A novena edición da Feira das Linguas Indíxenas Nacionais celébrase en México do 8 ao 10 de agosto, co foco posto no liderado e na presenza das mulleres indíxenas na actualidade. O evento contará con actividades culturais e educativas en varias sedes da Cidade de México, con acceso gratuíto. Haberá espazos de diálogo, arte, cine, poesía e gastronomía, todo co protagonismo das linguas orixinarias.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
04 de agosto de 2025
04 de agosto de 2025
O Goberno balear impulsará este ano unha macroenquisa sobre os usos lingüísticos para actualizar os datos de 2014, cando xa se detectara unha diminución do uso social do catalán, e avaliar así o estado actual desta lingua no arquipélago. O estudo analizará variables como o coñecemento do idioma, a súa utilización habitual e a orixe das persoas entrevistadas, nun contexto de forte crecemento da poboación estranxeira.
04 de agosto de 2025
O Dicionario da Real Academia Galega incorpora os termos alfombreiro/a, auguista e lubre tras recibir propostas de diversas entidades e persoas vinculadas á cultura galega. A institución destaca a importancia destas achegas para enriquecer o léxico e manter actualizado este recurso en liña.
01 de agosto de 2025
Polonia incorporará oficialmente o ucraíno como segunda lingua estranxeira no currículo do ensino secundario para os cursos 7.º e 8.º, segundo anunciou a embaixada ucraína en Varsovia. Esta medida só se aplicará en circunstancias especiais.
Fonte: United24 Media
01 de agosto de 2025
A partir de 2026, Finlandia ofrecerá a posibilidade de cursar o ensino secundario superior en inglés, segundo establece unha nova reforma lexislativa. A medida busca atraer profesionais estranxeiros con familias e favorecer o regreso de finlandeses expatriados. Só poderá acceder a esta opción o alumnado cuxo coñecemento de finés e sueco sexa insuficiente.
Fonte: YLE
01 de agosto de 2025
O 1 de agosto conmemórase en Acerbaixán o Día do Alfabeto e da Lingua, instaurado en 2001 polo líder nacional Heydar Aliyev tras completarse a transición ao alfabeto latino. Esta efeméride constitúe un fito cultural e político para a independencia do país.
Fonte: Azer News
01 de agosto de 2025
A Unión Democrática para a Integración (DUI), partido da oposición do Goberno de Macedonia do Norte, denuncia que ningunha das reunións de goberno desde o mes de xuño foron publicadas en lingua albanesa, o que é unha violación grave da Lei de Uso de Linguas Oficiais e un acto de discriminación institucional contra o idioma e a cidadanía albanesa.
Fonte: Gazeta Express
01 de agosto de 2025
O Concello de Pamplona convoca o XXXV Certame literario en éuscaro para autoría novel nas modalidades de poesía e narrativa, dirixido a persoas nacidas ou residentes en Navarra. As obras deberán ser orixinais e inéditas, e poderán presentarse ata o 27 de outubro. O concurso reparte 9000 euros en premios.
01 de agosto de 2025
O Concello da Coruña impulsa o uso do galego nas aulas a través dos programas Falamos primaria e Falamos secundaria, que ofrecen concertos e obradoiros didácticos en centros públicos. A iniciativa, que se desenvolverá entre outubro e novembro de 2025, contará coa participación de diferentes artistas e divulgadores.
Fonte: Consello da Cultura Galega
01 de agosto de 2025
O Termcat acaba de incorporar 92 novos termos cataláns ao seu repertorio normativo, que abranguen ámbitos como as TIC, a zooloxía, a economía e a comunicación. Destacan os conceptos ligados á intelixencia artificial, os nomes das especies de morcegos e novas formas na linguaxe inclusiva e clara.
Boletín
Subscríbase ao boletín
