A Asociación Galicia Bilingüe considera unha "vergoñenta manipulación" a campaña a favor do uso do galego no sistema educativo que impulsa a Universidade de Vigo e que prevé celebrar conferencias en distintos colexios e institutos. Por iso, indican nun comunicado, comezaron a remitir cartas aos distintos centros educativos galegos para advertirlles de que a campaña da institución universitaria "Europa é plurilingüe. Quen sabe galego, sabe máis" está baseada nun "cúmulo de falsidades" sobre o modelo lingüístico de ensinanza doutros países.

Fonte: El Correo Gallego

Segundo datos da Universidade da Coruña (UDC), nas facultades da cidade herculina o 90% dos docentes exprésanse en español á hora de dar clase. Pero a situación pouco cambia nas aulas de Vigo (84%) e Santiago (80%).

Fonte: 20minutos

O prazo de inscrición para poder participar nas sesións que se impartirán nesas catro cidades permanecerá aberto ata o venres 14 de novembro

A relación da lingua galega coas novas tecnoloxías e a elaboración de proxectos de planificación lingüística destinados aos centros de ensino son algunhas das cuestións que se abordarán ao longo destas xornadas

En Ferrol, Pontevedra e Ourense xa se levou a cabo esta iniciativa a comezos de outubro, cunha elevada participación de docentes

As cidades de Santiago, A Coruña, Lugo e Vigo acollerán, entre finais deste mes e comezos de decembro, a terceira edición dos Seminarios de Dinamización Lingüística no Ensino, que van dirixidos ao profesorado de ensino primario e secundario dos centros públicos e privados de Galicia. A organización desta iniciativa parte da Secretaría Xeral de Política Lingüística, que conta para estas xornadas coa colaboración da Dirección Xeral de Ordenación e Innovación Educativa.

Nos catro casos, os seminarios empezarán o 25 de novembro e prolongaranse durante os días 26 e 27 dese mesmo mes, e os días 2, 3 e 4 de decembro, sempre a partir das 18.00 horas. En Santiago, as sesións desenvolveranse no IES As Fontiñas; na Coruña serán no IES Rafael Dieste; en Lugo no IES Politécnico, e en Vigo no IES Politécnico.

O prazo de matrícula para inscribirse nestes cursos remata este venres, 14 de novembro. Os profesores e as profesoras que desexen asistir aos seminarios poden inscribirse no enderezo electrónico http://www.edu.xunta.es/fprof. O número de prazas dispoñibles por cada unha das cidades mencionadas é de 50 como máximo.

Contidos
O programa dos seminarios de dinamización inclúe varias sesións nas que se porán en común os modelos de planificación sociolingüística implantados con éxito en diferentes centros de ensino de Galicia e noutras comunidades. As xornadas contarán coa participación de dous especialistas en planificación lingüística da Comunitat Valenciana, Vicent Pascuall e Rafael Fresquet. A maiores, os asistentes abordarán outras cuestións, como a relación da lingua galega coas novas tecnoloxías da información e da comunicación, e poderán tamén participar en obradoiros prácticos nos que aprenderán a elaborar plans e proxectos de normalización lingüística.

Este programa impulsado pola Xunta de Galicia tenta contribuír a mellorar a formación dos docentes que se encargan de desenvolver tarefas de planificación lingüística nos seus respectivos centros de ensino. Os participantes nos seminarios obterán un certificado de asistencia expedido polo Servizo de Formación do Profesorado da Consellería de Educación e Ordenación Universitaria.

Boa acollida
Santiago, A Coruña, Lugo e Vigo non serán as primeiras cidades galegas nas que se leve a cabo a terceira edición do Seminario de Dinamización Lingüística no Ensino. De feito, as devanditas xornadas xa se desenvolveron a comezos de outubro en Ferrol, Pontevedra e Ourense, onde tiveron moi boa aceptación entre os docentes, que cubriron a totalidade das prazas que se ofertaban.

