A asociación O Fervedoiro de Cuntis aplaudiu a ordenanza municipal sobre o uso do idioma galego, aprobada o pasado venres no pleno do Concello. O colectivo considera que se trata de «un primeiro e importante paso na normalización do noso idioma en eidos da administración municipal, xa que o galego ha ser empregado tanto en asuntos internos da casa do concello, como na relación coas persoas que ata ela se acheguen», remachou O Fervedoiro no seu blog de internet.

Fonte: La Voz de Galicia

A Secretaría Xeral de Política Lingüística participa na Feira das Industrias Culturais con esta instalación participativa de dinamización lingüística

As actividades de animación lingüística promovidas por este departamento coa colaboración das editoriais galegas terá tamén protagonismo neste foro

O Contador, outra das iniciativas desenvolvidas nos espazos públicos para fomentar a creatividade oral en lingua galega, tamén se presentará na feira

A Cova, o xogo das palabras encadeadas en versión tecnolóxica que durante o último mes percorreu distintas cidades galegas, recala desde o xoves 4 de decembro e ata o domingo 7 no Palexco da Coruña para participar na Feira Galega das Industrias Culturais, Cultur.gal. A Secretaría Xeral de Política Lingüística situará a instalación na zona de benvida da feira para que todos os asistentes poidan pasar por ela e deixar a súa palabra.

A Cova está dirixida a persoas de todas as idades e ten como obxectivo a construción dunha cadea de palabras con todas as achegas dos participantes. O Vocabulario Ortográfico da Lingua Galega (Volga) é a ferramenta que se emprega para garantir a corrección dos vocábulos que se van engadindo á cadea.

Durante a xornada do venres, as persoas que se acheguen levarán como agasallo unha camiseta estampada cun graffiti da palabra elixida.

A instalación, inspirada no mito da caverna de Platón, permaneceu en diferentes espazos públicos de moito tránsito peonil das cidades de Santiago, A Coruña, Ourense, Vigo e Lugo. Preto de 3.000 persoas participaron coa súa palabra neste xogo.

Flis-fli-ris-flás
As actividades de animación lingüística promovidas pola Secretaría Xeral de Política Lingüística coa colaboración das editoriais galegas terá tamén cabida en Cultur.gal. Xunto cos representantes da Editorial Galaxia, a secretaria xeral, Marisol López, presentará o venres, día 5, ás 11:30 horas, a obra Flis-fli-ris-flás, que se está representando en distintas vilas e cidades galegas para nenos e nenas de primeiro ciclo de Primaria.

O Contador
Outra das experiencias promovidas por Política Lingüística no eido da dinamización lingüística será tamén presentada nesta feira. Trátase do Contador, unha iniciativa desenvolvida tamén en espazos públicos durante os últimos meses para fomentar a creatividade e a espontaneidade en lingua galega e aproveitar a riqueza oral do idioma e as súas variantes dialectais. Desenvolvida pola empresa Eme2, chegou a trinta concellos galegos nos que se elaborou un conto colectivo entre os veciños e transeúntes.

Fonte: Xunta de Galicia

A Confederación Intersindical Galega (CIG) e a fundación Fesga presentaron un caderno de viñetas que, baixo o título 'O galego con humor', pretende facer unha chamada "á necesidade de avanzar no uso social do idioma".

Fonte: Europa Press

Respondía a unha pregunta parlamentaria sobre as medidas propostas pola Xunta para informar a cidadanía das competencias da Mesa pola Normalización Lingüística

Méndez Romeu lembrou que o consenso é a postura que o Goberno ten indicado moitas veces a través do presidente da Xunta de Galicia

Lembrou que o 23 de outubro dirixiu un escrito á Mesa indicándolle que debía absterse de calquera actividade “que se afaste do previsto nos seus fins estatutarios”

O conselleiro de Presidencia, Administracións Públicas e Xustiza, José Luis Méndez Romeu, pediulle ao Partido Popular unha reflexión sobre a necesidade de volver ao consenso en materia de política lingüística, “tal e como o Goberno ten indicado moitas veces a través do presidente da Xunta de Galicia”. Méndez Romeu fixo estas declaracións ao responder a unha pregunta parlamentaria sobre as medidas propostas pola Xunta para informar a cidadanía das competencias da Mesa pola Normalización Lingüística.

