O Goberno do Principado de Asturias defendeu no Parlamento a oficialización do asturiano e do eonaviego como unha medida imprescindible para garantir a continuidade destas linguas propias. A proposta, impulsada por tres grupos parlamentarios, carece aínda dos apoios suficientes para saír adiante.

Fonte: Infobae

A Consellería de Educación iniciou unha nova campaña para fomentar a matriculación en asturiano e eonaviego en centros públicos para o próximo curso. A campaña, que se desenvolverá en tres fases, busca destacar os beneficios destas linguas nas distintas etapas educativas e a súa relación coa identidade cultural de Asturias. A promoción difundirase a través de medios impresos, dixitais e redes sociais e complementarase coa repartición de materiais informativos nos centros educativos.

Fonte: Principado de Asturias

Trece sindicatos reclamaron nun manifesto a reforma do Estatuto de Autonomía para garantir a oficialidade do asturiano e do eonaviego. No acto, destacaron que a protección destas linguas favorecería o desenvolvemento cultural, social e económico de Asturias, como ocorre noutros territorios bilingües. A iniciativa xorde tras a toma en consideración da reforma no parlamento asturiano, aínda sen a maioría necesaria para a súa aprobación. Os sindicatos insisten en que os partidos deben alcanzar un acordo para asegurar un futuro digno para estas linguas.

Fonte: EFE

A asociación Iniciativa pol Asturianu, en colaboración co Conseyu de la Mocedá de Xixón, recupera os grupos de conversa en asturiano, un espazo telemático e gratuíto para practicar a lingua sen medo nin complexos. As sesións desenvolveranse os sábados a través de Zoom e teñen como obxectivo normalizar o uso do asturiano en todos os ámbitos sociais.

Fonte: Asturias Mundial

O alumnado do mestrado de formación do profesorado na especialidade de asturiano denuncia que a Universidade de Oviedo impide presentar todos os traballos nesta lingua. Consideran que se está vulnerando o seu dereito a empregala, mentres que o decanato argumenta que só se garante o seu uso nas materias específicas, xa que non existe unha normativa que obrigue a avaliala no resto de disciplinas comúns con outras especialidades.

Fonte: RTPA

O alumnado de Lingua Asturiana e Literatura acadou este curso a cifra máis alta dos últimos anos, con 22 909 estudantes, o que supón un incremento do 1,2 % respecto ao ano anterior. A gran novidade para setembro será a introdución do ensino de asturiano e eonaviego no segundo ciclo de Infantil, que suporán a creación dun cento de novas prazas docentes. Ademais, trabállase para ofertar esta lingua nas Escolas Oficiais de Idiomas e obter a certificación con formación previa.

Fonte: Principado de Asturias

Iniciativa pol Asturianu ve na renovación da identidade corporativa do Concello de Xixón unha oportunidade para incorporar o asturiano e a toponimia oficial. A asociación lembra que o Plan de normalización lingüística 2024-2027 establece o uso do logotipo en versión bilingüe e insta a incluír a denominación "Conceyu de Xixón" na imaxe institucional. Considera que esta medida fortalecería a visibilidade e normalización da lingua asturiana na sociedade.

Fonte: La Voz de Asturias

A Universidade de Oviedo presentará en 2025 o “Atles Llingüísticu del Asturianu” (ALAS), un proxecto pioneiro que analiza 500 fenómenos lingüísticos en 90 localidades do dominio asturleonés.

Fonte: La Voz de Asturias

«Intelixencia artificial» foi elixido como neoloxismo do ano en asturiano co 3 5% dos votos fronte a outras candidatas como «troliar» ou «refuxu climáticu». A elección, promovida pola comisión lexicográfica de ALLA, inclúe termos de actualidade social, que serán incorporados á próxima edición do dicionario asturiano.

Fonte: MSN

A Xunta pola Defensa de la Llingua Asturiana (XDLA) denunciou que no borrador da baremación das oposicións de reposición en Educación Secundaria, organizadas polo Goberno do Principado para o ano que vén, o coñecemento de linguas como catalán ou o éuscaro puntúa máis que o do asturiano.

Fonte: TelePrensa