A Consellería de Educación e Ordenación Universitaria organiza unha xornada sobre a aprendizaxe integrada de contidos e lingua, que se celebrou no Centro Integrado de Formación Profesional Politécnico de Santiago de Compostela

Unha sección bilingüe consiste na ensinanza dunha área ou materia non lingüística de xeito bilingüe

Na Comunidade galega desenvólvense 665 seccións en 190 centros

A Consellería de Educación e Ordenación Universitaria celebrou o pasado día 8 de outubro no Centro Integrado de Formación Profesional (CIFP) Politécnico de Santiago de Compostela a xornada O modelo CLIL, Aprendizaxe integrada de contidos e lingua. Uns 250 docentes participaron nesta actividade, que ten por obxectivo proporcionar información e formación inicial ao novo profesorado participante nas seccións bilingües, así como presentar e intercambiar experiencias relacionadas co fomento do plurilingüismo.

A xornada abriuse ás 10,30 horas coa intervención de Carmen Pérez Vidal, profesora titular de Filoloxía inglesa do Departamento de Tradución e Filoloxía da Universtitat Pompeu Fabra, co relatorio Multilingüismo á europea. Aprender contidos. Adquirir linguas. Coñecer culturas. Deste xeito, Pérez Vidal abordou a importancia das linguas no novo espazo europeo. A continuación, Isabel Pérez Torres, profesora de inglés no Instituto de Educación Secundaria (IES) Moraleda de Zafayona, de Granada, e doutora pola Universidade de Granada, analizou o uso de recursos e ferramentas dixitais na elaboración de materiais para a aprendizaxe integrada de linguas.

Xa pola tarde, distintos docentes expuxeron as súas experiencias, e membros do equipo pedagóxico dos portais Educainglés e Educafrancés, presentaron estes recursos multimedia. A xornada pechouse coa intervención de Xabier San Isidro, asesor de Linguas Estranxeiras da Consellería, que abordou a situación actual das seccións bilingües na Comunidade galega.

Importante incremento
Unha sección bilingüe é a organización da ensinanza dunha área ou materia non lingüística da educación primaria, da Educación Secundaria Obrigatoria (ESO) ou bacharelato, ou dun módulo de Formación Profesional específica, que se cursa cun grupo de alumnos dun xeito bilingüe: en galego ou castelán, segundo corresponda de acordo coa normativa vixente en materia de normalización lingüística, e nunha lingua estranxeira falada na Unión Europea. A súa finalidade é reforzar a aprendizaxe da lingua estranxeira a través da incorporación parcial do seu uso como vehículo de comunicación na área, materia ou módulo en que se desenvolve, así como a adquisición da terminoloxía específica.

Este curso 2008/09 un total de 190 centros da Comunidade galega desenvolven 665 seccións bilingües, fronte aos 114 centros e as 332 seccións do curso pasado. O importante incremento do número de seccións e centros que as desenvolven en Galicia levou á CLIL Cascade Network, organismo internacional financiado pola Comisión Europea dentro do programa Lifelong Learning, a invitar a Comunidade galega a explicar por primeira vez a súa experiencia nun congreso celebrado en Tallin o mes pasado.

Fonte: Xunta de Galicia

Durante o mes de decembro comezará a campaña de normalización lingüística 'Deixa que o viño fale. Consume viño etiquetado en galego', promovida pola Asociación de Funcionarios para a Normalización Lingüística de Galicia. A razón principal, que a etiquetaxe na lingua de orixe non só non limita o mercado, senón que é beneficiosa para a diferenciación dos produtos.

Fonte: A Nosa Terra

Un estudo asegura que o 90% dos galegofalantes di ser "crente" e ten unha actitude "moi favorable" cara á lingua, aínda que os cregos escollen maioritariamente o castelán.

Fonte: Vieiros

O director xeral de Formación Profesional e Ensinanzas Especiais, Antonio Vázquez, asegurou que a Consellería de Educación solicitou información durante o curso pasado dos 1.500 centros que aplican o decreto do uso do galego no ensino para determinar, nun informe "oficial e definitivo", o seu cumprimento.

Fonte: Galicia Hoxe

A Mesa pola Normalización Lingüística presentou unha campaña para que os cidadáns sexan conscientes do seu dereito a ser "atendidos, non só entendidos" en galego e para que "o exerciten" e reclamen que se cumpra "cun sorriso", segundo indicou o presidente desta asociación, Carlos Callón.

