O asturiano queda excluído da nova configuración da Oficina e do Consello das Linguas Oficiais, segundo o Real Decreto 798/2025, que limita a participación a comunidades con linguas oficialmente recoñecidas, como Euskadi, Cataluña, Galicia, Navarra, Comunidade Valenciana e Baleares. Por este motivo, denuncian que esta decisión discrimina a Asturias, pois o asturiano está protexido no Estatuto de Autonomía e na Constitución. 

Fonte: InfoAsturies

A Academia da Lingua Asturiana expresou a súa preocupación polo borrador do decreto da Secretaría de Universidades que exclúe a Filoloxía Asturiana do conxunto das filoloxías españolas. O texto relega o profesorado desta área ao ámbito das linguas modernas e omite tamén a Lingua, Lingüística e Literatura Asturianas. A institución reclama a rectificación do Ministerio e solicita o apoio da Universidade de Oviedo, das consellerías e dos grupos parlamentarios para garantir o recoñecemento académico da disciplina.

Fonte: RTPA

O Goberno do Principado oferta por primeira vez o ensino de lingua asturiana nas escolas oficiais de idiomas, que comezará este curso 2025-2026 na EOI de Oviedo. A convocatoria, xa aberta, prevé catro grupos presenciais para os niveis A1, A2, B1 e C1, cun máximo de 25 estudantes por aula, e incorporará o nivel B2 o vindeiro ano.

Fonte: Gobierno del Principado

O Tribunal Superior de Xustiza de Asturias confirmou a anulación do Plan de normalización lingüística de Xixón ao desestimar o recurso do Concello contra a sentenza do pasado maio. A decisión, adoptada por cinco maxistrados, considera nulo o proxecto por carecer de cobertura legal e de memoria económica ou informes técnicos.

Fonte: El Diario

A asociación Axuntar denuncia que o Goberno asturiano está a marxinar o galego falado en 18 concellos da zona occidental, tras a modificación do currículo de idiomas que deixa pendente a súa regulación oficial. Reclama un plan de formación similar ao do Bierzo para garantir certificacións oficiais e formación adecuada, mantendo as particularidades da variante local.

Fonte: Nós Diario

Dúas filólogas de Xixón crearon Asturxules, un proxecto dixital que busca preservar e difundir o asturiano entre a mocidade a través das redes sociais. O perfil de Instagram ofrece contido rigoroso e documentado, que combina cultura e lingua, e xa conseguiu atraer a miles de seguidores/as. A iniciativa naceu da súa experiencia como normalizadoras lingüísticas e da intención de chegar a novas xeracións.

Fonte: La Voz de Asturias

A Academia da Lingua Asturiana publicou o volume 145 da súa colección Toponimia, dedicado á parroquia de Rales, en Villaviciosa, que inclúe os nomes tradicionais de lugares grandes e pequenos do territorio. O estudo de Xavier Cayao Valdés recolle a memoria oral da poboación e achega descricións concisas da xeografía local.

Fonte: InfoAsturies

Nas vindeiras semanas publicarase unha versión íntegra en lingua asturiana do novo Portal da Transparencia, un feito que, ademais de mellorar a inclusión, reforza o compromiso do Goberno coa súa cultura e identidade.

Fonte: Asturias Mundial

A Consellería de Cultura, Política Lingüística e Deporte impulsará este ano o distintivo Alfaya, un recoñecemento ao compromiso empresarial co asturiano e o eonaviego, con tres niveis de adhesión segundo o grao de implicación. A marca nace coa colaboración da asociación EPPA e complétase con catro liñas de axudas públicas por valor de 450 000 euros para apoiar accións de normalización lingüística no sector empresarial.

Fonte: Principado de Asturias

O programa Falamos, impulsado pola Consellería de Cultura, Política Lingüística e Deporte, amplía a súa oferta con 15 cursos semipresenciais de asturiano e eonaviego. A iniciativa, que combina formación presencial e en liña, busca promover o uso social das linguas propias e conta cunha participación acumulada de 1410 persoas. 

Fonte: El Diario de Asturias