O 15 de maio deu comezo unha nova edición de Euskaraldia, coa participación de milleiros de persoas que buscan modificar os seus hábitos lingüísticos e reforzar o uso do éuscaro. Durante once días, as persoas participantes levarán unha chapa que identifica o seu rol para fomentar conversas inclusivas e naturais en éuscaro en espazos cotiáns.

Fonte: Radio Popular

Un total de 17 712 persoas inscribíronse nas probas para certificar o seu nivel de éuscaro, o que supón un incremento sostido nos últimos anos. As políticas de gratuidade impulsadas polo Goberno vasco contribuíron a aumentar significativamente as matrículas nos niveis A1 e C1, especialmente entre a mocidade. Estes datos evidencian un interese social crecente pola aprendizaxe e o uso do éuscaro como ferramenta de integración, cultura e oportunidades laborais.

Fonte: Gobierno Vasco

O Goberno catalán e diversas entidades políticas e sociais subscribiron o Pacto Nacional pola Lingua Catalá, un acordo que fixa 2030 como horizonte para traballar a prol do idioma. Establécense nove liñas estratéxicas que abarcan todos os ámbitos da sociedade, desde a educación e o traballo ata a cultura e a administración. Xa se activaron accións inmediatas para 2025, entre elas campañas de acollida, plans formativos e incentivos ao uso do catalán.

Fonte: Generalitat de Catalunya

O profesorado recoñece avances no ensino do asturiano, mais considera que a oficialidade sería o paso decisivo para asegurar o futuro desta lingua. Como exemplos positivos, no IES David Vázquez Martínez de Llaviana, 120 estudantes elixiron o asturiano como optativa, unha das cifras máis altas nesta etapa educativa. Pola súa banda, na escola de Carbayín, todo o alumnado cursa esta materia.

Fonte: RTPA

A Consellería de Educación da Comunidade Valenciana elaborou un modelo orientativo para proporcionarlles axuda aos centros educativos para organizar a proporción de linguas vehiculares segundo a nova Lei de liberdade educativa. O documento propón exemplos de distribución por niveis e zonas lingüísticas, mantendo unha estrutura flexible que cada centro deberá adaptar.

Fonte: Generalitat Valenciana

O TERMCAT incorporou ao seu banco terminolóxico un conxunto de termos vinculados á intelixencia artificial, co que quedan fixadas as súas formas en catalán. O proxecto, que conta coa colaboración de persoas expertas neste ámbito, culminará cun dicionario en liña previsto para o outono.

Fonte: Generalitat de Catalunya

Un xulgado de Xixón, tras estimar un recurso presentado en outubro,  anulou o Plan de normalización lingüística municipal ao considerar que o presentaba múltiples irregularidades legais. A sentenza sinala deficiencias como a falta de informes obrigatorios, ausencia de consulta pública e omisións na tramitación e publicación do plan, polo que declara a súa nulidade.

Fonte: La Voz de Asturias

Un grupo de veciños da Franxa puxo en marcha Lo Pregó de la Franja, un medio dixital en catalán que busca dar voz a este territorio historicamente ignorado nos medios e promover o uso da lingua catalá. A iniciativa, nacida o 23 de abril, aposta pola diversidade dialectal e procura visibilizar a realidade local máis alá da cuestión lingüística.

Fonte: Diari de la Llengua

Oito entidades catalás únense para lanzar o #repte21dies, unha campaña que convida a usar exclusivamente o catalán durante 21 días, co obxectivo de consolidar este hábito e frear o costume de mudarse ao castelán. A iniciativa, que decorrerá do 12 de maio ao 1 de xuño, busca fortalecer a autoestima lingüística das persoas falantes desta lingua e promover unha actitude colectiva de afirmación, sen renunciar á cortesía nin á convivencia.

Fonte: Ara

O proxecto Éxodo, de Nitya López, recibiu a axuda do Festival FANT de Bilbao para a produción de curtametraxes en éuscaro, dotada con 5000 euros. Esta iniciativa, que celebra a súa segunda edición, reafirma o seu compromiso coa creación audiovisual nesta lingua no ámbito do cinema fantástico.

Fonte: Ayuntamiento de Bilbao