Galego 2.0 ofrece recursos en liña para promover o uso do galego entre a infancia e a mocidade a través de seis taboleiros temáticos, que se presentan cada xoves durante o mes de xullo. Así, os dous últimos taboleiros céntranse na literatura, e na ciencia e a tecnoloxía.

Fonte: Consello da Cultura Galega

Segundo sinalan dende Rei Zentolo, o algoritmo de Google non recoñece o galego como idioma, o que supón unha serie de dificultades para poder desenvolver unha campaña publicitaria nesta lingua.  

Fonte: Galicia Confidencial

O secretario xeral de Política Lingüística, Valentín García, e o director do Instituto Galego de Análise e Documentación Internacional (IGADI), Daniel González, presentaron no Pazo de San Roque o informe anual de acción exterior de Galicia Nós no mundo. A paradiplomacia galega na nova normalidade e mais o Informe anual do IGADI 2019-2020. Da guerra comercial á Covid-19, ambos os dous traballos publicados co apoio da Consellería de Cultura e Turismo.

Fonte: O Portal da Lingua Galega

A escola Semente de Compostela logrou apoio económico entre a cidadanía para reformar un novo edificio grazas ao crowdfunding co que conseguiron 160 000 euros, 30 000 máis do que precisaban inicialmente para este proxecto.

Fonte: Galicia Confidencial

A profesora e escritora Charo Golmar presentou no compostelán Pazo de San Roque o seu último libro, Nobelo de luz, co que se estrea como poeta, da man de Edicións Fervenza.

Fonte: O Portal da Lingua Galega

Para celebrar o seu 70 aniversario, Galaxia, cuxa asemblea fundacional tivo lugar o 25 de xullo de 1950 nun hotel compostelán, vai publicar un número especial de Grial, unha revista que a editorial comezou a editar en 1963.

Fonte: Praza Pública

Os Premios á calidade lingüística, que teñen como obxectivo fomentar o uso do galego entre o alumnado, chegan á súa edición número dezaseis para recoñecer os mellores traballos académicos, fin de grao (TFG) e fin de mestrado (TFM) redactados nesta lingua ao longo do presente curso.

Fonte: Universidade de Santiago de Compostela

A versión en liña do Dicionario da Real Academia Galega incorpora novas entradas e acepcións relacionadas co vocabulario da pandemia de coronavirus, que se suman a outras que xa se incluíran o pasado mes de maio.

Fonte: Real Academia Galega

A Universidade de Vigo destina un orzamento de 12 000 euros á convocatoria, un ano máis, de axudas para redactar e defender en galego teses de doutoramento, así como os premios á calidade lingüística dos TFG e TFM presentados no curso 2019/2020 cunha cualificación mínima de oito.

Fonte: Universidade de Vigo

O Servizo de Normalización Lingüística de Redondela puxo en marcha unha iniciativa denominada Filmoteca Galega coa que pretende crear un fondo de cine feito en galego con curtas e longametraxes, documentais e cinema infantil.

Fonte: Faro de Vigo