O Concello de Pamplona repartiu 118 000 euros en subvencións entre 18 entidades sen ánimo de lucro para desenvolver 29 proxectos de fomento e normalización do éuscaro. As actividades, abertas á cidadanía e centradas no termo municipal, deberán mellorar o uso, prestixio e competencia lingüística entre novembro de 2024 e outubro de 2025. A concesión valorou a traxectoria das entidades, a calidade das propostas e o seu impacto na promoción inclusiva e innovadora da lingua.

Fonte: Uruñeko Udala

O proxecto Xerrem Junts contará co apoio do Departamento de Política Lingüística para crear uns sesenta novos grupos de conversa e chegar a 2400 participantes. A iniciativa, activa desde 2007, ofrece espazos non formais onde persoas que aprenden catalán practican oralmente coa axuda de voluntariado. Actualmente existen uns 230 grupos en ámbitos diversos, presenciais e en liña, cunha metodoloxía adaptada a distintos niveis de coñecemento da lingua.

Fonte: Generalitat de Catalunya

Rematou a primeira tempada de En Ruta, un proxecto audiovisual de divulgación científica en catalán dirixido á mocidade e emitido en plataformas dixitais como YouTube, Instagram e TikTok. A serie percorreu diversas zonas de Cataluña para abordar temas científicos e ambientais e promover así o uso da lingua nun ámbito atractivo para as novas xeracións. A iniciativa enmárcase nas accións de Plataforma per la Llengua para reforzar a presenza do catalán nos espazos dixitais máis populares entre a xente nova.

Fonte: Plataforma per la Llengua

Plataforma per la Llengua denuncia que a maioría das emisoras privadas que operan en Cataluña continúan sen cumprir a cota legal do 25 % de música en catalán, a pesar do fin das exencións aprobado polo Consello do Audiovisual de Cataluña (CAC). Segundo un estudo da entidade, o tempo de emisión nesta lingua apenas supera o 7 % e moitas cancións difúndense fóra das horas de máxima audiencia.

Fonte: Diari per la Llengua

O Concello de Pamplona convoca o XXXV Certame Literario en éuscaro para autoría novel co obxectivo de promover a creación literaria nesta lingua. As persoas participantes deben nacer ou residir en Navarra e non ter máis dun libro individual publicado. O prazo de presentación remata o 27 de outubro de 2025. O certame inclúe as modalidades de poesía e narración, con premios de ata 2500 euros e varias mencións. Os textos deben ser orixinais, inéditos e de temática libre.

Fonte: Iruñeko Udala

A Escola Balear de Administración Pública iniciará o 23 de setembro os cursos de formación en catalán dirixidos ao persoal das administracións públicas. A oferta, enmarcada no Plan de Formación Lingüística 2025, inclúe 910 prazas en liña e 175 prazas presenciais para talleres orais en Mallorca, Menorca e Eivisa. As probas de nivel realizaranse en marzo de 2026. O obxectivo é reforzar a competencia lingüística e consolidar unha administración próxima á realidade sociolingüística do territorio.

Fonte: Última Hora

O Goberno Vasco e a organización NABO asinaron un acordo estratéxico para impulsar a ensinanza do éuscaro nas Euskal Etxeak dos Estados Unidos. A iniciativa, enmarcada no programa Euskara Munduan, busca formar docentes dentro das propias comunidades para garantir a transmisión do idioma sen depender de profesorado externo.

Fonte: Gobierno Vasco

O Ministerio de Xustiza trasladoulles aos xulgados das Illas Baleares a indicación de empregar unicamente os topónimos oficiais en catalán, como Eivissa, Maó ou Ciutadella, mesmo nos documentos redactados en castelán. A medida responde así a unha demanda histórica de entidades que defenden o uso do catalán e baséase na lexislación vixente, que recoñece estes nomes como os únicos legalmente válidos.

Fonte: Nou Diari

A Obra Cultural Balear acusa o Goberno do arquipélago de vulnerar a lexislación vixente ao suprimir na canle televisiva IB3 a opción de audio en catalán nas estreas cinematográficas, feito que considera un retroceso na normalización lingüística. A entidade reclama unha rectificación inmediata e lembra que a programación da televisión pública debe cumprir unha función social. Alertan de que sen contidos en catalán, a canle perde o seu sentido autonómico, nun panorama xa saturado de ofertas en castelán.

Fonte: Diari de la Llengua

Iniciativa pol Asturianu consolida a súa presenza na Feira Internacional de Mostras de Asturias 2025 cun espazo propio que reúne numerosas empresas que empregan o asturiano na súa actividade. A entidade busca amosar o potencial económico e social desta lingua, organizando tamén actos culturais e un día dedicado ao asturiano en homenaxe ao escritor Xuan Bello. Promóvese ademais unha campaña para captar persoas socias, entregando un dicionario como agasallo. O obxectivo é reforzar o prestixio do asturiano como motor de riqueza e identidade.

Fonte: La Voz de Asturias