O portugués será disciplina opcional no sistema de ensino de Namibia a partir do inicio de 2012 e Portugal formará docentes e achegará asistencia técnica aos novos profesores. Esta iniciativa responde á proximidade de países como Angola e Mozambique e ao crecente interese dos cidadáns namibianos na aprendizaxe da lingua portuguesa para poder relacionarse cos cidadáns destes países nos campos diplomático, empresarial ou cultural.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
21 de setembro de 2011
Air Canada debe mostrar un "compromiso claro" para cumprir coas súas obrigas á hora de dirixirse aos clientes nas dúas linguas oficiais de Canadá, subliñou un novo informe publicado polo organismo regulador de linguas. Grahan Fraser, comisario de linguas oficiais, engadiu que a compañía ten que adoptar 12 recomendacións para cumprir a lexislación en materia de linguas.
Fonte: Montreal Gazette
21 de setembro de 2011
O conselleiro de Educación e Ordenación Universitaria, Xesús Vázquez, e o reitor da Universidade de Santiago de Compostela, Juan J. Casares Long, asinaron un convenio de colaboración que lle permitirá ao Instituto da Lingua Galega continuar avanzando no desenvolvemento da súa actividade científica.
Fonte: Xunta de Galicia
21 de setembro de 2011
O responsable de Política Lingüística, Anxo Lorenzo, recibiu a estudantes polacos que están a aprender lingua, literatura e cultura galegas na Universidade de Varsovia, así como á súa profesora lectora de galego, Ana Garrido.
Fonte: Xunta de Galicia
20 de setembro de 2011
Presentouse ante o Goberno grego unha lei sobre a educación da lingua grega no estranxeiro que aspira a que se estableza unha conexión directa entre o financiamento e a calidade da educación para así acadar a máxima eficacia no ensino e difusión desta lingua.
Fonte: Greek Reporter
20 de setembro de 2011
En toda a República Federal de Alemaña existen máis de 150 escolas de ensino primario bilingües e esta cifra vai en aumento. Nestes centros, as linguas estranxeiras impártense non só aos nenos de familias emigrantes, xa que os alumnos alemáns tamén sacan proveito desta oferta bilingüe.
Fonte: Deutsche Welle
20 de setembro de 2011
Un estudo mostra que os empresarios buscan cada vez máis traballadores con competencias lingüísticas
Segundo unha enquisa realizada por Rosetta Stone, o 80 % dos profesionais directivos cre que é "moi" ou "sumamente" importante que os traballadores posúan competencias bilingües.
20 de setembro de 2011
Cómpre recordar que este ano o número de auxiliares nativos que chegarán ás aulas galegas ascende a 361, dos que 339 serán de conversa, 18 sénior e o resto froito duns convenios de colaboración asinados pola Consellería de Educación e outras entidades estranxeiras.
Fonte: Xunta de Galicia
20 de setembro de 2011
Ademais de Xornal.com, nas últimas datas pecharon outros medios de comunicación como Galicia Hoxe, o único diario impreso integramente en galego, así como o semanario A Nosa Terra, que tamén era editado en lingua galega. Outros proxectos de comunicación nesta lingua, pero editados en internet, tamén se foron pechando como o caso de Vieiros.
Fonte: Europa Press
20 de setembro de 2011
Os nenos eibarreses con idades comprendidas entre os 5 e 9 anos disporán, un ano máis, do programa ‘Afariketan’, que ofrece actividades lúdicas fóra do horario escolar para practicar o éuscaro.
Fonte: El Correo
Boletín
Subscríbase ao boletín
