Nenos e mozos con carteis co lema Is Gael Og Me (Son un novo gaélico) procedentes dos principais centros de lingua irlandesa de Belfast e reunidos con nenos falantes de irlandés que viaxaron desde Strabane, Newry, Armagh, Ballycastle, Cas-tlewellan, Maghera and Derry acompañados por adultos pediron o status de oficialidade para esta lingua.

Fonte: The Irish News

Cada vez máis arxentinos queren aprender portugués, o que excede a capacidade do Instituto Camões no país, onde a embaixada tenta, tamén, sensibilizar os lusodescendentes cos encantos do país de orixe.

Fonte: Jornal de Notícias

A secretaria xeral de Política Lingüística presidiu, coa directora do Instituto de Investigacións Filolóxicas da UNAM, o acto de nominación da cátedra.

Con este acto iniciouse a Semana Cultural de Galicia en México, na que, durante catro días, haberá conferencias e encontros sobre lingua, literatura e cultura galegas.

Está prevista a realización de obradoiros entre os relatores galegos das xornadas e os alumnos da UNAM que asistan ás conferencias.

A secretaria xeral de Política Lingüística, Marisol López, presidiu xunto coa subdirectora do Instituto de Investigacións Filolóxicas da Universidade Nacional Autónoma de México (UNAM), Laura Sotelo, o acto de Nominación da Cátedra Bibiano Fernández Osorio-Tafall de lingua, literatura e cultura galegas no seo desta institución académica.

Con este acto, no que tamén participou o catedrático de Dereito Eclesiástico do Estado e fillo de Osorio-Tafall José Ángel Fernández Arruty, deu comezo a Semana Cultural de Galicia en México, unha actividade que á súa vez serve para iniciar oficialmente as actividades desta cátedra, creada en decembro de 2007 grazas a un convenio de colaboración asinado entre o presidente da Xunta de Galicia, Emilio Pérez Touriño, e o reitor da UNAM, José Narro.

Fernández Arruty expuxo un perfil biográfico de Fernández Osorio-Tafall, primeiro alcalde de Pontevedra na Segunda República, que participou na elaboración do Proxecto Estatuto de Autonomía do 36 e que en 1938 foi nomeado comisario xeral dos Exércitos. Tras a Guerra Civil, Osorio-Tafall exiliouse a México. Catedrático de Ciencias Naturais, foi profesor na UNAM e traballou ao servizo da Organización das Nacións Unidas (ONU).

A secretaria xeral de Política Lingüística amosou a súa satisfacción pola ampliación da Rede de Proxección Exterior do galego dependente do seu departamento, e en especial pola posta en marcha deste centro, integrado nunha das universidades máis prestixiosas do mundo, na que a lingüística ocupa un lugar preferente nos ámbitos da investigación e do coñecemento. “Esta cátedra pretende ser un lugar de encontro e de intercambio entre investigadores e estudosos galegos e mexicanos, pretende ser tamén un recoñecemento, na figura de Osorio-Tafall, a todos aqueles que un día tiveron que saír do seu país, nunhas circunstancias moi difíciles, pero tamén quere ser unha mostra de gratitude a un país que os acolleu cos brazos abertos”, dixo Marisol López, que mostrou a súa seguridade en que os traballos da cátedra serán moi frutíferos.

Conferencia de Pérez Pereira
O catedrático de Psicoloxía Evolutiva da Universidade de Santiago de Compostela Miguel Pérez Pereira pronunciou, na segunda parte da mañá, unha conferencia sobre a adquisición da lingua galega na primeira infancia. Nela, describiu o proceso de cambio na cantidade e composición do vocabulario dos nenos falantes do galego, e salientou a relación que existe entre o desenvolvemento léxico e o gramatical. Tamén expuxo o proceso de adquisición inicial da morfoloxía nominal e verbal e a súa orde de adquisición.

Finalmente, o profesor da USC analizou o primeiro desenvolvemento sintáctico, relacionándoo coas diferenzas individuais na adquisición da linguaxe, e co estilo analítico e o xestáltico en particular, así como coa chamada teoría da adquisición baseada no uso.

Esta primeira xornada da Semana Cultural de Galicia en México espertou moito interese na UNAM. Ademais dunha nutrida representación do corpo de investigadores do Instituto de Investigacións Filolóxicas, asistiron ás conferencias, entre outros, o conselleiro de Educación da Embaixada de España en México, Miguel Moreta, a cineasta Laura Gardós Velo, autoridades académicas da UNAM e descendentes de exiliados galegos en México.

