O Goberno do Piemonte dará apoio á campaña iniciada pola Chambra d'Óc para que a Unesco declare a lingua occitana patrimonio mundial inmaterial. Xa hai dez días que comezou 'Occitania a pè', unha camiñada de 1300 quilómetros que ata o 7 de novembro percorrerá os territorios occitanos.

Fonte: Nationalia

Cada vez son máis os centros vascos do mundo que aproveitan as vantaxes que ofrece internet e deciden crear a súa propia páxina web como medio de comunicación cos seus socios e co público en xeral. Na maioría dos casos o idioma principal nestas páxinas adoita ser o do país onde se atopa o centro (español en Arxentina, inglés en EEUU...) pero hai cada vez máis centros que se esforzan por ofrecer tamén a versión en éuscaro. Un dos últimos en sumarse a este grupo é, precisamente, a Euskal Etxea de Bordeaux.

Fonte: Euskalkultura

O xoves 18 de setembro o comisario de Multilingüismo Leonard Orban presentará unha comunicación titulada "Multilingüismo: un activo para Europa, un compromiso compartido". Trátase dunha nova estratexia sobre plurilingüismo que propón unha política lingüística global que aborde cuestións relacionadas co diálogo intercultural, a inclusión social e a competitividade.

Fonte: Eurolang

Costa Rica ten como reto converter o inglés nun idioma de dominio común para a maioría da súa poboación a medio prazo. Un dos obxectivos é que, a partir do ano 2017, o 75% dos bachareis de secundaria teña un nivel alto no manexo desta lingua estranxeira.

Fonte: Nación

A supervivencia das linguas tradicionais angolanas, como o quimbundo ou o umbundo, ante a expansión da lingua portuguesa, esixe medidas políticas, como o recoñecemento destas como linguas oficiais, segundo defende o escritor angolano José Eduardo Agualusa.

Fonte: Lusa

O presidente da Mesa pola Normalización Lingüística, Carlos Callón, participa en Gdansk (Polonia) no Consello Xeral da Axencia Europea para as Linguas Minorizadas (EBLUL), no cal se porán en común experiencias de diferentes entidades que traballan en varios puntos do continente en defensa das linguas que están en proceso de normalización social.

Fonte: A Mesa pola Normalización Lingüística

Os indios da comunidade baré Nova Esperança, no Amazonas, desenvolveron e implantaron un proxecto para rescatar a lingua e os costumes da etnia, unha das maiores do Estado. Tras dous anos de solicitudes á Prefectura de Manaus, os indios conseguiron autorización para ter clases de nhengatu, o idioma nativo dos barés.

Fonte: Globo

Reitores e académicos de institucións de ensino superior dos países que teñen o portugués como idioma oficial participan na 18ª Xuntanza da Asociación de Universidades de Lingua Portuguesa na Universidade de Brasilia.

Fonte: Abril

A Fundación Círculo Solidario, persoal docente, estudantes de escolas, nais e pais de familia de Nahuizalco, en Sonsonate, comezaron a elaborar propostas para propiciar un modelo de educación intercultural, que inclúe o ensino do náhuat como currículo escolar e non como materia optativa.

Fonte: La Prensa Gráfica

Aínda que o inglés seguirá manténdose como lingua franca para os negocios nos próximos anos, outros idiomas irán incrementando o seu peso e a vantaxe terana os que poidan acreditar máis linguas. O futuro está no multilingüismo.

Fonte: Navactiva