Artes de Madrid ata o día 21 de decembro, no Festival de Cine Documental, Curtametraxes e Vídeo-Arte Accesible de Persoas Xordas.

Fonte: EcoDiario

Microsoft anunciou o lanzamento en catalán dos seus servizos de Windows Live entre os que se inclúe o popular sistema de mensaxería instantánea Messenger. O xestor de correo Live Hotmail estará dispoñible en catalán en febreiro, cando a multinacional prevé concluír o despregue de Windows Live neste idioma.

Fonte: La Vanguardia

Todos os grupos políticos con representación no Conselh Generau de la Vall d’Aran aprobaron unha moción que insta a Unesco a proclamar a lingua occitana como Patrimonio da Humanidade. Deste xeito, o Conselh dá soporte á iniciativa da entidade occitana Chambra d’Òc, que está a levar a cabo unha campaña no mesmo sentido desde hai meses.

Fonte: móndivers

A tensión interna no Executivo de Aragón, formado polo PSOE e o Partido Aragonés, pola Lei de linguas acaba de estallar. Ante a imposibilidade de alcanzar un acordo co seu socio, os socialistas decidiron presentar o proxecto lexislativo como proposición de lei do seu grupo parlamentario, un extremo inédito nos case dez anos de coalición gobernamental.

Fonte: Heraldo

A Secretaría de Política Lingüística de Cataluña decidiu poñerse en contacto coa compañía Swiss Air para felicitala polo uso do catalán, para explicarlle brevemente a situación sociolingüística desta lingua e para lembrarlle a normativa vixente. Tamén se lles enviaron cartas de felicitación a outras compañías que á Secretaría lle constaba que empregan o catalán nas súas comunicacións.

Fonte: Generalitat de Cataluña

A Plataforma per la Llengua presentou a guía 'I les teves joguines, ja incorporen el català?' (E os teus xoguetes, ¿xa incorporan o catalán?), dirixida aos fabricantes e empresarios de xogos e xoguetes, segundo informou a entidade.

Fonte: Hispanidad

Todos os inmigrantes que leven polo menos tres anos en Cataluña e queiran acreditar o seu arraigo social de cara á súa regularización deberán demostrar o seu coñecemento do catalán, que será a partir de agora a lingua vehicular de acollida das persoas que acaben de chegar a esta comunidade.

Fonte: Terra

Os alumnos da Universidade Politécnica de Valencia (UPV) terán que acreditar un coñecemento dun idioma estranxeiro, preferentemente o inglés, correspondente á certificación de referencia europea B2 para obter o seu título de grao tras a implantación do Espazo Europeo de Educación Superior (EEES).

Fonte: Levante-EMV