Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Tribunal Supremo volveu avalar o uso do castelán como lingua vehicular na educación en Cataluña. Neste caso, débese ao recurso dos pais dunha nena de educación infantil que estudaba nun colexio concertado e para a que os seus proxenitores reclamaron o uso da súa “lingua habitual”.
Fonte: El País
O primeiro ministro do Reino Unido, David Cameron, declarou á volta dunha visita oficial a China que o alumnado británico debería deixar de estudar francés e alemán e aprender chinés. Ademais, afirmou que espera dobrar o número de auxiliares de conversa chineses nas escolas británicas antes de 2016 e incrementar os fondos para que os centros educativos poidan ofrecer o ensino do chinés mandarín.
Fonte: Daily Mail
Segundo fontes oficiais, Benin elaborou unha estratexia global para a introdución das linguas nacionais no sistema educativo formal.
Fonte: iciLome
O comisario da lingua irlandesa, Seán Ó Cuirreáin, anunciou a súa dimisión pola falta de compromiso real do Estado irlandés na protección dos dereitos dos falantes de gaélico.
Fonte: Independent
Un grupo de traballo do Goberno de Gales recomenda que as cidades de Bangor, Aberystwyth e Carmarthen se desenvolvan como "rexións urbanas" co fin de potenciar a rexeneración económica e a mellora das infraestruturas potenciando o uso da lingua galesa. O obxectivo é incrementar o número de falantes que adopten o galés como primeira lingua.
Fonte: Wales Online
A Consellería de Cultura, Educación e Ordenación Universitaria, en colaboración coa Fundación Rosalía de Castro, celebrou o acto de entrega de premios do certame audiovisual de dinamización lingüística “Imaxina Cantares!”.
Fonte: Xunta de Galicia
O Servizo de Éuscaro do Concello repartirá este ano 292 000 euros entre os 2515 donostiarras que realizan distintas actividades para a aprendizaxe do éuscaro. As subvencións van dirixidas non só a cursos de inverno en euskaltegis, senón tamén a grupos especiais para pais, comerciantes ou xubilados, para desempregados ou para inmigrantes.
Fonte: Diario Vasco
A Dirección Xeral de Política Lingüística do Departamento de Cultura da Generalitat de Cataluña, en colaboración co Consorcio pola Normalización Lingüística, ofrece cursos de catalán ao persoal da Axencia Estatal de Administración Tributaria a través da contorna de aprendizaxe Parla.cat.
O coñecemento da lingua maorí continúa retrocedendo en Nova Zelandia malia o incremento do número de neozelandeses que pertencen ao grupo étnico maorí. A porcentaxe de maorís que falan a lingua precolonial diminúe e isto pode ameazar a posición do idioma coma segundo máis falado do país insular.
Fonte: Nationalia
O ministro kuwaití de Comercio e Industria, Anas Al-Saleh, instou a todos os estados membros da Organización Mundial do Comercio a que recoñezan o árabe como lingua oficial da institución.
Fonte: Kuna
Subscríbase ao boletín
