A Deputación da Coruña reforza o seu apoio ao galego mediante dous convenios coa Mesa pola Normalización Lingüística e con Correlingua, cun investimento total de 60 000 euros. A colaboración garante a continuidade de «A liña do galego», servizo clave para protexer os dereitos lingüísticos e promover avances no uso social do idioma. Ademais, apoia o Correlingua, iniciativa educativa e reivindicativa que mobiliza a mocidade na defensa do galego e impulsa actividades ao longo do curso.

O pasado 30 de novembro de 2025, día de Santo André, a Lei de Linguas Escocesas recoñeceu oficialmente o gaélico e o scots como idiomas de Escocia. A lei permitirá, entre outras cousas, que as familias poidan solicitar escolas en gaélico na súa zona, e instaura “áreas de relevancia lingüística” para apoiar comunidades de falantes, como parte de medidas de promoción da lingua e revitalización cultural.

Fonte: Grand Pinnacle Tribune

A Confederación Estatal de Persoas Xordas (CNSE) presentou unha investigación pioneira que visibiliza as violencias específicas que sofren as mulleres xordas, con especial atención ás agresións lingüísticas e culturais, que condicionan a súa autonomía e dignidade. O estudo revela barreiras estruturais moi graves: dificultades para acceder a servizos básicos, falta de intérpretes en situacións críticas e procesos xudiciais pouco accesibles.