Historia do galego e normalización lingüística
As xornadas da Semana Cultural de Galicia en México continúan cun relatorio do profesor Eduardo Moscoso, da USC, que falará sobre “A lingua galega: dos romanos ao século XXI”. Posteriormente, a secretaria xeral de Política Lingüística falará sobre o proceso de normalización e as perspectivas de futuro do galego.

Ademais das conferencias, polas tardes desenvolveranse obradoiros entre os conferenciantes e os alumnos e investigadores da UNAM.

Fonte: Xunta de Galicia

A directora do Instituto Cervantes, Carmen Caffarel, presentou en Nova York a "Enciclopedia del Español en Estados Unidos", país con máis de 44 millóns de hispanos e o segundo en número de falantes desta lingua do mundo por detrás de México.

Fonte: La Opinión

A principios de mes, a Real Academia Española celebrou os seus 294 anos de ininterrompido labor ao servizo do idioma. En Paraguai a entidade está representada pola Academia Paraguaya de la Lengua Española. Con todo, o seu labor está limitado debido ao baixo presuposto que recibe anualmente, malia contar co apoio de convenios internacionais referidos ao tema.

Fonte: Última Hora

Os xornais de Romanía recollen as palabras do presidente da Unión Democrática Húngara de Romanía (Romániai Magyar Demokrata Szövetség, RMDSz), Béla Márko, que reclamou que o húngaro sexa declarado lingua oficial nalgunhas rexións de Transilvania. Segundo Bela, esta idea será un dos eixes con que traballará o partido despois das eleccións romanesas, que se celebran o 30 de novembro.

Fonte: Móndivers

Marisol López explicou a situación actual do galego e os retos de futuro da política lingüística, que pasarán por avanzar na igualdade real entre a lingua galega e a castelá

A secretaria xeral afirmou que “canto máis igualitaria sexa a situación entre as dúas linguas, máis sólida será a súa convivencia”

O profesor da USC Eduardo Moscoso ofreceu unha conferencia sobre a historia da lingua galega desde o latín ata a actualidade

A secretaria xeral visitou o Centro Galego de México, onde mantivo un encontro co seu presidente e con membros da directiva desta colectividade

A segunda xornada da Semana Cultural de Galicia en México contou coa participación da secretaria xeral de Política Lingüística, Marisol López, quen abordou, nunha conferencia, a política lingüística en Galicia, o proceso de normalización do galego e as perspectivas de futuro.

A secretaria xeral fixo un repaso polo marco legal do galego e pola situación sociolingüística da lingua na actualidade. Destacou o incremento das competencias lingüísticas dos galegos na lectura e na escrita, pero tamén o risco de fractura xeracional na transmisión do idioma cara aos máis novos. Respecto dos retos actuais, sinalou a necesidade de avanzar cara a igualdade real entre o galego e o castelán, pois “canto máis igualitaria sexa a situación das dúas linguas, máis sólida será a súa convivencia e tamén a dos cidadáns”.

Marisol López apuntou como eixes prioritarios da política lingüística en Galicia favorecer o prestixio social do galego, promover a transmisión lingüística primaria, apoiar a presenza do galego nas novas tecnoloxías, mellorar aínda máis as competencias e lograr unha maior presenza do galego nas institucións do Estado e nas da Unión Europea.

Posteriormente, o profesor de Filoloxía Galega da Universidade de Santiago, Eduardo Moscoso, abordou a historia do galego desde o Imperio Romano ata o século XXI. Logo de ofrecer uns datos breves sobre Galicia e o galego, nesta charla expuxo as principais diferenzas entre as evolucións que sufriron o galego e o castelán, que foron as que conformaron as características actuais destas dúas linguas nos planos fonético, morfolóxico, sintáctico e léxico. Tamén fixo referencia á situación sociolingüística da lingua galega ao longo do tempo, e moi especialmente no momento actual.

Visita ao Centro Galego de México
Na tarde-noite do luns (madrugada en Galicia), a secretaria xeral de Política Lingüística visitou as instalacións do Centro Galego de México, onde mantivo un encontro co presidente desta entidade, Luís Piñeiro, e con membros da directiva do centro.

No transcurso da xuntanza, Marisol López e Luís Piñeiro intercambiaron impresións sobre a colectividade emigrante galega no país americano e sobre as actividades culturais que promove o centro, entre as que figuran distintos cursos de extensión cultural.