Segundo o titular de Presidencia “os grupos políticos que teñen experiencia
no Goberno e expectativas de volver ter a máxima responsabilidade neste” teñen que ter tamén a capacidade de “buscar acordos, de facelo no Parlamento e nas institucións e de obviar debates que non nos conducen a ningún lugar importante”. Neste sentido, tamén declarou que non se pode tolerar que unha entidade “representativa no seu ámbito pero evidentemente minoritaria” marque a axenda das institucións nun tema que “é patrimonio de todos” como é a política lingüística.

Doutra banda, ao referirse aos supostos documentos enviados pola Mesa, o conselleiro de Presidencia lembrou que a apertura de expedientes é unha actividade que as leis reservan “con carácter exclusivo” ás administracións públicas, “sexan as administracións xudiciais, autoridades xudiciais ou fiscalía; sexan as administracións públicas no sentido amplo do termo ou os organismos especializados que teñen atribuída esa competencia como é o caso do Valedor do Pobo”, dixo.

Neste sentido tamén expuxo que o feito de que unha entidade privada teña adoptado unha actividade destas características podería considerarse unha “actividade de simulación dunha acción habitual dos poderes públicos” e polo tanto “podería considerarse presuntamente inclusa en figuras delitivas” como as de usurpación de funcións públicas, de ameazas ou de coaccións. Por todo isto, dixo que el mesmo, no nome do seu departamento, lle dirixira un escrito con data de 23 de outubro informándolle desta situación, indicándolle que debía absterse de calquera actividade “que se afaste do previsto nos seus fins estatutarios” e advertíndolle do risco legal no que incorría se persistise neste tipo de actividades.

Por último, o titular de Presidencia quixo lembrar que a Administración non ten a facultade de xulgar posto que a Constitución española prohibe expresamente a arbitrariedade nos poderes públicos e que se os cidadáns se atopan diante de calquera presunto delito de coaccións ou ameazas teñen “sempre aberto diante deles o camiño dos tribunais” onde serán os xuíces ordinarios os que ditaminarán sobre o fondo da cuestión.

Fonte: Xunta de Galicia

A Mesa pola Normalización Lingüística e a asociación Behatokia de defensa dos dereitos do éuscaro sinalaron a Administración do Estado como "a que máis vulnera os dereitos lingüísticos dos falantes de linguas cooficiais".

Fonte: Europa Press

O alcalde da Coruña, Javier Losada, presentou o novo dispositivo Bildo, un tradutor universal deseñado para facilitar as posibilidades comunicativas das persoas xordas, que será instalado nas oficinas municipais de atención cidadá.

Fonte: Europa Press

Esta actividade, dirixida a membros e coordinadores dos equipos de dinamización e normalización lingüística, consolídase como o principal foro de intercambio e de posta en común de experiencias normalizadoras no ensino

O interese do profesorado obrigou a ampliar o número de prazas en todas as cidades galegas, que o ano que vén acollerán unha nova edición

Proximamente editarase unha publicación coas actas do seminario, no que participaron expertos en aprendizaxe integrada de linguas

A secretaria xeral de Política Lingüística, Marisol López, participa na última xornada do Seminario de Dinamización Lingüística no Ensino, que durante estes meses se veu desenvolvendo nas principais cidades galegas con moi boa acollida e interese por parte dos seus destinatarios, os coordinadores e os membros dos equipos de dinamización e normalización lingüística dos centros de ensino primario e secundario de Galicia.

Desde o mes de outubro, as cidades de Santiago, Ferrol, Vigo, Lugo, A Coruña, Pontevedra e Ourense acolleron esta terceira edición da actividade, que ante a gran demanda rexistrada ampliaron o número de prazas, inicialmente fixado en 50 para cada localidade. Finalmente, foron preto de 500 as persoas as que participaron nestes seminarios organizados pola Secretaría Xeral de Política Lingüística coa colaboración da Dirección Xeral de Ordenación e Innovación Educativa.

As xornadas, pensadas para darlle formación ao profesorado que debe desenvolver no seu centro labores de planificación lingüística, serviron tamén para presentar exemplos viables e realistas que se están a desenvolver na actualidade e que poden valer de referente para impulsar o incremento de usos da lingua, tanto na comunidade educativa como no seu contorno.