Fonte: GZnación

O Pleno do Parlamento de Galicia debateu o informe do Valedor do Pobo sobre 2007. Benigno López destacou que na política lingüística hai "unha tendencia a promover que a materia se converta en obxecto de conflito".

Fonte: A Nosa Terra

A Asociación Galicia Bilingüe considera unha "vergoñenta manipulación" a campaña a favor do uso do galego no sistema educativo que impulsa a Universidade de Vigo e que prevé celebrar conferencias en distintos colexios e institutos. Por iso, indican nun comunicado, comezaron a remitir cartas aos distintos centros educativos galegos para advertirlles de que a campaña da institución universitaria "Europa é plurilingüe. Quen sabe galego, sabe máis" está baseada nun "cúmulo de falsidades" sobre o modelo lingüístico de ensinanza doutros países.

Fonte: El Correo Gallego

Segundo datos da Universidade da Coruña (UDC), nas facultades da cidade herculina o 90% dos docentes exprésanse en español á hora de dar clase. Pero a situación pouco cambia nas aulas de Vigo (84%) e Santiago (80%).

Fonte: 20minutos

O prazo de inscrición para poder participar nas sesións que se impartirán nesas catro cidades permanecerá aberto ata o venres 14 de novembro

A relación da lingua galega coas novas tecnoloxías e a elaboración de proxectos de planificación lingüística destinados aos centros de ensino son algunhas das cuestións que se abordarán ao longo destas xornadas

En Ferrol, Pontevedra e Ourense xa se levou a cabo esta iniciativa a comezos de outubro, cunha elevada participación de docentes

As cidades de Santiago, A Coruña, Lugo e Vigo acollerán, entre finais deste mes e comezos de decembro, a terceira edición dos Seminarios de Dinamización Lingüística no Ensino, que van dirixidos ao profesorado de ensino primario e secundario dos centros públicos e privados de Galicia. A organización desta iniciativa parte da Secretaría Xeral de Política Lingüística, que conta para estas xornadas coa colaboración da Dirección Xeral de Ordenación e Innovación Educativa.

Nos catro casos, os seminarios empezarán o 25 de novembro e prolongaranse durante os días 26 e 27 dese mesmo mes, e os días 2, 3 e 4 de decembro, sempre a partir das 18.00 horas. En Santiago, as sesións desenvolveranse no IES As Fontiñas; na Coruña serán no IES Rafael Dieste; en Lugo no IES Politécnico, e en Vigo no IES Politécnico.

O prazo de matrícula para inscribirse nestes cursos remata este venres, 14 de novembro. Os profesores e as profesoras que desexen asistir aos seminarios poden inscribirse no enderezo electrónico http://www.edu.xunta.es/fprof. O número de prazas dispoñibles por cada unha das cidades mencionadas é de 50 como máximo.

Contidos
O programa dos seminarios de dinamización inclúe varias sesións nas que se porán en común os modelos de planificación sociolingüística implantados con éxito en diferentes centros de ensino de Galicia e noutras comunidades. As xornadas contarán coa participación de dous especialistas en planificación lingüística da Comunitat Valenciana, Vicent Pascuall e Rafael Fresquet. A maiores, os asistentes abordarán outras cuestións, como a relación da lingua galega coas novas tecnoloxías da información e da comunicación, e poderán tamén participar en obradoiros prácticos nos que aprenderán a elaborar plans e proxectos de normalización lingüística.

Este programa impulsado pola Xunta de Galicia tenta contribuír a mellorar a formación dos docentes que se encargan de desenvolver tarefas de planificación lingüística nos seus respectivos centros de ensino. Os participantes nos seminarios obterán un certificado de asistencia expedido polo Servizo de Formación do Profesorado da Consellería de Educación e Ordenación Universitaria.

Boa acollida
Santiago, A Coruña, Lugo e Vigo non serán as primeiras cidades galegas nas que se leve a cabo a terceira edición do Seminario de Dinamización Lingüística no Ensino. De feito, as devanditas xornadas xa se desenvolveron a comezos de outubro en Ferrol, Pontevedra e Ourense, onde tiveron moi boa aceptación entre os docentes, que cubriron a totalidade das prazas que se ofertaban.

Fonte: Xunta de Galicia

O goberno galego recibiu o galardón ‘Microsoft Local Language Program Award’ por apoiar a diversidade lingüística e o seu “compromiso co galego nas novas tecnoloxías”.

Fonte: Vnunet