O mércores, a xornada iniciarase cunha conferencia da profesora da USC Elvira Fidalgo, que falará da poesía medieval galego-portuguesa, e continuará cunha charla do historiador Elixio Villaverde, que abordará a historia do exilio galego en México.

Fonte: Xunta de Galicia

O mes pasado Aureli Argemí, presidente do CIEMEN, unha organización membro da EBLUL, asistiu a unha sesión plenaria do Consello de Dereitos Humanos en Xenebra para pedirlles aos embaixadores que aprobasen a declaración "do dereito humano de cada persoa a falar na súa lingua". EBLUL, CIEMEN, Linguamón e a asociación International Pen presentaron un borrador de resolución hai catro meses.

Fonte: Eurolang

O secretario xeral de Relacións Exteriores clausurou en México D.F. as actividades da Semana Cultural de Galicia, enmarcadas na Cátedra Bibiano Fernánez Osorio-Tafall da Universidade Nacional Autónoma de México

Fernández Mato afirmou que “o galego é, na actualidade, obxecto de estudo en máis de 45 universidades de todo o mundo”

Previamente, nas actividades da Semana Cultural o director da Editorial Galaxia, Manuel Bragado pronunciou un relatorio sobre A Edición Contemporánea en Galicia

O secretario xeral de Relacións Exteriores da Xunta, Julio Fernández Mato, clausurou a semana de actividades da Cátedra Bibiano Fernández Osorio–Tafall, de Lingua, Literatura e Cultura Galegas na Universidade Nacional Autónoma de México. No decurso do seu relatorio, Fernández Mato referiuse á potencialidade que supón o idioma galego para a acción exterior de Galicia, especialmente na área lusófona (Portugal, Brasil, algúns países africanos e mesmo territorios asiáticos). Segundo Fernández Mato, esta potencialidade representa unha opotunidade para desenvolver unha acción exterior “singular e propia”.

“Hai un espazo que vén constituído polo mundo lusófono no que o potencial do galego se fai palpable e evidente”, destacou Fernández Mato. “A oportunidade que temos os galegos de entendernos, usando a nosa lingua, cos falantes da lingua portuguesa confire ao espazo lusófono un dos ámbitos máis interesantes para a difusión exterior da nosa lingua e literatura”, engadiu.

Estudo do galego en 45 universidades
O secretario xeral de Relacións Exteriores destacou tamén que “a UNAM nos ofrece un marco privilexiado para difundir a lingua e a cultura de Galicia posto que nos encontramos nun dos centros universitarios máis grandes e importantes de toda Iberoamérica”.

Por outra banda, Fernández Mato sinalou que“neste momento se pode estudar a lingua e a cultura galega en máis de 45 universidades de todo o mundo”. Son centros que contan con centros de estudos de lingua galega nos que se imparten clases adaptadas “xa sexa de conversa, gramática ou cursos de civilización e historia da lingua”, manifestou.

Rede de galegos no exterior
Xunto a isto, o secretario xeral destacou “o potente capital humano que representan os cidadáns galegos no exterior”. Segundo valorou, esta rede “permitiu á nosa lingua chegar a cidades tan dispares entre si como Sydney, Buenos Aires ou Zürich”. Segundo afirmou, o colectivo de galegos no exterior “contribúe de xeito decisivo á internacionalización da nosa lingua e cultura” .

A edición contemporánea en Galicia
Previamente, á clasura das actividades da Semana Cultural de Galicia en México, o director de Edicións Xerais, Manuel Bragado, pronunciou un relatorio na UNAM sobre a edición contemporánea en Galicia.

Bragado presentou unha panorámica do estado actual da edición en galego, ofrecendo os datos máis significativos da produción editorial e da súa tipoloxía, ao tempo que analizando as causas da “esperanzadora” situación do sector. Os retos e tendencias de futuro, no contexto da actual revolución dixital no mundo da edición internacional, foron abordardos na última parte da súa intervención.

Fonte: Xunta de Galicia

A lingua é un dos atributos máis importantes da cultura dun pobo, xa que perpetúa a súa forma particular de ver o mundo. De aí a importancia do lanzamento dos libros “Perfil sociolingüístico de las comunidades mapuche de la VIII, IX y X región”, “Manual para la enseñanza de la lengua mapuche” y “Manual para la enseñanza de la lengua aymara”, realizados polo Fondo de Cultura y Educación de la Corporación Nacional de Desarrollo Indígena (CONADI) en colaboración coa Universidad Tecnológica Metropolitana (UTEM).

Fonte: Conadi