Con motivo da celebración da Xornada Internacional dos Pobos Autóctonos pola Unesco, fundouse na cidade francesa de Rodez o Colectivo de Teatros en Linguas Autóctonas co obxectivo de promover a obra teatral nos idiomas rexionais de Francia.

Fonte: Jornalet

Usuarios e usuarias de Google Earth poden escoitar falantes de máis de 50 idiomas nativos de todo o mundo grazas ao proxecto "Celebrating Indigenous Languages" lanzado co gallo do Ano Internacional das Linguas Indíxenas das Nacións Unidas.

Fonte: CBC

Un grupo de artistas falantes de linguas minorizadas de diferentes territorios franceses con idioma propio mobilizouse para obter unha emisión musical en diferentes linguas rexionais na televisión francesa.

Fonte: Le Peuple Breton

A Organización das Nacións Unidas para a Educación, a Ciencia e a Cultura (Unesco) declarou nun informe que Bolivia presenta unha taxa de analfabetismo inferior ao 4 % polo que pasa a estar considerado como país alfabetizado grazas a un método que seguiron anteriormente países como Cuba e Venezuela.

Fonte: Buen Diario

A asociación a prol da lingua galesa Cymdeithas yr Iaith compara a importancia que ten a presenza do galés nas redes coa tradución da Biblia a esta lingua e anuncia que lanzará unha campaña para fomentar o uso do galés no mundo dixital para garantir o acceso das novas xeracións ás novas tecnoloxías na lingua vernácula.

Fonte: BBC

A Comisión dos Dereitos Humanos da Orde dos Avogados de Mozambique lembrou a importancia de difundir as leis nas linguas locais do país africano xa que actualmente un 60 % da cidadanía non ten acceso a elas porque non fala portugués.

Fonte: Deutsche Welle

O Goberno de Francia aprobaba hai décadas a lei Toubon con que se obrigaba as empresas a empregar a lingua francesa nos anuncios publicitarios. Nun intento por protexer o francés do uso crecente de anglicismos, o ministro de Cultura de Francia, Franck Riester, anunciou agora medidas para garantir que se cumpra a lei tamén nas plataformas dixitais.

Fonte: The Guardian

Ábrese o prazo de inscricións para os exames que dan acceso ao certificado de proficiencia en portugués como lingua estranxeira, o único recoñecido oficialmente polo Goberno do Brasil. 

Fonte: Acorda Cidade

A comunidade portuguesa residente en Alemaña pedirá ao presidente da República de Portugal, Marcelo Rebelo de Sousa, que o goberno portugués reforce o ensino da lingua portuguesa para que as novas xeracións manteñan o vínculo con Portugal.

Fonte: País ao Minuto

O municipio brasileiro de São Félix do Araguaia, no estado de Mato Grosso, acollerase á lei 3074/19 para aprobar a cooficialización das linguas indíxenas faladas polas etnias que habitan este territorio.

Fonte: Câmara dos Deputados