O Termcat incorporou 168 novos termos ao catalán, publicados no DOGC, con especial presenza de ámbitos como o dereito, a empresa, a alimentación, as TIC, a mobilidade e a gandaría. Entre as novidades figuran voces vinculadas á intelixencia artificial, á cultura audiovisual, á socioloxía e ao urbanismo.

Fonte: Diari de la Llengua

O 54,7 % dos libros vendidos durante o último San Jordi foron en catalán, unha porcentaxe que sobe até o 71,1 % no caso da literatura infantil e xuvenil. En conxunto, a xornada pechouse con dous millóns de exemplares vendidos, 71.000 títulos diferentes e unha facturación de 26,7 millóns de euros.

Fonte: Diari de la Llengua

O Termcat e Arrels Fundació presentaron o Dicionari del sensellarisme, unha obra que reúne máis de 560 termos vinculados á realidade das persoas sen fogar co obxectivo de ofrecer unha terminoloxía precisa e libre de estigmas. O proxecto procura mellorar a comprensión social do fenómeno e facilitar o traballo coordinado entre administracións, profesionais e entidades sociais nun contexto de crecente complexidade habitacional. A publicación reivindica tamén o papel da lingua como ferramenta para nomear, visibilizar e abordar con rigor realidades sociais invisibilizadas.

Fonte: Diari de la Llengua

Sete entidades reeditarán o reto «Mantinc el català», unha iniciativa de 21 días para fomentar o hábito de manter o catalán en calquera situación e con todas as persoas, sen prexuízos sobre quen poida entendelo. Nesta edición, que se desenvolverá do 7 ao 28 de maio, a campaña pon o foco no ámbito sanitario, ao considerar que a atención na lingua dos pacientes reforza a confianza, os dereitos e a calidade humana do servizo.

Fonte: Diari de la Llengua

O Parlamento de Cataluña aprobou instar o Goberno a vincular axudas, convenios e promoción de eventos deportivos ao uso normalizado do catalán nas comunicacións oficiais e no desenvolvemento das actividades. A moción reclama tamén poñer en marcha un programa específico para fomentar a lingua no deporte, reforzar a súa presenza en clubs, federacións, medios, redes sociais e plataformas dixitais, e impulsar campañas institucionais que a presenten como elemento de convivencia e cohesión. Ademais, propón medidas para levar o catalán ás bancadas de animación, con apoio a materiais, obradoiros e cancións nos eventos deportivos.

Fonte: Plataforma per la Llengua

3Cat estreou «Català fàcil», unha iniciativa audiovisual pensada para reforzar a confianza das novas persoas falantes e favorecer o uso cotián do catalán. O proxecto inclúe 58 vídeos e 170 pezas breves para a plataforma pública, YouTube e redes sociais, con situacións habituais e recursos prácticos baseados nos niveis A1 e A2.

Fonte: Ara

O Goberno catalán abriu unha consulta pública previa do decreto que regulará a avaliación e certificación da lingua de signos catalá, co obxectivo de recoller achegas da cidadanía e do colectivo signante. O novo marco establecerá un sistema oficial de acreditación aliñado cos niveis europeos, regulará as probas, a validez dos certificados e os requisitos das persoas avaliadoras.

Fonte: Generalitat de Catalunya

Revolut incorpora o catalán aos seus caixeiros automáticos en Cataluña e faino ademais como opción predeterminada, segundo confirmou o Departamento de Política Lingüística. A entidade financeira prevé tamén lanzar a súa web e a súa aplicación nesta lingua durante o primeiro semestre de 2027, unha decisión atribuída en boa medida á presión social exercida por persoas usuarias e entidades.

Fonte: Diari de la Llengua

O Departamento de Política Lingüística abriu a segunda convocatoria de axudas para que entidades e concellos pequenos organicen cursos gratuítos de catalán para persoas adultas no curso 2026-2027. A liña, integrada no plan de impulso da lingua, busca garantir formación inicial en todo o territorio, especialmente onde a oferta é máis limitada. A nova edición amplía as entidades beneficiarias, permite formatos presenciais, semipresenciais e virtuais síncronos, e cubrirá o 100 % do profesorado e do material didáctico para cursos A1 e A2.

Fonte: Generalitat de Catalunya

O FC Barcelona e Òmnium Cultural reforzan o seu compromiso co catalán coa presentación dunha camiseta conxunta co gallo do 23 de abril baixo o lema «Una llengua ens agermana». A iniciativa destinará os beneficios a proxectos orientados a incrementar o uso social do idioma e insírese na alianza que ambas as entidades manteñen desde hai anos para promover a lingua como ferramenta de cohesión, identidade e integración. A campaña complétase co labor que o club xa desenvolve para favorecer a aprendizaxe e a normalización do catalán entre novas incorporacións e no conxunto da súa actividade.

Fonte: FC Barcelona