Experiencias prácticas
Algúns deses exemplos preséntanse en Santiago o xoves 4 de decembro pola tarde, como o do IES de Melide, que achegará o labor do seu equipo de normalización no centro, que desenvolve diferentes campañas activas nas que implica o contorno e que xestiona unha emisora de televisión e de radio dentro do instituto.

Outra das experiencias que se dá a coñecer para os asistentes ao seminario de Santiago é o modelo de convivencia lingüística materializado polo IES Perdouro de Burela, merecedor do premio de Innovación Educativa en Normalización Lingüística convocado pola Secretaría Xeral de Política Lingüística e consistente en implicar a toda a localidade na realización dun Arquivo Documental co que poder ofrecerlle á cidadanía un banco de modelos documentais útiles para a vida diaria. O proxecto serviu, ademais, de base para a elaboración dun modelo de planificación lingüística adoptado por todo o Concello de Burela.

As iniciativas de fomento do uso do galego oral e de utilización das novas tecnoloxías na aula tiveron tamén cabida nestes seminarios. As xornadas contaron coa participación de diversos especialistas en planificación lingüística e aprendizaxe de linguas, tanto galegos como doutros lugares. Ademais, abordáronse cuestións como a relación entre o galego e as novas tecnoloxías da información e da comunicación.

Fonte: Xunta de Galicia

A Secretaría Xeral de Política Lingüística financiou a dobraxe ao galego desta longametraxe que ten unha duración de 68 minutos

A exhibición desta produción comeza o venres día 5 de decembro en cines de Lugo, Vigo, A Coruña, Santiago de Compostela e Lalín

Preto de corenta personaxes danlle vida a esta historia que discorre en 18 escenarios diferentes e que está ambientada na época do Nadal

Seis salas cinematográficas de Galicia acollen o venres día 5 de decembro a estrea exclusivamente en galego da longametraxe de animación en tres dimensións A hora dos agasallos. A Secretaría Xeral de Política Lingüística financiou a dobraxe ao galego desta película que vai dirixida principalmente ao público infantil. A estrea producirase simultaneamente nas salas de cine As Termas de Lugo, Gran Vía de Vigo, Os Rosales e Filmax na Coruña; Valle Inclán de Santiago de Compostela e Filmax de Lalín.

A hora dos agasallos, dirixida por Gorka Sesma e distribuída por Barton Films, é a terceira entrega da saga de Olentzero. Nesta cinta, este personaxe atópase con problemas para poder repartir os agasallos de Nadal debido á misteriosa desaparición do seu reloxo máxico. A intranquilidade instálase entre os habitantes da vila de Olentzero desde a chegada dun estranxeiro que sufriu un accidente de avión nos montes dos arredores, polo que Anjé, Mari e os seus amigos terán que empregarse a fondo para que a paz retorne á aldea.

A hora dos agasallos estrearase na lingua propia de Galicia e chegará ao mesmo tempo ás pantallas dos cines de Cataluña, en catalán, e do País Vasco, en éuscaro.

Características técnicas
A longametraxe, filmada en formato 35 milímetros, ten unha duración de 68 minutos e componse de 95.608 fotogramas. Conta con 38 personaxes e a trama discorre en 18 escenarios diferentes. A película realizouse en 20 meses e nela traballou un equipo integrado por 29 profesionais. Polo que respecta á parte de animación, foron necesarios 7 meses de traballo para levala a cabo. En canto á banda sonora orixinal, gravouse en Sofía con 53 músicos.

Co financiamento da dobraxe ao galego desta película, Política Lingüística aposta por incrementar o número de produtos audiovisuais que chegan ao mercado na lingua propia de Galicia. Nos últimos meses, tamén se produciu o lanzamento doutros títulos en formato DVD dirixidos ao público infantil, tales como Chamábanlle Shin Chan e Doraemon e os sete magos.

Fonte: Xunta de Galicia

A Mesa pola Normalización Lingüística animou a Consellería de Presidencia a que denuncie ante os tribunais os supostos delitos nos que podería estar incorrendo a asociación en defensa da lingua galega "ou deixe de difamar".

