España
O Instituto de Estatística de Cataluña publica novos datos sobre a Enquisa de usos lingüísticos de 2023
O Instituto de Estatística de Cataluña (Idescat) publicou máis resultados da Enquisa de usos lingüísticos da poboación do ano 2023. Os novos datos permiten analizar como se inicia e mantén o uso das linguas nas conversas, as preferencias sobre que linguas se deberían falar no futuro e as opinións sobre a unidade do catalán. Por exemplo, grazas a esta análise, sábese que máis do 70 % da poboación adapta a súa lingua á do interlocutor, xa sexa cara ao catalán ou ao castelán.
Fonte: Generalitat de Catalunya
Crean unha plataforma dixital que agrupa ferramentas en catalán
Galàxia é unha nova plataforma que reúne máis de 250 ferramentas dixitais dispoñibles en catalán, grazas á colaboración de Accent Obert e Softcatalà. A iniciativa busca facilitar o uso da lingua no ámbito tecnolóxico e achegar opcións prácticas ás persoas usuarias.
Fonte: Diari de la Llengua
A música en valenciano conquista o público do Feslloc
O festival Feslloc celebrou unha nova edición onde a música en valenciano foi protagonista, cunha asistencia masiva de público e actuacións que puxeron en valor a lingua propia e a cultura local. O evento reivindicou o papel da música como ferramenta de transformación social.
Fonte: Diari de la Llengua
Un sitio web ofrecerá información turística en cinco linguas sobre o leste da provincia de Málaga
A Mancomunidade de localidades da Costa do Sol Oriental-Axarquía de Málaga anunciou o lanzamento do sitio web Auxarquia Tourism que incluirá información turística da zona en inglés, francés, alemán, italiano e español.
Fonte: SUR in English
Preséntase a primeira tradución de «O Principiño» ao sanabrés
A editorial Libros desde Tuma publica El Principicu, primeira tradución de O Principiño ao sanabrés, nunha edición que segue a súa variante máis aceptada, de acordo coa gramática da asociación Furmientu, e utiliza as normas ortográficas da Academia da Lingua Asturiana. A obra, traducida por Xuan X. Lajo e Daniel Boyano, busca revitalizar esta variedade do asturleonés, hoxe en retroceso.
Fonte: Zamora News
Unha moción demanda que a nova canle de RTVE en catalán poida retransmitirse nas Illas Baleares
A asociación Plataforma pola Lingua iniciou unha moción para que a nova canle da RTVE en catalán poida emitirse tamén nas Illas Baleares. A entidade denuncia que limitar esta oferta só a Cataluña vulneraría os dereitos dos falantes e constituiría un menosprezo para a unidade da lingua.
Fonte: dBalears
A Consellería de Educación de Asturias ultima os trámites para ofertar a lingua asturiana no segundo ciclo de infantil
A Consellería de Educación do Goberno de Asturias quere implantar o ensino da lingua asturiana no segundo ciclo de infantil para o curso que entra.
Fonte: La Nueva España
Unha liña de subvencións promoverá a subtitulación en catalán nas salas de cinema comerciais
O Departamento de Política Lingüística da Generalitat de Cataluña abriu por primeira vez unha liña de axudas para promocionar a subtitulación de longametraxes en catalán nas salas comerciais de cinema.
Fonte: Generalitat de Cataluña
O Concello de Valencia prosegue coa súa intención de mudar a denominación oficial da cidade
O Concello de Valencia anunciou que xa recibiu o informe que avala o cambio de denominación oficial da cidade. Agora pasaría a chamarse Valéncia-Valencia.
Fonte: Diari de la Llengua
A Generalitat de Cataluña moderniza o sistema informático para a xestión de convocatorias de probas de coñecemento de lingua catalá
O Departamento de Política Lingüística da Generalitat de Cataluña iniciou o desenvolvemento dun novo sistema informático da xestión de probas de certificación dos coñecementos de lingua catalá. O novo sistema suporá un avance significativo na xestión das convocatorias de probas futuras.
Fonte: Generalitat de Catalunya
Boletín
Subscríbase ao boletín
