Un proxecto impulsado nas escolas infantís de Barcelona pretende garantir a presenza do catalán nunha etapa clave do desenvolvemento lingüístico da infancia. A iniciativa implica de maneira activa o persoal educativo, as familias e outros axentes vinculados aos centros. Un grupo de traballo encárgase de detectar boas prácticas, crear recursos e definir un plan lingüístico específico.

Fonte: Ajuntament de Barcelona

O Consello Comarcal do Bages puxo en marcha unha campaña para fomentar o uso habitual do catalán no comercio e garantir os dereitos lingüísticos da clientela. A iniciativa aposta por unha mensaxe directa e humorística para combater prexuízos e promover que se comece e se manteña a lingua propia nas interaccións cotiás. O proxecto inclúe accións formativas e de apoio a establecementos, con recursos gratuítos e acompañamento pedagóxico. A campaña combínase cunha ampla difusión pública e co respaldo de entidades especializadas en normalización lingüística.

Fonte: Diari de la Llengua

O Conselh Generau d’Aran e Lo Congrès Permanent de la Lenga Occitana impulsan a creación dun léxico dixital aranés con equivalencias en catalán, froito dun novo acordo de colaboración. O proxecto permitirá incorporar o aranés a ferramentas lingüísticas en liña e contará con entre 20.000 e 30.000 entradas. A iniciativa aposta pola tecnoloxía aplicada á normalización e á difusión da lingua. O léxico será de acceso público a través de distintas plataformas dixitais.

Fonte: Diari de la Llengua

Un estudo sobre o uso lingüístico nos clubs de baloncesto de Cataluña revela que o catalán é a lingua predominante nos adestramentos, cun papel clave das persoas adestradoras como modelo de referencia. De feito, a investigación amosa que o uso do catalán medra cando estas se dirixen directamente ás xogadoras e aos xogadores nesta lingua, aínda que varía segundo o territorio e o tamaño dos municipios.

Fonte: Diari de la Llengua

A Generalitat de Cataluña presentou os resultados dunha nova liña de subvencións para ampliar os cursos de catalán destinados á poboación adulta en concellos pequenos e entidades sociais. A iniciativa permite ofrecer formación gratuíta e flexible en territorios con pouca oferta previa, con especial atención á acollida lingüística das persoas chegadas de fóra. O programa impulsa centos de cursos e milleiros de prazas en todo o país co obxectivo de garantir un acceso máis equitativo á aprendizaxe da lingua.

Fonte: Generalitat de Catalunya

A Generalitat de Cataluña convocou por primeira vez probas oficiais para acreditar o nivel A1 de catalán, dirixidas a persoas sen coñecementos previos da lingua. A medida responde ao aumento da demanda formativa e reforza as políticas de acollida lingüística. Esta certificación deseñouse conforme aos estándares europeos e conta xa con programa, materiais e exame propios.

Fonte: Diari de la Llengua

A Viquipèdia celebra o 25 aniversario cunha edición en catalán especialmente salientable polo seu volume e calidade. Esta versión sitúase entre as vinte con máis artigos e destaca por ser a única que completa os dez mil contidos considerados esenciais. Creada pouco despois da inglesa, converteuse nun referente entre linguas de dimensión semellante. O proxecto apoia o seu éxito nunha ampla comunidade editora activa ao longo do tempo.

Fonte: Diari de la Llengua

A revista infantil El Tatano fai vinte anos e consolídase como unha publicación de referencia en catalán para a infancia que inicia a lectura. Nacida como suplemento de Cavall Fort, transformouse nunha revista mensual independente, cun proxecto propio e unha clara aposta pola calidade. O aniversario acompáñase dunha renovación de contidos e dunha exposición itinerante polas bibliotecas.

Fonte: Diari de la Llengua

O Departamento de Política Lingüística logrou duplicar en 2025 o número de marcas téxtiles que incorporan o catalán na etiquetaxe, ata acadar que case dous terzos das firmas máis coñecidas cumpran xa a normativa vixente. A iniciativa céntrase tanto en convencer as marcas que aínda non adoptaron a lingua propia nos seus produtos como en avanzar cara á súa presenza tamén nos espazos de venda dixital. O obxectivo é consolidar o uso normalizado do catalán no sector da moda, tanto na información ao consumo como na relación en liña coa clientela.

Fonte: El Món

O Concello de Barcelona puxo en marcha unha nova convocatoria de subvencións para apoiar iniciativas orientadas á promoción do catalán na cidade. As axudas estrutúranse en dúas modalidades, unha centrada en crear espazos de lecer ou formación para practicar a lingua e outra dedicada á produción de contidos dixitais innovadores en catalán.

Fonte: Diari de la Llengua