Fonte: Xunta de Galicia

O goberno galego recibiu o galardón ‘Microsoft Local Language Program Award’ por apoiar a diversidade lingüística e o seu “compromiso co galego nas novas tecnoloxías”.

Fonte: Vnunet

"Máis de 40 anos de entrega total á causa da lingua galega: á súa investigación e dignificación". O catedrático de Filoloxía Románica e membro da Real Academia Galega Francisco Fernández Rei condensou con estas palabras a traxectoria de Antón Santamarina, a quen os seus compañeiros homenaxearán na Facultade de Filoloxía da Universidade de Santiago de Compostela.

Fonte: Galicia Hoxe

Na reunión da mesa de traballo da que forman parte os representantes sindicais dos traballadores municipais e os do goberno local celebrada o pasado 12 de novembro, o concelleiro delegado do alcalde para Réxime Interior, o socialista José Rábade, informou os sindicalistas que a Xunta enviou un escrito ao Concello de Lugo no que lle recorda que nos temarios das probas selectivas para accesos a postos de traballo deberá figurar como mínimo un en galego.

Fonte: La Voz de Galicia

A instalación interactiva A Cova permanecerá no parque Barbaña dende o venres día 14 de novembro, ata o domingo 16

Esta iniciativa convida a facer unha viaxe da man das novas tecnoloxías pola riqueza lingüística galega e a construír de xeito colectivo unha cadea xigante de palabras

Logo do seu paso por Ourense, esta montaxe promovida por Política Lingüística visitará as cidades de Vigo e Lugo

A cidade de Ourense acollerá a partir do venres e durante toda a fin de semana a instalación interactiva A Cova, unha iniciativa que se engloba dentro da campaña “En galego, tes todo por vivir. Tócache!”, que promove a Secretaría Xeral de Política Lingüística. Esta montaxe convida a mergullarse na riqueza léxica da lingua galega a través dunha moderna versión do xogo das palabras encadeadas e está pensada para que participen nela persoas de todas as idades. A Cova permanecerá no parque Barbaña de Ourense os días 14, 15 e 16 de novembro.

Esta iniciativa chega á cidade ourensá logo do éxito que acadou no seu paso por Santiago de Compostela e A Coruña. A Cova é unha instalación itinerante de última tecnoloxía na que se recrea o mito da caverna de Platón. As persoas que se internen nela terán ocasión de interactuar coa linguaxe achegando palabras coas que contribuirán a construír entre todos unha cadea xigante de vocábulos. Para garantir a corrección das palabras empregadas, cóntase coa base de datos do Vocabulario ortográfico da lingua galega (Volga).

Con posterioridade ao seu paso por Ourense, A Cova recalará nas cidades de Vigo e Lugo. Na primeira das vilas mencionadas, a instalación estará situada na rúa Urzáiz os días 21, 22 e 23 de novembro. A praza Maior de Lugo será a última escala que faga esta iniciativa, durante os días 28, 29 e 30 de novembro.

Fonte: Xunta de Galicia

O Consello da Xuventude de Galicia convoca diferentes seminarios de linguaxe non sexista cos obxectivos de crear espazos de debate e de reflexión acerca da repercusión e da influencia do sexismo social sobre a linguaxe, e de analizar a linguaxe sexista en diferentes ámbitos, así como facilitar recursos para evitar calquera tipo de discriminación.

Fonte: CTNL

A Consellería de Traballo tramitará un expediente sancionador se se constatan "actos discriminatorios" no caso denunciado polo Comité de empresa de Navantia pola vulneración dos dereitos lingüísticos dun traballador no pasado mes de maio.

Fonte: Galicia Hoxe

O coñecemento da lingua galega é un requisito imprescindible para aspirar a un posto de traballo na Administración autonómica, pero a realización polos funcionarios de cursos para perfeccionar o seu manexo non é considerado pola Xunta como un mérito engadido á especialización en calquera outro idioma da UE. A efectos de promoción interna na Administración, un curso de galego puntúa o mesmo que un de húngaro ou de italiano.

Fonte: La Voz de Galicia