O Departamento de Política Lingüística de Cataluña convoca por segundo ano bolsas destinadas a apoiar persoas creadoras de contido audiovisual en catalán ou en occitano. As axudas buscan aumentar a presenza destas linguas nas redes sociais e favorecer a profesionalización do sector. Cada persoa beneficiaria deberá crear unha serie de dez vídeos, de cinco minutos como mínimo, que se difundirán en plataformas dixitais.

Fonte: Generalitat de Catalunya

A Real Academia Española organiza un datatón en liña, do 23 ao 30 de abril de 2025, co obxectivo de mellorar o sistema automático de clasificación das consultas lingüísticas do proxecto Lingua Española e Intelixencia Artificial (LEIA). A actividade está dirixida a estudantes de Filoloxía Hispánica e a especialistas en lingua, que deberán categorizar preguntas segundo diferentes criterios lingüísticos e contribuír así a adestrar a intelixencia artificial que xestiona as consultas á RAE.

Fonte: RAE

O Goberno vasco considera prioritario promover o acceso ao éuscaro das persoas inmigrantes, pola súa importancia na cohesión social e no futuro demográfico. A través do programa AISA, ofrece cursos de acollida en éuscaro de balde, nos que o número de participantes aumentou un 10 % no último ano. Ademais, ampliou a gratuidade nos cursos de nivel A1, o que favoreceu un incremento do 20 % no alumnado.

Fonte: Gobierno Vasco

Seis clubs deportivos de Galdakao incorporaron novos compromisos para promover o uso do éuscaro entre a mocidade, no marco do proxecto municipal ‘Kirolean be bai’. Logo dun diagnóstico e sesións de sensibilización, cada entidade definiu accións adaptadas como entrevistas en éuscaro, redes sociais bilingües ou participación en Euskaraldia. A iniciativa confirma o deporte como ferramenta eficaz para avanzar na normalización lingüística desde a base social.

Fonte: Radio Popular

O Goberno do Principado de Asturias defendeu no Parlamento a oficialización do asturiano e do eonaviego como unha medida imprescindible para garantir a continuidade destas linguas propias. A proposta, impulsada por tres grupos parlamentarios, carece aínda dos apoios suficientes para saír adiante.

Fonte: Infobae

A Deputación de Valencia e a Academia Valenciana da Lingua (AVL) están explorando novas vías de colaboración para impulsar o uso do valenciano. Ambas as entidades coincidiron na importancia de protexelo como elemento de cohesión social e non de separación.

Fonte: El Periòdic

A Consellería de Educación iniciou unha nova campaña para fomentar a matriculación en asturiano e eonaviego en centros públicos para o próximo curso. A campaña, que se desenvolverá en tres fases, busca destacar os beneficios destas linguas nas distintas etapas educativas e a súa relación coa identidade cultural de Asturias. A promoción difundirase a través de medios impresos, dixitais e redes sociais e complementarase coa repartición de materiais informativos nos centros educativos.

Fonte: Principado de Asturias

O obxectivo da convocatoria de subvencións para entidades sen ánimo de lucro en Pamplona, que conta cunha dotación de 118 000 euros, é promover, difundir e normalizar o uso do éuscaro. As actividades deberán estar orientadas á mellora do uso e a competencia lingüística do éuscaro, realizarse no municipio entre novembro de 2024 e outubro de 2025 e estar abertas á cidadanía. As subvencións financiarán entre o 35 % e o 70 % do balance aceptado, cun límite de 22 000 euros por entidade. A valoración basearase en criterios como a continuidade da entidade, a calidade da proposta e a incidencia no uso do éuscaro na cidade.

Fonte: Ayuntamiento de Pamplona

A undécima edición do programa "Gazte Sortzaileak" abre o prazo de inscrición para mozas e mozos de entre 16 e 35 anos que desexen desenvolver propostas artísticas en éuscaro. O programa ofrece asesoramento profesional e axudas de ata 4000 euros para a realización de proxectos culturais, como teatro, música, poesía, bertsolarismo ou audiovisuais.

Fonte: Ayuntamiento de Vitoria-Gasteiz

Behatokia, o Observatorio dos Dereitos Lingüísticos, presentou o seu informe sobre a situación dos dereitos lingüísticos en 2024. Destaca que recibiu 1206 mensaxes no último ano, das que 1112 foron queixas, principalmente dirixidas a organismos públicos. A maior parte delas afecta ao uso do éuscaro en ámbitos como a sanidade e a xustiza. A organización chamou a cidadanía a denunciar as vulneracións e lamentou a perpetuación da supremacía do castelán e o francés, que dificulta o acceso a servizos en éuscaro.

Fonte: EITB