A Consellería de Desenvolvemento Educativo e Formación Profesional de Andalucía presentou a reedición do Vocabulario andaluz de Antonio Alcalá Venceslada, que se distribuirá nos centros educativos da comunidade. O obxectivo é achegarlle a fala andaluza ao alumnado e reivindicar e valorar a súa identidade e riqueza sen complexos.

Fonte: El Diario

As bibliotecas catalás prestaron 11,4 millóns de libros en 2023, con máis da metade en catalán (52 %) fronte a un 45,7 % en castelán. A clave desta alta presenza do catalán atópase no préstamo de libros infantís e xuvenís, que dobran os de castelán desde 2019.

Fonte: Diari de la Llengua

A Universidade de Barcelona desenvolverá un sistema de transcrición en tempo real, chamado SCRIBAL, baseado en intelixencia artificial, para mellorar a accesibilidade na docencia en catalán. Este proxecto, que facilitará a transcrición de clases e conferencias, está deseñado para apoiar o alumnado con discapacidades auditivas e o que non domina a lingua de instrución. O sistema tamén se adapta aos diferentes dialectos do catalán e incorpora unha perspectiva de xénero nas súas bases de datos, o que mellorará a precisión das transcricións. O prototipo probarase nas aulas da universidade para validar a súa efectividade.

Fonte: Diari de la Llengua

A Universidade de Alacant (UA) e a Academia Valenciana da Lingua (AVL) asinaron un convenio para a creación dunha base de datos que permitirá xerar os mapas do Atlas Lingüístico Valenciano, obra de Jordi Colomina. Este proxecto, que contará con mapas dixitais para mostrar a variación fonética e léxica do valenciano, rematará en 2028 e ofrecerá datos valiosos para estudos dialectolóxicos e lingüísticos.

Fonte: Universitat d'Alacant

As entidades 3Cat, AMIC e Fundació.cat crearon os Premis Crit, que buscan recoñecer a creación de contidos en catalán nas redes sociais e plataformas dixitais. O obxectivo é profesionalizar o sector e favorecer o uso desta lingua no ámbito dixital. Inclúen varias categorías, como humor, arte e gastronomía, e o premio ao mellor vídeo do ano será elixido polo público.

Fonte: Diari de la Llengua

O Concello de Pamplona e a Real Academia da Lingua Vasca-Euskaltzaindia asinaron un convenio polo que se lle concederán 12.000 euros para apoiar o asesoramento lingüístico e a difusión das publicacións da institución no ano 2025. A axuda destinarase ao mantemento da delegación en Pamplona e a prestación de servizos, así como á organización de actividades culturais e formativas en éuscaro.

Fonte: Iruñeko Udala

O estudo realizado en Tolosa en 2024 confirma que a metade das conversas nas rúas son en éuscaro, o que significa que esta lingua mantén unha tendencia estable de revitalización. A medición mostrou que este idioma supera o castelán por sexto ano consecutivo, especialmente entre a mocidade e a infancia. Desde 1985, o seu uso aumentou máis de 20 puntos e é a lingua principal nas rúas da cidade.

Fonte: Tolosako Udala

As cooperativas de Lea Artibai e Busturialdea reuníronse en Euskoopaldia, un encontro destinado a compartir experiencias sobre cooperativismo e a promover o uso do éuscaro no ámbito socioeconómico. Durante a xornada abordaron retos comúns, coñeceron os proxectos de cada entidade e reforzaron a colaboración mutua, ao tempo que amosaron o seu compromiso coa normalización lingüística nas súas comarcas.

Fonte: TULankide

A Universidade de Barcelona celebrará por cuarto ano consecutivo o ciclo Maig Aranès, un programa de actividades e conferencias orientado a dar a coñecer a lingua e a cultura do Val de Arán. O ciclo, dirixido ao alumnado e ao público en xeral, inclúe concertos, conferencias e unha clase aberta de aranés, e enmárcase nas accións de promoción desta lingua no ámbito universitario, co apoio da Generalitat de Cataluña.

Fonte: Generalitat de Catalunya

Un novo estudo, coordinado por docentes das universidades do País Vasco e de Navarra, analiza vinte linguas illadas de todo o mundo, entre elas o éuscaro, co obxectivo de estudar os seus trazos comúns e a súa evolución histórica. A obra desmonta mitos sobre estas linguas, demostrando que non son máis antigas nin máis complexas ca outras e que, malia careceren de parentesco coñecido, funcionan de xeito semellante ao resto dos idiomas.

Fonte: Universidad del País Vasco