Coalición por Melilla (CPM), principal partido da oposición e de maioría musulmá, reiterou a súa proposta de promoción e aprendizaxe do tamazight, lingua milenaria de orixe bérber, para acabar coa alta porcentaxe de fracaso escolar que se dá na cidade autónoma.

Fonte: Infomelilla

O Departamento de Educación vasco, que encabeza Tontxu Campos, de EA, decidiu comezar a aplicar este curso o novo sistema de exencións de estudar éuscaro, moito máis restritivo que o que estaba en vigor ata o momento. O problema é que se tomou esta decisión cando o curso xa comezara e arredor de 8000 alumnos xa se matricularan baixo as pautas do sistema anterior, polo que estaban eximidos totalmente cada ano do estudo e da avaliación da lingua vasca.

Fonte: El País

Aragón é trilingüe. Ademais do catalán falado na franxa oriental, a denominada de Ponent, e o castelán, utilizado en todo o territorio, en boa parte da provincia de Huesca e nun reducido número de municipios de Zaragoza fálase aragonés. Esta lingua, falada como máximo por unhas 24.000 persoas, sobrevive en diversos vales pirenaicos sen recoñecemento oficial ningún.

Fonte: Avui

Entre un 15 e un 20 % das 2520 prazas que Osakidetza sacará na oferta pública de emprego (OPE) de 2008 (os exames celebraranse a finais de marzo e a principios de abril do próximo ano) terá como requisito imprescindible o coñecemento do éuscaro. Esta é a previsión coa que traballa a dirección do Servizo Vasco de Saúde, que ultima estes días cos sindicatos as bases da convocatoria. Para o resto das prazas a concurso o coñecemento do éuscaro avaliarase como un mérito.

Fonte: El País

O acabado de crear Instituto de las Culturas propúxose impulsar a impartición e o coñecemento da lingua e cultura tamazight. Por iso, o seu responsable, o conselleiro de presidencia Abdelmalik El Barkani, mantivo contactos coa Universidad Nacional de Educación a Distancia, logrando o que cualificou de "magnífica noticia".

Fonte: Diario Sur

Torrelavega é o único lugar de Cantabria onde se pode aprender 'cántabru' ou 'montañés'. Acurrie Pola Lingua Cántabra (Academia Popular da Lingua Cántabra) organiza todos os anos un curso para que non se perda o que eles consideran idioma que se utilizaba nesta rexión desde hai moitos séculos e cuxos restos «aínda perduran» en vales do interior, especialmente na Vega de Pas.

Fonte: El Diario Montañés

Caja Laboral e a emisora Euskalerria Irratia destacaron polo seu compromiso co éuscaro, pola súa contribución a normalizar o seu emprego na rúa, no trato coas empresas e no espectro radiofónico.

Fonte: Diario de Navarra

A Academia da Lingua Vasca e o Concello de Bilbao asinaron un convenio de colaboración co que pretenden impulsar o uso social e mellorar a calidade do éuscaro que se fala na vila. Segundo o acordo que selaron o alcalde e o presidente de Euskaltzaindia, Andrés Urrutia, a capital biscaíña apoiará economicamente a Euskaltzaindia a cambio de asesoramento lingüístico nos diferentes servizos municipais, especialmente en todo o referente á nomenclatura viaria e toponimia urbana.

Fonte: El Correo Digital

O Sindicato Médico de Baleares fixo pública a súa oposición ao proxecto de decreto do catalán e presentou ante a Xunta de Persoal do Ib-Salut un documento para que sexa debatido por todos os sindicatos presentes e se poida alcanzar unha postura conxunta.

Fonte: Mallorca Diario

O galego é o terceiro idioma máis falado no País Vasco, despois do castelán e do vasco, segundo manifestou Xosé Estévez, profesor da Universidade de Deusto, nun acto organizado na cidade pola Fundación Galiza Sempre.

Fonte: La Voz de Galicia