Cataluña
O Tribunal Constitucional discutirá sobre catro sentenzas relacionadas co uso do catalán
O Tribunal Constitucional debaterá catro sentenzas vinculadas ao uso da lingua catalá. En concreto, tratarase a Lei do cine, o Código de Consumo, a lei de acollida de persoas inmigrantes e o recurso sobre a Lei audiovisual de Cataluña.
Fonte: La Vanguardia
O Goberno de Cataluña entrega un premio para salientar o labor de fomento da lingua de signos catalá
Entregouse o Premio de Fomento da Lingua de Signos Catalá nun acto no que participaron a directora xeral de Política Lingüística, Ester Franquesa, o presidente da Federación de Persoas Xordas de Cataluña, Antoni Martínez, e a subdirectora xeral de Política Lingüística, Marta Xirinachs. Este premio recoñece a persoas, entidades e iniciativas que promoven e conceden prestixio á lingua de signos catalá.
Fonte: Generalitat de Catalunya
O Tribunal Constitucional declara que a política lingüística do Goberno de Cataluña é constitucional pero con restricións
O Tribunal Constitucional recoñeceu a constitucionalidade das catro leis impugnadas polo PP, o Goberno de España e a Defensora do Pobo, se ben manifestou que a dobre oficialidade lingüística ten que entenderse dun xeito equilibrado, sen que unha lingua sexa superior á outra.
Fonte: Generalitat de Catalunya
A marca catalá Cuinara, de comida saudable, obtén o Recoñecemento á Calidade Lingüística Empresarial
A marca catalá de comida saudable Cuinara obtivo o Recoñecemento á Calidade Lingüística Empresarial. Esta marca pertence ao grupo de entidades de economía social Àuria, que conta cunhas 700 persoas traballadoras.
Fonte: Generalitat de Catalunya
O Goberno de Cataluña organiza un curso de formación para profesorado de catalán de América do Sur
Dentro do Plan de fomento da aprendizaxe da lingua catalá no exterior, que desenvolven a Secretaría de Asuntos Exteriores e da Unión Europea do Departamento de Asuntos Exteriores, Relacións Institucionais e Transparencia e a Dirección Xeral de Política Lingüística do Departamento de Cultura, celebrarase, no Centro Catalán de Rosario (Arxentina), un novo curso de formación para o profesorado de lingua catalá do Cono Sur.
Fonte: Generalitat de Catalunya
A directora de Política Lingüística de Cataluña salienta as liñas de actuación da política lingüística catalá
Celebrouse a V Xornada Lingua e Sociedade nos Territorios de Fala Catalá, na que participou a directora de Política Lingüística de Cataluña, Ester Franquesa, quen indicou cales son as catro liñas de actuación da política lingüística catalá para os vindeiros anos: coñecemento, cohesión, consumo e cooperación.
Fonte: Generalitat de Catalunya
O Goberno de Cataluña promove un proxecto para que pais e nais de alumnado de orixe estranxeira aprendan catalán
O Goberno de Cataluña desenvolverá os "Obradoiros de lingua e socialización de familias no eido educativo", que é un proxecto que ten entre outros obxectivos o de fomentar e mellorar o uso do catalán dos pais e nais de alumnado estranxeiro ou que acaba de chegar á Comunidade e o de comprometer as familias no seguimento dos seus fillos e fillas.
Fonte: Generalitat de Catalunya
A inscrición aos cursos de catalán do Consorcio para a Normalización Lingüística de Cataluña aumentou no ano 2016
O Consorcio para a Normalización Lingüística de Cataluña presentou a súa memoria de actividades do ano 2016, na que salienta un crecemento do 5 por cento respecto á inscrición en cursos de lingua catalá no ano anterior.
Fonte: Generalitat de Catalunya
As sentenzas definitivas do Tribunal Constitucional sobre política lingüística catalá admiten a súa constitucionalidade
O Tribunal Constitucional vén de publicar o contido definitivo das sentenzas sobre as leis de acollida, do Código de consumo, do cine e do audiovisual. Aínda que as resolucións recoñecen a constitucionalidade das leis, a directora xeral de Política Lingüística, Ester Franquesa, indicou que "unha vez máis, as sentenzas do Tribunal Constitucional debilitan a posición do catalán".
Fonte: Generalitat de Catalunya
O RCD Espanyol impulsará o uso da lingua catalá no eido futbolístico
Plataforma pola Lingua e o RCD Espanyol uníronse para promover o uso do catalán como lingua vehicular por parte de adestradores e futbolistas do club.
Fonte: El Nacional
Boletín
Subscríbase ao boletín
