A federación de Escolas Católicas, que agrupa 112 colexios relixiosos concertados na comunidade galega, entregou os galardóns literarios Frei Martín Sarmiento, que xa van pola vixésimo segunda edición. Estes recoñecementos, que buscan impulsar a lectura en galego, contan co apoio da Secretaría Xeral da Lingua e co patrocinio do grupo Anaya.

Fonte: O Portal da Lingua Galega

O secretario xeral da Lingua, Valentín García, participou na presentación do XIV Proxecto Didáctico Antonio Fraguas Fraguas. Trátase dunha iniciativa impulsada pola fundación dedicada ao autor e co que colabora a Xunta de Galicia co obxectivo, apuntou, de “favorecer que se leven a cabo actividades entre a comunidade escolar que poñan en valor a lingua, a prestixien e fomenten o seu coñecemento e uso, relacionándoa directamente coa nosa cultura”.

Fonte: O Portal da Lingua Galega

Centros educativos, ANPA, clubs, comercio e bibliotecas súmanse en Redondela ao reto «Unha semaniña enteira», que promove falar galego de maneira continuada entre o 20 e o 27 de febreiro, coincidindo co Día de Rosalía. A campaña, presentada no IES Chapela, contará con actividades culturais e implicará tamén a hostalaría e o tecido empresarial, que distribuirán material divulgativo e organizarán iniciativas temáticas. O Concello destaca que, ao se sumar diversos sectores sociais, se reforza o compromiso colectivo coa transmisión do idioma entre a infancia e a mocidade.

Fonte: Concello de Redondela

A Xunta de Galicia vén de apoiar a produción de Os Balbinos, liña de editorial de libros adaptados en lectura fácil. Así se deu a coñecer na presentación dos libros Os Balbinos visitan os museos naturais de Galicia, Os Balbinos visitan os pazos de Galicia e A Lúa e a Bal gústalles a música, de Xoán Carlos García Porral, Toño Núñez e ilustrados por Gabriel Iglesias Sanmartín, á que asistiron o secretario xeral da Lingua, Valentín García, e o director xeral de Cultura, Anxo M. Lorenzo.

Fonte: O Portal da Lingua Galega

O secretario xeral da Lingua, Valentín García, participou no colexio Álvarez Limeses, en Pontevedra, na apertura da oitava edición do programa «21 días co Galego e +», impulsado pola Xunta en colaboración con “toda a comunidade, entre alumnado, mestrado e persoal dos centros, que participan voluntariamente”.

Fonte: O Portal da Lingua Galega

A campaña «Galego a pé de barrio», impulsada polo alumnado de 1º de Bacharelato, busca promover o uso do galego no comercio local do barrio de Fontiñas. Este proxecto xorde tras a reflexión sobre os baixos índices de uso do galego no instituto, observados a través dunha enquisa interna, e busca cambiar os hábitos lingüísticos no contorno máis próximo. Con este obxectivo, Fontiñas convértese no primeiro barrio piloto dunha iniciativa que pretende crear espazos seguros para o uso do galego no comercio, combater a diglosia e reforzar a identidade lingüística local.

Fonte: Diario de Compostela

A Deputación da Coruña puxo en marcha a novena edición do Premio Quero Cantar, orientado a promover o uso do galego e a creación musical e poética entre a infancia e a mocidade. O certame diríxese a solistas e grupos de ata 16 anos que presenten cancións orixinais e inéditas nesta lingua, en categorías infantil e xuvenil. As persoas premiadas accederán á gravación profesional dunha maqueta e recibirán material musical e produtos culturais en galego.

Fonte: Consello da Cultura Galega

“Nadal en Outes” é o lema dos dous certames cuxo obxectivo é impulsar a creatividade, apoiar o comercio local e fomentar o galego: o Concurso de Decoración, no que se premiarán propostas decorativas orixinais para fachadas e escaparates e se valorará o uso desta lingua; e o Concurso de Postais, dirixido á infancia e á mocidade de 3 a 17 anos, que invita a crear ilustracións cunha mensaxe en galego.

Fonte: Xuventude

O secretario xeral da Lingua, Valentín García, participou na Gala de entrega de premios do Certame de Cinema Escolar OUFF Escola 2025.

Fonte: O Portal da Lingua Galega

O Concello da Baña convoca a cuarta edición do seu concurso de postais de Nadal en galego, unha iniciativa dirixida á infancia e á mocidade de ata 16 anos para estimular a creación artística, fortalecer o uso da lingua e poñer en valor as tradicións locais. O certame, aberto ao alumnado do CPI San Vicenzo e á rapazada empadroada no municipio, busca imaxes inspiradas no Nadal de Galicia cunha mensaxe en galego e admite técnicas variadas en formato DIN A4.

Fonte: Concello da Baña