A Asemblea Xeral das Nacións Unidas aprobou unha resolución de cooperación coa Comunidade de Países de Lingua Portuguesa (CPLP). No documento, que foi asinado ademais por países como España, Francia e Venezuela, recoñécese a relevancia da lingua portuguesa nas relacións internacionais.

Fonte: Nações Unidas

Un informe publicado polo Departamento de Educación da República de Irlanda revela que nos últimos 19 anos aumentou considerablemente a porcentaxe de alumnado que cursa o ensino primario en gaélico irlandés. No ano 2000, a porcentaxe era do 6,4 % e neste último ano esta ascendeu ao 8,1 %.

Fonte: The Irish Times

A Audiencia Lexislativa do estado brasileiro de Río Grande do Sur está considerando a inclusión doutras linguas maternas diferentes ao portugués nos currículos escolares. Unha das linguas con maior número de falantes é o alemán e hai localidades como Santa Cruz do Sul que defende a introdución do alemán no ensino.

Fonte: GAZ

A Oficina Estatística da República Federal de Alemaña revelou nun informe que o alemán foi no ano 2018 a lingua de comunicación predominante na maior parte dos fogares onde polo menos un membro familiar ten procedencia estranxeira. 

Fonte: Deutsche Welle

A partir de agora os profesionais da enfermaría e doutras disciplinas da atención médica deberán realizar só un exame de lingua inglesa, e non dous como anteriormente, para poder traballar no Reino Unido.

Fonte: Nursing in Practice

En zonas angolanas fronteirizas coa República Democrática do Congo, o portugués está en risco de perder o seu estatuto de lingua de comunicación en beneficio doutros idiomas como o francés ou o lingala. A situación é especialmente grave no municipio angolano de Marimba.

Fonte: VOA

Con motivo do Día Internacional da Alfabetización, a directora xeral da Organización das Nacións Unidas para a Educación, a Ciencia e a Cultura (UNESCO), Audrey Azoulay, defendeu a necesidade de promover a diversidade lingüística no ensino e nos procesos de alfabetización para a construción de sociedades máis inclusivas.

Fonte: Naçōes Unidas Brasil

Grazas á colaboración da Academia da Lingua Vasca (Euskaltzaindia) e o Congreso Permanente da Lingua Occitana, a nova liña 1 entre as cidades vascofrancesas de Baiona e Biarritz inclúe na denominación das paradas toponimia en vasco e gascón ademais de en francés.

Fonte: Bayonne

Tres partidos do Parlamento dos Países Baixos presentaron un proxecto de lei que permitirá oficializar a lingua de signos holandesa. Ata agora as dúas únicas linguas oficiais do país son o neerlandés e o frisio.

Fonte: Conexão Política

A provincia canadense de Ontario propuxo ao goberno de Ottawa que cada un achegue un 50 % do investimento para que o proxecto de construción dunha universidade francófona se faga realidade.

Fonte: Airdrie Today