As entidades a favor da lingua irlandesa volveron saír á rúa para reclamar que o idioma propio da illa sexa declarado oficial en Irlanda do Norte. A aprobación dunha lei da lingua irlandesa foi un dos acordos que os partidos norteirlandeses aprobaron hai xa dous anos no Acordo de Saint Andrews, que serviu para recuperar a autonomía de Irlanda do Norte.

Fonte: Móndivers

A iniciativa enmárcase no recoñecemento, respecto e protección das culturas indíxenas mandatado pola Lei indíxena, e a revitalización da lingua e da cultura dos pobos orixinarios chilenos, anunciada pola presidenta Michelle Bachelet no plan “Re-Conocer: Pacto por la Multiculturalidad”.

Fonte: Conadi

O Rei Juan Carlos entregou o primeiro Premio Internacional Don Quijote de La Mancha ao presidente do Brasil, Luiz Inácio Lula da Silva, e ao escritor mexicano Carlos Fuentes pola súa contribución a enriquecer e promover o español en todo o mundo.

Fonte: El Mundo

O acordo ortográfico permitirá cimentar o papel da lingua portuguesa no mundo, un proceso que necesita en paralelo dun esforzo de promoción da lingua nos países onde se fala español, segundo defendeu o presidente brasileiro.

Fonte: Diário Digital

O investigador Alan Baxter, da Universidade de Macau, lidera un equipo que busca catalogar todos os crioulos de Asia de base portuguesa. Estes crioulos están localizados na India en Damão, Diu e Korlai, en Malásia en Malaca, e en China en Macau.

Fonte: RTP

O grupo municipal do BNG de Verín considera que os idiomas oficiais da eurocidade deben ser "o galego e o portugués", segundo afirma o voceiro Eloy Domínguez, quen lle reprochou á tenente de alcalde, María del Carmen Pardo, que o Concello de Verín impartira no mes de xullo clases de castelán para nenos portugueses e non en galego, ademais de editar folletos promocionais en lingua española.

Fonte: La Región

A Biblia foi traducida ata o momento a 2454 idiomas e, aínda que é o libro máis difundido do mundo, aínda falta por ser traducido a outros 4500, segundo informou o bispo italiano Vincenzo Paglia, presidente da Federación Bíblica Católica.

Fonte: Soitu

Con este acordo amplíase a rede de proxección exterior do galego, que na actualidade dispón de preto de 50 centros de estudos en todo o mundo.
O convenio ten unha vixencia temporal de catro anos e prevé tanto actividades docentes no ámbito académico como na área de influencia da universidade.
Tamén se renova o convenio coa Universidade de Deusto, en Bilbao, para continuar co programa de docencia de galego nese centro.

A lingua e a cultura galegas estudaranse no Estado de California grazas a un convenio entre a Secretaría Xeral de Política Lingüística e a Universidade de California, en Santa Bárbara. O Consello da Xunta aprobou esta colaboración, que prevé a proxección exterior do galego, no só no ámbito académico da universidade, senón tamén na súa área de influencia.

En virtude dese convenio de colaboración, cunha vixencia temporal de catro anos, a actividade docente constará de cursos de lingua ou lingüística nos que se insira o galego como lingua románica e, en función da demanda existente, poderanse realizar cursos de lingua galega en diferentes niveis. Ademais, prevese a organización dun curso de introdución aos estudos galegos e cursos monográficos especializados sobre temas ou autores galegos.
Outra das estipulacións deste convenio consiste na organización de actividades relacionadas coa investigación, a promoción e a difusión da lingua, da literatura e da cultura galegas, tales como: conferencias, seminarios, congresos, mesas redondas, exposicións etc.

Enlace coa Secretaría xeral
A través deste acordo, crearase o Centro de Estudos Galegos da Universidade, que será o órgano de referencia en todas as actividades que se desenvolvan en aplicación dos acordos deste convenio. Como responsable deste figurará o director do Departamento de Español e Portugués, ou persoa na que delegue, quen, dada a súa vinculación coa universidade, actuará como persoa de enlace entre esta e a SXPL. Será tamén a súa función catalogar e inventariar o material adquirido para o centro con cargo á subvención da Xunta de Galicia e organizará viaxes de estudos dos alumnos.

Ao remate de cada ano, este responsable remitiralle, en soporte informático e escrito, á SXPL unha memoria redactada en galego sobre as actividades levadas a cabo en cumprimento das accións previstas no acordo segundo este convenio.

A Universidade de California encargarase de contratar e de retribuír o profesor lector ou a profesora lectora, logo de ser seleccionado por unha comisión avaliadora integrada por representantes da Secretaría Xeral de Política Lingüística e polo director do Centro de Estudos Galegos. O lector ou lectora deberá estar en posesión de titulación universitaria superior e acreditar coñecementos de inglés suficientes como para impartir docencia, pronunciar conferencias ou realizar xestións. O lector acreditará coñecementos de galego e terá como campo de interese os temas galegos.

A universidade facilitará o aloxamento do profesor ou profesora nunha residencia universitaria e contribuirá economicamente a este fin. Tamén será competencia da institución académica estadounidense a adquisición do material, tanto bibliográfico como audiovisual e infraestrutural, necesario para realizar as actividades previstas.

A Secretaría Xeral de Política Lingüística colaborará na realización das accións previstas no acordo cunha contribución económica de 69.976,32 euros, que se dividirán proporcionalmente nas catro anualidades de vixencia do acordo.

