O Concello de Xàbia, a través da Unidade de Residentes Europeos da Deputación de Alacante, organizou un curso gratuíto de castelán para axudar a ese colectivo a aprender o idioma e promover así a integración dos residentes comunitarios.

Fonte: Las Provincias

A presidenta do Tribunal Superior de Xustiza de Cataluña, Maria Eugènia Alegret, considera que a Carta Europea das Linguas Rexionais ou Minoritarias (con rango de lei no Estado) non é garantía legal suficiente que ampare o uso normalizado do catalán no ámbito da Administración de Xustiza, e reclama unha reforma legal para "recoñecer este dereito de forma definitiva".

Fonte: Avui

O efecto bolboreta pode aparecer nas aulas murcianas por unha "falta de previsión" da Consellería de Educación, segundo o sindicato de profesores ANPE. A implantación de inglés e francés en todos os cursos de primaria e secundaria "e a falta de previsión da Consellería provocou que non haxa suficientes profesores interinos de inglés, francés e audición e linguaxe para cubrir as necesidades dos centros educativos", segundo fontes do sindicato de ensino.

Fonte: La Verdad

O conselleiro de Educación da Generalitat de Valencia, Alejandro Font de Mora, afirmou que a nova versión de LliureX impulsada polo seu departamento porá a disposición do profesorado do sistema educativo os laboratorios de idiomas, unha nova ferramenta pedagóxica que permitirá mellorar o coñecemento de idiomas e que se enmarca no esforzo por potenciar o plurilingüismo e o impulso da aprendizaxe do inglés.

Fonte: XornalGalicia.com

En Cataluña aínda se prohibe o uso público do catalán. Polo menos, iso é o que pensa Miquel Pérez Latre, un dos invitados ás xornadas celebradas en Terrassa "El fil de la innovació", organizadas pola Asociación de Colectividades Téxtiles Europeas (ACTE), o Concello e a Deputación no Museo da Ciencia. O obradoiro dedicado ao tema "Innovar en patrimonio: a experiencia de TWINTEX" debía debater sobre os obxectivos comúns e realizacións deste grupo de cidades con museos téxtiles. O moderador realizou a presentación en castelán e houbo relatorios en italiano e castelán, ademais de en inglés e portugués.

Fonte: Avui

A promoción da lingua e a cultura chinesas será o principal obxectivo do acabado de crear Instituto Confucio da Universidade de Granada, o primeiro que existe en Andalucía e que desenvolverá actividades como cursos de caligrafía, aprendizaxe de tai-chi ou clases de preparación para o exame oficial de idioma que esixe o Ministerio de Educación chinés.

Fonte: Europa Press

A Confederación Estatal de Persoas Xordas (CNSE) pediu "que se acelere" a posta en marcha da Lei das linguas de signos, coincidindo co aniversario da aprobación da norma que recoñece as linguas de signos españolas no país e regula os medios de apoio á comunicación oral das persoas xordas, con discapacidade auditiva e xordocegas.

Fonte: Europa Press

A Escola Universitaria de Maxisterio da Universidade de Valencia esixirá a partir do curso 2009-2010 coñecementos de idiomas aos alumnos que desexen obter o título de Mestre en Educación Infantil ou en Educación Primaria.

Fonte: El Mundo

O Sindicato Médico Libre de Baleares (Simebal) convocou unha manifestación o próximo día 6 de novembro, a partir das 17.30 horas, fronte ao Consolat de Mar, para expresar o rexeitamento dos traballadores do Servizo de Saúde ao borrador de decreto que regula a esixencia de coñecementos de lingua catalá nos procedementos selectivos.

Fonte: Diario de Mallorca

A lingua de uso do alumnado é un condicionante de peso nos resultados escolares. Un informe da Fundación Jaume Bofill, baseado nas conclusións do estudo europeo PISA 2006, revela que os estudantes que falan castelán nas súas casas (un 59 % do total do alumnado) obteñen peores resultados que os que falan catalán.

Fonte: ABC