O Concello de Cocentaina puxo en marcha unha campaña chamada Troballengua. Trátase dun directorio web que inclúe comercios e profesionais que utilizan o valenciano. O Consistorio entregaralles a uns 90 establecementos selos de calidade que indican que neles entenden os clientes que falan nesta lingua.

Fonte: Información

A Mancomunidade de Sakana organiza talleres de éuscaro para os monitores deportivos os días 7 e 8 de setembro. Estas actividades enmárcanse no proxecto Kirola euskaraz que ten como obxectivo impulsar o uso desta lingua no ámbito deportivo.

Fonte: Noticias de Navarra

Segundo a orde do Diario oficial da Comunidade, a Consellería de Educación prevé establecer como requisito lingüístico ter o nivel C1 de valenciano para o corpo de profesores e catedráticos das escolas oficiais de idiomas, as de Artes Plásticas e Deseño, de Música e Artes Escénicas.

Fonte: El Periódico Mediterráneo

O Concello de Orkoien ofrecerá actividades culturais e deportivas en éuscaro, tanto para persoas adultas, para as que haberá zumba, TRX ou ciclo indoor; como para os cativos, con pelota, natación... Así mesmo, ofertaranse actividades con grupos bilingües.

Fonte: Pamplona Actual

O Goberno de Navarra, a través de Euskarabidea, contratará para os vindeiros catro anos, por un importe de 860 000 euros, servizos de tradución do éuscaro ao castelán e viceversa.

Fonte: Navarra.com

Nesta edición do Premio Nel Amaro poderán participar obras de compañías profesionais que xa se estrearon, tanto en versión orixinal ou adaptadas noutras linguas.

Fonte: El Búscolu

O conselleiro vasco de Cultura recorda que un 70% do persoal da Administración ten un determinado nivel de éuscaro e o obxectivo e que o use no ámbito laboral.

Fonte: ABC

O pasado 18 de agosto celebrouse o I Día das Linguas de Estremadura co obxectivo de poñer en valor o patrimonio lingüístico desta comunidade. A esta cita acudiron representantes de colectivos defensores das diferentes modalidades lingüísticas estremeñas: o portugués, o 'extremeñu' e a fala.

Fonte: El Periódico de Extremadura

A comarca aragonesa do Bajo Cinca asinou un acordo co Departamento de Educación, Cultura e Deporte do Goberno aragonés, polo cal recibirá unha subvención de 5000 euros para financiar actividades de promoción e dinamización social e cultural da lingua catalá.

Fonte: Heraldo

O Goberno de Navarra destina unha serie de axudas para fomentar o uso do éuscaro na prensa escrita, as radios e os medios de comunicación en liña. Segundo o Instituto Navarro do Éuscaro, un total de 24 beneficiarios cumpren os requisitos para recibilas.

Fonte: La Vanguardia