Renóvase o acordo con Deusto
O Consello da Xunta tamén aprobou o novo acordo entre Política Lingüística e a Universidade de Deusto, en Bilbao, para darlle continuidade ao programa de estudos de lingua galega en dous niveis e de literatura e cultura galegas igualmente en dous niveis. Cada unha das materias, incluídas no plan de estudos da universidade como materias de libre elección, conta con 4,5 créditos. Ademais, o acordo tamén prevé a organización doutras actividades, como charlas, conferencias, encontros, etc.

O lector de galego desta universidade estará contratado como profesor-axudante, co que se continúan a mellorar as condicións laborais dos lectores, obxectivo que se fixou o departamento dirixido por Marisol López.
Nesta ocasión, o convenio terá unha vixencia de tres anos e, para sufragar os gastos derivados del, a Secretaría Xeral de Política Lingüística fará unha achega de 42.975,04 euros.

Fonte: Xunta de Galicia

O goberno escocés interesouse polo funcionamento da televisión pública catalá coa intención de levar adiante un proxecto similar en Escocia, para ofrecer unha canle de televisión en gaélico, que desde o ano 2005 é unha lingua oficial xunto co inglés.

Fonte: Avui

A secretaria xeral de Política Lingüística dará unha conferencia no marco destas xornadas, que se celebrarán na Universidade Nacional Autónoma de México entre o 20 e o 23 de outubro

As actividades iniciaranse co acto de nominación da Cátedra Bibiano Fernández Osorio-Tafall e continuarán con charlas e encontros entre investigadores

A lingua, a literatura, a cultura e a historia dos galegos en México terán cabida nestas xornadas, que se desenvolverán no Instituto de Investigacións Filolóxicas da UNAM

O luns, día 20 de outubro, darán comezo as actividades da Cátedra de Lingua, Literatura e Cultura Galegas posta en marcha na Universidade Nacional Autonóma de México (UNAM), grazas a un convenio de colaboración asinado o pasado mes de xaneiro entre o presidente da Xunta, Emilio Pérez Touriño, e o reitor da UNAM, José Narro. No marco da Semana de Galicia en México, celebraranse, nas dependencias da UNAM, as xornadas da Semana Cultural de Galicia en México, que terán como escenario o Instituto de Investigacións Filolóxicas desta universidade.

A semana iniciarase o propio luns co acto de nominación da cátedra, que pasará a chamarse Cátedra Bibiano Fernández Osorio-Tafall, en homenaxe a este político galego republicano exiliado en México tras a Guerra Civil española, que desempeñou importantes cargos diplomáticos na ONU e que foi profesor da UNAM. Ao acto asistirá a secretaria xeral de Política Lingüística, Marisol López, que promoveu a creación da cátedra xunto coa directora do Instituto de Investigacións Filolóxicas, Mercedes de la Garza. Ademais, tamén estarán presentes os fillos de Osorio-Tafall.

A este acto seguiralle unha conferencia de José Ángel Fernández-Arruty, fillo de Bibiano Fernández Osorio-Tafall, quen fará un percorrido pola biografía do seu pai. A continuación, o catedrático de Psicoloxía Evolutiva da Universidade de Santiago, Miguel Pérez Pereira, falará sobre a adquisición da lingua galega na primeira infancia.

Lingua, literatura, historia e edición contemporánea
En días posteriores haberá distintas conferencias arredor da lingua, a literatura e a cultura de Galicia. Así, Eduardo Moscoso, profesor de Filoloxía Galega na universidade compostelá, fará un percorrido pola historia do galego; e a secretaria xeral de Política Lingüística disertará sobre a política lingüística en Galicia e o proceso de normalización do galego na nosa sociedade. Pola súa parte, a profesora e investigadora do Centro Ramón Piñeiro para a Investigación en Humanidades, Elvira Fidalgo, falará sobre a poesía medieval galego-portuguesa.

Outra dos temas que se abordará será a historia dos republicanos galegos exiliados en México. O doutor en Historia da Universidade de Santiago Elixio Villaverde será o relator desta xornada. E para rematar a Semana Cultural de Galicia en México, o director de Edicións Xerais de Galicia, Manuel Bragado, falará sobre a situación da edición contemporánea en Galicia. O secretario xeral de Relacións Exteriores, Julio César Fernández Mato, clausurará a semana de actividades.

62 linguas diferentes
A posta en marcha desta cátedra na UNAM é de especial interese para facilitar o intercambio e o encontro entre investigadores do ámbito da lingüística. En México viven aproximadamente 10 millóns de cidadáns que falan arredor de 62 linguas indíxenas diferentes. Na actualidade, o 10 por cento da poboación total do país é falante dalgunha das linguas vernáculas, polo que México se revela como unha área cultural singular no continente americano e no mundo. Na UNAM, o estudo das linguas é prioritario no campo do coñecemento e da investigación.

Semana de Galicia en México
A Semana Cultural encádrase nas actividades programadas dentro da Semana de Galicia en México, que durante os vindeiros días levará á capital mexicana unha delegación institucional da Xunta de Galicia á que acompañarán entidades empresariais e representantes dun cento de empresas galegas. No marco deste evento, celebraranse encontros entre empresarios galegos e mexicanos e realizaranse actividades de carácter comercial.

Fonte: Xunta de Galicia