Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno de Andorra aprobou as primeiras autorizacións de residencia e traballo onde será obrigatorio acreditar o coñecemento da lingua catalá. O executivo andorrano tamén revelou que a partir de xaneiro multará os comercios que non empreguen a lingua oficial.
Fonte: Diari de la Llengua
A Xunta propúxolles aos grupos parlamentarios actualizar o Plan de Normalización da Lingua Galega, vixente desde 2004, mediante sete grupos de traballo de especialistas que deseñen políticas lingüísticas a longo prazo. O conselleiro José López Campos subliñou a importancia dun pacto social para reforzar o uso do galego, especialmente entre a mocidade, persoas recentemente chegadas a Galicia e no ámbito tecnolóxico.
O uso do éuscaro está en retroceso nas zonas urbanas do País Vasco. Segundo Eustat, o 43,3 % da poboación utiliza esta lingua de maneira preferente ou exclusiva. En Vitoria, só o 2,5 % das persoas fala principalmente en éuscaro, mentres que en Bilbao esta cifra é do 3,6 %. En San Sebastián, a porcentaxe increméntase, xa que o 14,1 % da poboación emprega o éuscaro como lingua principal.
A plataforma Queremos Galego organiza un acto o vindeiro 17 de novembro baixo o lema «Mudemos o rumbo. Polo futuro do galego» en resposta aos datos sobre o uso e o coñecemento da lingua galega publicados polo IGE.
Fonte: Consello da Cultura Galega
O prazo para solicitar subvencións que fomenten o uso do éuscaro en comercios, hostalería e empresas remata o 31 de outubro. O concello ofrece axudas de ata o 60 % para deseñar sitios web, publicidade ou material como bolsas e facturas en éuscaro, cun máximo de 600 ou 360 euros, segundo o caso. Tamén subvencionan o 50 % dos rótulos externos e o 100 % do custo de programas informáticos en éuscaro, cun tope de 600 euros.
O eurodeputado luxemburgués Fernand Kartheiser, do Partido Reformista da Alternativa Democrática (ADR, polas súas siglas en luxemburgués), reivindicou cun discurso en lingua luxemburguesa o dereito da cidadanía de Luxemburgo de ver recoñecido o seu idioma como oficial na UE.
Fonte: Contacto
O Goberno de Francia quere acelerar a implementación de novos requisitos de coñecemento de francés para que as persoas estranxeiras obteñan a nacionalidade francesa.
Fonte: The Local
A CRTVG producirá 12 novos proxectos en galego, cunha achega de 300 000 euros. Estes contidos abranguen áreas diversas como divulgación, entretemento e cultura, e están deseñados para o ámbito dixital. Serán emitidos a través de plataformas como AGalega.gal e Xabarin.gal, dirixidos tanto ao público infantil como a audiencias máis específicas.
As universidades da Xarxa Vives adheríronse ao portal Compendium.cat, promovido polo Consello da Avogacía Catalá, co obxectivo de fomentar o uso e mellorar a calidade do catalán xurídico. A adhesión formalizouse nun acto na Universidade de Barcelona, no que se destacou o valor deste proxecto para incrementar a presenza do catalán na xustiza.
O secretario xeral da Lingua, Valentín García, achegouse a Chantada para acompañar a veciñanza na xornada de captación de voces galegas no marco do Proxecto Nós impulsado pola Consellería de Cultura, Lingua e Xuventude e que neste caso contou coa colaboración do concello lucense.
Subscríbase ao boletín
