Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Baleares foi a única comunidade autónoma que en 2013 editou máis libros e folletos nunha lingua cooficial autonómica (catalán), que en castelán, segundo a Estatística de Produción Editorial correspondente a 2013 e que publicou o Instituto Nacional de Estatística.
Fonte: Diario de Mallorca
A escola City of Leeds do condado británico de Yorkshire será a primeira do Reino Unido en introducir a materia de inglés como segunda lingua aos seus 350 alumnos, incluídos os que naceron no Reino Unido. A razón radica no baixo nivel de inglés do alumnado.
Fonte: Express
O ministro principal do País de Gales, Carwyn Jones, criticou con firmeza a cobertura que a prensa londiniense está a facer sobre Gales e a súa lingua. Declarou que se sente "moi preocupado" polo ton dos artigos xornalísticos que "suxiren que a lingua galesa supón un problema para Gales".
Fonte: BBC
Fundéu BBVA acaba de lanzar unha aplicación para resolver calquera dúbida lingüística en dispositivos móbiles ao ofrecer resposta a máis de 5000 cuestións e permitir consultar directamente o equipo de lingüistas da Fundación do Español Urxente.
Fonte: La Información
A Consellería de Cultura, Educación e Ordenación Universitaria, por medio do secretario xeral de Política Lingüística, Valentín García, presentou en Santiago de Compostela o concerto infantil-familiar Toc Toc que, o domingo 30 de marzo, chegará á capital galega ante unha grande expectación no marco do programa de dinamización lingüística FalaRedes 2014.
Fonte: Xunta de Galicia
A Mesa pola Normalización Lingüística realizará un informe, en colaboración con diversas entidades e institucións, para elevar a nivel internacional e denunciar ante a Unesco a vulneración dos dereitos lingüísticos dos falantes de lingua galega.
Fonte: La Región
En Letonia, o 95 % da poboación é bilingüe e o 54 % fala como mínimo tres linguas. Isto sitúa o país báltico no segundo con maior índice de bilingüismo da Unión Europea. Porén, o letón e outras linguas con menos falantes de Europa non poden competir con idiomas como o inglés, o ruso, o español, o chinés e o árabe en termos de visibilidade e uso nas novas tecnoloxías, o que podería traducirse nunha ameaza para a súa supervivencia.
Fonte: The Guardian
O reitor da Universidade Nacional de Timor Leste, Aurélio Guterres, declarou que o Instituto da Lingua Portuguesa en Dili vai ser inaugurado durante o cumio da Comunidade de Países de Lingua Portuguesa.
Fonte: Notícias ao Minuto
AEK, IKA, EHE, AET e a federación Sortzen, que conforman o 'movemento social do éuscaro', os sindicatos LAB, ELA e Stee-Eilas e Sasoia recolleron un total de 466 solicitudes de pais e nais demandando unha escola infantil en éuscaro no seu barrio de Pamplona.
Fonte: Noticias de Navarra
Os participantes no Simposio Internacional sobre Dereitos Lingüísticos celebrado en Barcelona constituíron a primeira Asociación Internacional de Comisarios de Lingua (IALC), que ten como obxectivo a defensa dos dereitos lingüísticos en todo o mundo.
Fonte: La Vanguardia
Subscríbase ao boletín