Fonte: Europa Press

Aberto o prazo de inscrición para as actividades formativas preparatorias para a obtención do Certificado de Lingua Galega nos niveis 1, 2, 3 e 4

Establécense varias quendas para realizar os cursos ao longo de todo o ano

Os cursos terán 75 horas lectivas e un número máximo de 30 alumnos

Os exames de acreditación, que son independentes da formación, serán en maio e en novembro do ano que vén

A Secretaría Xeral de Política Lingüística vén de anunciar, a través dunha resolución da Consellería de Presidencia, a convocatoria pública para participar en cursos de lingua galega preparatorios para as probas dos niveis 1, 2, 3 e 4 do Certificado de Lingua Galega (Celga), destinados a particulares e a colectivos.

En total, convócanse 250 cursos, que se van realizar nas localidades da Coruña, Ferrol, Santiago, Lugo, Burela, Ourense, O Barco de Valdeorras, Pontevedra, Lalín e Vigo, e naquelas que determine a Secretaría Xeral de Política Lingüística, segundo as solicitudes presentadas e a distribución xeográfica destas, agrupándoas preferentemente por comarcas. Segundo o previsto nesta convocatoria, poderán realizar estas actividades ata 7.500 persoas, tendo en conta o número de cursos convocados e o número máximo de alumnos por curso, cifrado en 30 persoas.

A convocatoria, publicada no Diario Oficial de Galicia do pasado 2 de decembro, está destinada a particulares, colectivos, entidades e asociacións que conten cun mínimo de 25 persoas preinscritas para participar nos cursos. As actividades formativas deberanse axustar aos obxectivos, ao programa e ao contido curricular establecido para cada un dos niveis. É conveniente que as persoas ou entidades interesadas teñan en conta, á hora de formular as solicitudes, o nivel de coñecementos do alumnado.

Quendas de programación
Os prazos de presentación de solicitudes nos cursos varían en función das datas de comezo das diferentes quendas de programación. Así, os particulares que desexen participar nos cursos previstos entre os meses de marzo e xuño, poderán achegar as súas solicitudes ata o vindeiro 30 de xaneiro. As persoas que opten pola segunda quenda, para cursos programados en xullo e/ou agosto, poderán inscribirse ata o 20 de xuño de 2009. E para os cursos que se realicen en outubro e novembro, o prazo de solicitude estará aberto ata o 10 de setembro. En canto aos colectivos interesados, o prazo de solicitude pechará o 27 de febreiro, para cursos que se realicen entre abril e novembro.
O número máximo de asistentes a cada curso é de 30. Se quedasen prazas vacantes, poderán admitirse candidatos ata tres días antes do inicio do curso. A duración do curso será de 75 horas lectivas, distribuídas en sesións de dúas horas ou de dúas horas e media diarias, aínda que en casos excepcionais ou cando se trate de cursos intensivos poderá autorizarse a realización de sesións con outro horario.

Lugares de solicitude
As persoas e entidades que desexen formular solicitudes farano de acordo cos modelos de solicitude que figuran nos anexos da convocatoria publicada no DOG. Os documentos deberanse dirixir aos gabinetes provinciais de normalización lingüística da Secretaría Xeral de Política Lingüística da provincia que corresponda. Presentaranse preferentemente no Rexistro Xeral da Xunta de Galicia ou no da delegación da Consellería de Presidencia, Administracións Públicas e Xustiza da provincia á que pertenza a localidade na que se queira realizar o curso. Así mesmo, as solicitudes poderanse entregar nas oficinas de rexistro propias ou concertadas da Administración da Comunidade Autónoma de Galicia.

A Secretaría Xeral destina unha partida de 812.500 euros a esta convocatoria, con cargo aos orzamentos de 2009.

Probas de acreditación
A Secretaría Xeral de Política Lingüística non expedirá ningún tipo de certificación ou diploma de asistencia aos cursos, porque para obter a acreditación do nivel Celga ao que se opte é necesario realizar as probas correspondentes, que se efectuarán en maio e novembro de 2009. A inscrición das probas rematará o 25 de marzo de 2009 para a convocatoria de maio e o 7 de outubro para a de novembro.

Fonte: Xunta de Galicia