España
A Universidade Jaume I fomenta o intercambio lingüístico
O Servizo de Linguas e Terminoloxía, a Oficina de Relacións Internacionais e o Voluntariado Lingüístico da Universidade Jaume I organizan unha nova edición do UJIllengües, unhas xornadas que terán como obxectivo compartir linguas e fomentar os intercambios lingüísticos.
Fonte: El Periodic
O Concello de Pamplona e Euskaltzaindia asinan un convenio para fomentar o uso do éuscaro na cidade
O Consistorio donará 12 000 euros durante este ano para axudar a Real Academia da Lingua Vasca a realizar actuacións que promovan o éuscaro entre a cidadanía e para mellorar a calidade no uso desta lingua.
Fonte: ABC
Xixón acollerá o 6 de outubro un concerto pola oficialidade da lingua asturiana
Un total de oito grupos actuará en Xixón o día 6 de outubro no Concerto pola Oficialidade, unha cita musical que cumpre trinta anos e que ten como obxectivo reivindicar a oficialidade da lingua asturiana.
Fonte: Europa Press
Organizacións de educación en éuscaro reclaman cambios lexislativos para que esta lingua sexa oficial en todo o territorio navarro
Sortzen e a Federación de Ikastolas de Navarra demandaron no Parlamento foral cambios na Lei do éuscaro, para superar a zonificación e conseguir a oficialidade desta lingua en todo o territorio.
Fonte: Noticias de Navarra
Comeza unha nova edición do Kastanya.cat, un proxecto para fomentar o catalán e o occitano a través da música
O pasado 21 de setembro comezaron as emisións dos sete programas de televisión que integran o proxecto Kastanya.cat 2018. Con esta iniciativa búscase fomentar o uso do catalán e do occitano a través da música, no marco da festa da Castanyada.
Fonte: Generalitat de Catalunya
Unha publicación analiza os resultados da enquisa de usos lingüísticos da poboación catalá de 2013
Este traballo constata que a inmigración chegada a Cataluña nos últimos anos fixo diminuír a porcentaxe de coñecemento inicial e de uso do catalán, ao tempo que se incrementaron os falantes de linguas diferentes ao castelán e ao catalán.
Fonte: Generalitat de Catalunya
Preséntase o Plan de dinamización lingüística de Menorca
Este novo Plan de dinamización lingüística pretende que se consolide o proceso de normalización do catalán na illa de Menorca. Supón ademais unha adaptación do anterior plan á situación actual desta lingua e aos cambios que sufriu a sociedade menorquina.
Fonte: Menorca
Piden que se recoñeza o dereito á oficialidade da lingua asturiana na reforma do Estatuto de Autonomía
A Xunta pola Defensa da Lingua Asturiana considera que unha reforma do Estatuto de Autonomía na que se inclúa a oficialidade servirá para recoñecer os dereitos lingüísticos e para garantir a supervivencia do asturiano.
Fonte: La Nueva España
O Consello de Mallorca convoca a X edición dos Premios Mallorca de Creación Literaria en catalán
Xa se convocou a X edición dos Premios Mallorca de Creación Literaria nas modalidades de Narrativa, Poesía e Ensaio en lingua catalá. A dotación económica destes galardóns en cada categoría ascende a 35 000, 25 000 e 30 000 euros respectivamente.
Fonte: MallorcaDiario
Convócanse cursos de catalán para o persoal do Servizo de Saúde das Illas Baleares
O Servizo de Saúde das Illas Baleares, xunto co Instituto de Estudos Baleares, organiza cursos gratuítos de catalán para o seu cadro de persoal. Estes cursos comezarán o 8 de outubro e rematarán a semana do 25 de xaneiro e impartiranse nos hospitais públicos.
Fonte: Salud Ediciones
Boletín
Subscríbase ao boletín
