Cataluña
Segundo un estudo, as redes sociais en catalán axudan á mocidade a mellorar o seu coñecemento do catalán
Un estudo da Universidade Pompeu Fabra recomenda incorporar TikTok e Instagram á aprendizaxe do catalán para achegar a lingua aos hábitos dixitais da mocidade. Segundo unha enquisa a 76 persoas de entre 14 e 25 anos, oito de cada dez consideran que ver vídeos curtos en catalán contribúe a mellorar os seus coñecementos lingüísticos, especialmente no vocabulario e nas expresións. A investigación tamén reclama máis apoio á creación de contidos audiovisuais en catalán nas redes sociais.
Fonte: Diari de la Llengua
Unha nova certificación permitirá acreditar os coñecementos de linguaxe administrativa en catalán
O Goberno de Cataluña iniciou unha consulta pública para regular un novo certificado de coñecementos de linguaxe administrativa en catalán. A futura acreditación permitirá recoñecer as competencias para redactar documentos administrativos claros e precisos e poderá valorarse nos procesos de acceso ao emprego público.
Fonte: Generalitat de Catalunya
Barcelona acolle un encontro para actualizar a Declaración Universal dos Dereitos Lingüísticos
A primeira reunión de especialistas internacionais para actualizar a Declaración Universal dos Dereitos Lingüísticos celebrouse en Barcelona, trinta anos despois da súa proclamación. O proceso busca adaptar a protección dos dereitos lingüísticos aos novos retos do século XXI, como a dixitalización, a intelixencia artificial, as migracións e os desprazamentos forzados. O novo texto, previsto para 2027, pretende chegar posteriormente á ONU e á Unesco como referencia internacional para a defensa da diversidade lingüística.
Fonte: Diari de la Llengua
A Associació de Mitjans d’Informació i Comunicació convoca novas edicións dos concursos para impulsar proxectos en catalán entre a mocidade
A AMIC puxo en marcha novas edicións dos certames AMIC-Directes e AMIC-Ficcions, dirixidos a mozos e mozas de 14 a 18 anos para impulsar a creación audiovisual e literaria en catalán. O primeiro anima a producir directos e videopódcasts en Twitch ou YouTube, mentres que o segundo propón crear unha historia propia en tres capítulos. As iniciativas buscan fomentar a creatividade da mocidade e ampliar o uso do catalán nos novos formatos dixitais.
Fonte: Diari de la Llengua
A canle televisiva La 2 Cat emitirase integramente en catalán
O Goberno de Cataluña aprobou a reserva dun espazo na TDT para que RTVE poida emitir La 2 Cat, unha canle integramente en catalán. A reorganización busca reforzar a presenza desta lingua no espazo audiovisual público e impulsar a modernización tecnolóxica da televisión.
Fonte: 20minutos
Un convenio impulsará o uso do catalán no deporte escolar de Barcelona
Plataforma per la Llengua e o Consello do Deporte Escolar de Barcelona asinaron un convenio para promover o uso do catalán no deporte escolar. O acordo recolle, entre outros aspectos, a creación de contidos divulgativos sobre lingua e deporte e a incorporación da perspectiva lingüística nas formacións do CEEB.
Fonte: Plataforma per la Llengua
Segundo un estudo, o catalán sitúase como terceira lingua máis demandada nas ofertas de traballo de Cataluña
O catalán converteuse no terceiro idioma máis solicitado nas ofertas de emprego en Cataluña, presente como requisito explícito no 17,9 % das vacantes de 2025, segundo un estudo de Pimec e a UOC. A demanda medrou con forza desde 2019, cando só o 0,6 % das ofertas o esixían, un aumento que o estudo relaciona coa perda do seu carácter de coñecemento dado por suposto. Educación, atención ás persoas, hostalaría e restauración son algúns dos sectores nos que resulta máis difícil atopar profesionais cun bo nivel de catalán.
Fonte: Diari de la Llengua
Un informe analiza a presenza do catalán nos usos dixitais cotiáns
O catalán está presente no 42 % dos usos dixitais cotiáns, segundo o Informe Galàxia, que analiza 342 ferramentas web empregadas en diferentes ámbitos. A presenza é especialmente elevada en mapas, comunicación e produtividade, pero descende notablemente na intelixencia artificial, a creación de contidos e a saúde. O estudo advirte ademais de que plataformas como LinkedIn, Instagram ou Duolingo carecen de versión en catalán malia ofreceren outras linguas con comunidades de falantes semellantes.
Fonte: Diari de la Llengua
Apróbase un decreto para renovar a gobernanza do catalán no ámbito dixital
O Goberno de Cataluña aprobou un decreto para reforzar a gobernanza do catalán no ámbito dixital e adaptala ao impacto da intelixencia artificial e das tecnoloxías lingüísticas. A norma crea un consello asesor que reunirá Administración, sector tecnolóxico, universidades, investigación e sociedade civil, así como unha comisión interdepartamental encargada de coordinar as actuacións públicas. O obxectivo é impulsar e supervisar medidas que reforcen a presenza do catalán no ecosistema dixital.
Fonte: Generalitat de Catalunya
A Generalitat e a Unión de Federacións Deportivas de Cataluña estudan vías de colaboración para fomentar o uso do catalán no deporte
A Unión de Federacións Deportivas de Cataluña e o Departamento de Política Lingüística estudan vías para reforzar o uso do catalán no deporte, especialmente entre a infancia, a mocidade e as persoas chegadas de fóra. As entidades sinalan que só o 14 % dos adestramentos se desenvolven maioritariamente en catalán, malia que o 98,2 % das persoas participantes pode comunicarse nesta lingua. A proposta pretende situar os adestramentos e o papel das persoas adestradoras como ámbitos prioritarios para aumentar o uso efectivo do catalán.
Fonte: UFEC
Boletín
Subscríbase ao boletín
