España
Unha campaña denuncia as barreiras lingüísticas que afrontan as persoas xordas
A Confederación Estatal de Persoas Xordas (CNSE) lanzou unha campaña audiovisual para visibilizar as barreiras que as persoas xordas afrontan cando non teñen acceso á súa lingua natural. Con motivo do Día Nacional das Linguas de Signos Españolas, a campaña destaca como a falta de accesibilidade lingüística en áreas como o traballo, a sanidade e a educación xera exclusión e discriminación. Por iso, reivindica o recoñecemento das linguas de signos como un dereito fundamental e esixe medidas para mellorar a súa presenza en servizos públicos e no patrimonio cultural.
Fonte: Servimedia
A Generalitat de Cataluña convoca axudas para a incorporación do catalán, o occitano e a lingua de signos catalá ás plataformas dixitais
O Departamento de Política Lingüística abriu o prazo para solicitar subvencións dirixidas á incorporación do catalán, o occitano e a lingua de signos catalá en longametraxes e series nas plataformas dixitais. O obxectivo é aumentar a oferta audiovisual nestes idiomas, incluíndo dobraxe, subtitulación e audiodescrición. Este ano, a dotación inicial é de 1,6 millóns de euros, que poderá ampliarse segundo a demanda.
Fonte: Generalitat de Catalunya
O Goberno navarro e Eusko Ikaskuntza renovan o seu convenio de colaboración para impulsar o éuscaro en Navarra
Este convenio de colaboración ten como obxectivo promover o estudo e o fomento do éuscaro. O acordo, cun orzamento de 60 000 euros, financiará proxectos como "EzBerdin Berdinak", que reflexiona sobre a identidade vasca, e "Elkarbizitzarako zubiak Nafarroan", centrado na convivencia intercultural. Ambos proxectos buscan fortalecer a transmisión cultural e fomentar o diálogo entre as diversas comunidades, especialmente en relación co éuscaro e a identidade de Navarra.
Fonte: Gobierno de Navarra
Ponse en marcha unha campaña para que os concellos de Cataluña lles pidan aos municipios cos que están irmandados apoio á oficialidade do catalán na UE
Plataforma per la Llengua iniciou unha campaña para que os concellos cataláns envíen cartas aos seus municipios irmáns en varios países europeos para pedirlles apoio á oficialidade do catalán. A iniciativa busca sensibilizar os gobernos de Austria, Alemaña, Italia, República Checa, Suecia, Finlandia e Croacia e animalos a non poñer obstáculos á lingua.
Fonte: El Nacional
O persoal da Ertzaintza recibirá formación de capacitación lingüística
O Consello de Goberno aprobou un acordo de xestión entre a Academia Vasca de Policía e Emerxencias e o Instituto de Alfabetización e Reeuscaldunización de Adultos (HABE) para ofrecer formación en éuscaro ao persoal da Ertzaintza e ao alumnado do curso de ingreso para a Categoría de Axente. O acordo, cun orzamento de 1,1 millóns de euros para 2025, prevé a impartición de cursos en varios centros, ademais do seguimento e avaliación das persoas participantes.
Fonte: Gobierno Vasco
Futbolistas do FC Barcelona convértense en referentes do catalán no deporte
Cada vez máis futbolistas do FC Barcelona usan o catalán en público, feito que contrasta co retroceso social da lingua en Cataluña. O club promove activamente o seu uso entre xogadores e xogadoras, ofrece formación voluntaria e integra o catalán como idioma oficial nas súas estruturas. Exemplos como Lamine Yamal ou Aitana Bonmatí teñen un forte impacto simbólico e educativo.
Fonte: Diari de la Llengua
Rexístrase unha proposta no Congreso para que o asturiano se inclúa no currículo das escolas oficiais de idiomas
Sumar presentou no Congreso unha proposta para incorporar o asturiano ao currículo das Escolas Oficiais de Idiomas, co fin de promover unha maior diversidade cultural e lingüística no ensino. A iniciativa require a modificación do Real Decreto de 2017 para permitir a docencia e a certificación desta lingua en todo o Estado.
Fonte: RTPA
O Parlamento de Navarra mostra o seu apoio á oficialización do galego, o catalán e o éuscaro na UE
O Parlamento de Navarra aprobou instar a Unión Europea a recoñecer como oficiais o éuscaro, o catalán e o galego, resaltando a importancia de reflectir a diversidade lingüística europea. A proposta busca garantir a presenza destas linguas nas comunicacións e documentos oficiais da UE.
Fonte: Pamplona Televisión
O 75 % da poboación de Menorca móstrase preocupada pola situación do catalán
En total, tres de cada catro residentes amosan preocupación polo retroceso do uso social do catalán, o que sitúa a Menorca como a illa das Baleares con maior desasosego respecto á súa lingua. Aínda que o catalán segue sendo a lingua maioritaria en Menorca, tanto no ámbito familiar como noutros espazos sociais, persiste a inquietude polo seu futuro.
Fonte: Menorca
A matrícula no nivel A2 nos euskaltegis será gratuíta a partir do vindeiro curso
A partir do vindeiro curso, as persoas que se matriculen no nivel básico A2 dos euskaltegis poderán facelo practicamente de xeito gratuíto, unha medida que forma parte da política de gratuidade impulsada polo Goberno vasco, que xa mostrou os seus efectos positivos ao incrementar as matriculacións nun 20 % no nivel A1 e un 73 % entre as persoas de 16 a 18 anos no nivel C1. A iniciativa tamén busca fortalecer o coñecemento e uso do éuscaro en diversos ámbitos sociais e laborais.
Fonte: Gobierno Vasco
Boletín
Subscríbase ao boletín
