España
Os concellos de Tolosaldea organizan unha campaña para poñer os apelidos en éuscaro
En Tolosaldea, os municipios e axentes sociais iniciaron a campaña ‘Abizenak ere euskaraz’ para cambiar a grafía dos apelidos ao éuscaro en documentos oficiais. A modificación, que require un proceso administrativo sinxelo, busca avanzar na normalización do idioma e fomentar o seu uso nas administracións.
Fonte: Tolosako Udala
Actualízase o dicionario dos deportes elaborado polo Termcat
O Diccionari general de l’esport actualizouse este ano con 208 termos novos, cos que alcanzou un total de 11 893, e a modificación de 88 termos xa existentes. Os novos termos proceden de diversas fontes e con eles búscase manter ao día a terminoloxía deportiva en catalán e garantir o acceso á súa consulta, tamén en liña.
Fonte: Generalitat de Catalunya
O Goberno de Canarias estuda a orixe das antigas linguas do arquipélago a través da toponimia
A Dirección Xeral de Cultura e Patrimonio Cultural realizou un estudo pioneiro que compara as linguas canarias antigas coas linguas amazigh do continente africano. A investigación analiza a toponimia amazigh das Canarias, especialmente os termos anatómicos relacionados co corpo humano, e revela vínculos históricos coas comunidades amazigh do norte de África. Este traballo contribúe á recuperación do léxico das linguas amazigh desaparecidas no arquipélago e amplía o coñecemento sobre o patrimonio lingüístico das illas.
Fonte: Gobierno de Canarias
Valentín García participa nos actos do Día do galego no Bierzo afianzando a proxección exterior da lingua
O secretario xeral da Lingua, Valentín García, participou hoxe en diversos actos incluídos na programación do Día do galego no Bierzo, no marco do protocolo de colaboración entre a Xunta de Galicia e o Goberno castelán-leonés para potenciar os estudos da cultura e lingua galegas nos territorios limítrofes como son o Bierzo e Sanabria.
Fonte: O Portal da Lingua Galega
A oferta de éuscaro nas escolas infantís de Pamplona incrementarase nos próximos tres anos
O Concello de Pamplona aprobou ampliar a oferta de prazas en éuscaro nas escolas infantís municipais do 24 % ao 31 % en tres anos. No curso 2025-2026, habilitaranse 59 novas prazas e en 2027-2028 sumaranse 43 prazas máis. Así, o número total de prazas aumentará ata 1147, o que garantirá unha maior presenza do éuscaro na educación infantil da cidade.
Fonte: Uruñeko Udala
O valenciano imponse ao castelán na consulta sobre a lingua base no sistema educativo
A consulta sobre a lingua base na Comunidade Valenciana deu como resultado que o 50,53 % das familias escollese o valenciano fronte ao 49,47 % que optou polo castelán. O apoio á lingua propia foi especialmente alto nas comarcas valencianofalantes, onde superou o 70 % en moitas delas. A pesar disto, algunhas entidades critican a consulta por considerar que pretendía reducir o uso do valenciano e denuncian a creación dun conflito innecesario.
Fonte: Diari de la Llengua
A porcentaxe de estreas de cine en éuscaro só foi do 1,6 % en 2024
O colectivo Pantailak Euskaraz e o Observatorio de Dereitos Lingüísticos denuncian que só o 1,6 % das proxeccións cinematográficas de 2024 en Euskal Herria foron en éuscaro. Ante esta situación, reclámanlles ás institucións públicas a adopción de normativas que garantan a presenza do idioma nos cines e un incremento dos recursos para produción, dobraxe e subtitulación.
Fonte: EITB
As cooperativas de Fagor comprométense co éuscaro co seu apoio á iniciativa Euskaraldia
O Grupo Fagor e as súas cooperativas comprométense a participar na nova edición do Euskaraldia, que terá lugar do 15 ao 25 de maio, co obxectivo de reforzar os hábitos lingüísticos en éuscaro. Ademais de informar e visibilizar a iniciativa, buscarán medidas concretas para promover o uso do idioma no ámbito cooperativo.
Fonte: TuLankide
EITB e Euskaltzaindia asinan un convenio para colaborar na difusión do éuscaro e na preservación da súa riqueza dialectal
EITB e Euskaltzaindia asinaron un acordo de colaboración para o período 2025-2028 co obxectivo de promover a normalización do éuscaro nos medios, fortalecer o seu modelo estándar e preservar a diversidade dialectal. Entre as iniciativas, recollerase a produción lingüística de EITB no Corpus de Referencia do Éuscaro e a promoción do seu uso na intelixencia artificial. Ademais, impulsaranse accións formativas e proxectos enfocados na mocidade para garantir a transmisión do idioma mediante novas plataformas dixitais. Ambas as institucións destacan a colaboración como clave para a modernización e revitalización do éuscaro.
Fonte: EITB
A Generalitat de Cataluña convoca axudas para a incorporación do catalán aos videoxogos
O Goberno catalán reforza a presenza do catalán nos videoxogos mediante unha nova convocatoria de subvencións, cunha dotación de 200 000 euros, para empresas privadas destinadas á tradución, localización, dobraxe e subtitulación. Nos tres anos de vixencia deste programa, apoiouse a adaptación de 25 videoxogos cun investimento de case 271 000 euros.
Fonte: Generalitat de Catalunya
Boletín
Subscríbase ao boletín
