España
O Concello de Xixón organiza un concurso para impulsar o uso do asturiano
A Oficina de Normalización Lingüística de Xixón organiza o concurso ‘Xixón Fala en 3’ que ten como obxectivo fomentar o emprego do asturiano sobre calquera temática.
Fonte: Asturies.com
Huesca acolle unha exposición para dar a coñecer o patrimonio lingüístico aragonés
A mostra “El aragonés, un patrimonio común” poderá verse en Huesca ata o vindeiro 3 de xaneiro, para logo trasladarse a outras localidades. Con esta exposición itinerante preténdese, por unha banda, dar a coñecer o pasado e o presente do aragonés e, por outra, fomentar o respecto e o recoñecemento da diversidade cultural e lingüística de Aragón.
Fonte: El Periódico de Aragón
A plataforma Mintzanet premia os usuarios que fomentan o uso do éuscaro
Mintzanet celebrou a quinta edición dos premios aos seus usuarios pola súa contribución ao uso do éuscaro. Este proxecto naceu hai cinco anos para promover o emprego desta lingua a través de internet. Trátase dunha plataforma gratuíta na que se poñen en contacto dúas persoas, unha que domina o éuscaro e outra que quere aprendelo ou melloralo. Así, unha vez á semana póñense en contacto por videoconferencia para falar nesta lingua.
Fonte: Diario Vasco
O Concello mallorquino de Valldemossa pon en marcha unha campaña para promover o catalán entre a poboación foránea
O Concello de Valldemossa puxo en marcha unha campaña para fomentar o uso do catalán entra a poboación foránea, que consiste en gravar 10 vídeos de persoas de orixe diversa que aprenderon esta lingua e que se integraron na sociedade mallorquina, converténdose así en referentes para os novos habitantes que chegan ao municipio.
Fonte: Diario de Mallorca
Nace Mastodon.eus, unha nova rede social para comunicarse en éuscaro
Mastodon.eus, unha nova rede social gratuíta creada por entidades de promoción do éuscaro para comunicarse nesta lingua, permite a publicación de mensaxes de ata 500 palabras e contidos multimedia, e non ten publicidade.
Fonte: Eitb.eus
O Parlamento do Principado rexeita unha iniciativa que permitiría a cooficialidade do asturiano
O Parlamento de Asturias rexeitou, cos votos en contra de PSOE, PP, Ciudadanos e Foro, unha iniciativa presentada por IU e Podemos para modificar o Estatuto de Autonomía do Principado e permitir así a cooficialidade do asturiano, que se equipararía deste xeito co castelán.
Fonte: El Comercio
A Deputación Foral de Biscaia recoñece o labor de 31 federacións deportivas por fomentar o uso do éuscaro
Un total de 31 federacións deportivas recibiu unha distinción de recoñecemento polo labor realizado nas súas respectivas disciplinas deportivas co obxectivo de incrementar a presenza e o uso do éuscaro neste ámbito.
Fonte: 20 minutos
O Goberno vasco traballa nun plan estratéxico para impulsar o éuscaro no ámbito socioeconómico
O Goberno vasco está a traballar na elaboración do Plan estratéxico do éuscaro no ámbito socioeconómico que está previsto estea finalizado a principios do ano 2019. Ao longo de 2018 estase a levar a cabo un proceso participativo para recoller achegas de diferentes organizacións ao proxecto.
Fonte: Gobierno Vasco
Institucións do País Vasco subscriben unha declaración con motivo do Día Internacional do Éuscaro
Representantes das institucións vascas subscribiron unha declaración, co gallo da celebración o vindeiro 3 de decembro do Día Internacional do Éuscaro, que leva por título ‘O éuscaro necesítanos en actitude activa e predisposta. Porque todos os días son euskaraldia’ coa que fan un chamamento á cidadanía para que se implique no impulso desta lingua.
Fonte: Gobierno Vasco
O Goberno vasco aproba unha subvención de 68 000 euros para a Mancomunidade de Municipios Euscaldúns
A Mancomunidade de Municipios Euscaldúns, coa axuda de 68 000 euros do Goberno vasco, impulsará catro proxectos de fomento do éuscaro promovidos polo programa anual desta mancomunidade.
Fonte: 20 minutos
Boletín
Subscríbase ao boletín
