O premio de poesía e relatos curtos Aurelio González Ovies permitirá, tras a petición de Iniciativa pol Asturianu, a presentación de obras en asturiano, despois de que as bases iniciais non incluísen esta posibilidade. Esta organización solicitou a ampliación das bases, argumentando que isto facilitaría a participación dos autores e enriquecería a cultura asturiana.

Fonte: La Voz de Asturias

A Consellería de Educación do Principado convocou a primeira edición dos premios extraordinarios ao coñecemento da lingua asturiana e do eonaviego, dirixidos a estudantes de 3º e 4º de Secundaria e de 1º e 2º de Bacharelato. Haberá un premio por cada etapa e lingua, cunha dotación de 800 euros, ademais dun accésit de 400 euros para lingua asturiana. As probas incluirán comprensión e produción de textos orais e escritos, e a fase final terá lugar o 26 de novembro. A inscrición estará aberta ata o 25 de outubro.

Fonte: Principado de Asturias

A Consellería de Cultura, Política Lingüística e Deporte de Asturias convocou a primeira edición do premio de Guión Cinematográfico en lingua asturiana e eonaviego, cunha dotación de 6000 euros. O obxectivo é apoiar a creación audiovisual nestas linguas e fomentar o repertorio de producións en Asturias. As candidaturas, que deben ser obras orixinais e inéditas, poderán presentarse ata o 29 de outubro. O xurado valorará a contribución cultural, a calidade artística e a adecuación lingüística das propostas.

Fonte: Laboral Cinemateca

A Academia de la Lingua Asturiana abriu o prazo de inscrición para a olimpíada escolar de redacción «Urbano Rodríguez», dirixida a estudantes de asturiano e eonaviego de primaria, secundaria e bacharelato. A competición terá unha primeira fase en liña o 15 de novembro, mentres que a fase final, presencial, se celebrará o 18 de decembro.

Fonte: La Voz de Asturias

A Estaya de la Llingua de Avilés organiza o ciclo de obradoiros "Pa que nun t'aburras", dirixido a nenos e nenas de 4 a 8 anos para promover a creatividade e a cultura asturiana. Impartidos pola educadora Rosa Cuervo, realizaranse entre outubro e decembro, con temas como a arte, a gastronomía e as tradicións do Nadal.

Fonte: Asturias Mundial

A Xunta pola Defensa de la Llingua Asturiana acusa o Principado de Asturias e a RTPA de proporcionar datos inexactos sobre a emisión en asturiano nos medios públicos, inflando as cifras presentadas ao Consello de Europa. Segundo a XDLA, o uso real do asturiano en TPA e RPA é moito menor, e denuncian a falta de contido en asturiano, especialmente na radio. Ademais, critican a decisión de non reactivar o Plan Piloto de Fomento do Asturiano, malia os seus bos resultados, e a carencia de medidas para mellorar a presenza do idioma na educación secundaria.

Fonte: Asturias Mundial

O Instituto Cervantes de Nova York inclúe por primeira vez a lingua asturiana na súa programación, grazas á colaboración co Goberno do Principado. O curso, que comezará en outubro, ofrecerá seis sesións presenciais nas que o alumnado poderá achegarse á historia e ás particularidades culturais asturianas, ademais de aprender os fundamentos básicos da lingua.

Fonte: Principado de Asturias

Avilés converterase na capital da reivindicación do asturiano coa chegada da Xira pola Oficialidade, unha campaña que busca concienciar sobre a importancia de protexer as linguas propias e mobilizar a sociedade para acadar a súa oficialidade e que incluirá diversas actividades culturais e documentais entre o 2 e o 6 de setembro.

Fonte: La Voz de Asturias

Expertos e traballadores da lingua asturiana revisarán as principais reivindicacións do Llibru Blancu que contén propostas para a recuperación e normalización deste idioma, coincidindo co 15º aniversario da súa presentación.

Fonte: RTPA

A concellaría de Normalización Lingüística do Concello de Avilés ampliará a súa actividade na segunda metade do ano. Entre a programación prevista para os vindeiros meses figuran a VI Parada da Xira pola Oficialidade, un curso de nivel básico de asturiano, obradoiros infantís etc.

Fonte: Ayuntamiento de Avilés