A campaña «La paraula de l’any», impulsada polo Observatorio de Neoloxía da Universidade Pompeu Fabra (UPF), o Instituto de Estudos Cataláns (IEC), o Termcat e 3Cat, convida a escoller o neoloxismo máis destacado de 2025 entre dez opcións que abranguen ámbitos como a saúde, a tecnoloxía, a identidade ou o clima. A votación, aberta ata o 16 de decembro, permitirá seleccionar a palabra que o IEC estudará con especial atención para a súa posible incorporación normativa.

Fonte: Diari de la Llengua

A IA de Meta, integrada en WhatsApp, Facebook e Instagram, xa pode comunicarse en catalán. Este avance permítelles ás persoas usuarias manter conversas, traducir textos ou realizar consultas directamente en catalán. Meta atribúe a ausencia inicial deste idioma a limitacións do lanzamento europeo e asegura estar a perfeccionar o sistema, que incorpora correctores e mecanismos de mellora continua.

Fonte: Diari de la Llengua

A Sección Filolóxica do IEC incorporou 117 voces novas e realizou 258 modificacións no Diccionari de la llengua catalana, nun total de 375 novidades que amplían o estándar e reforzan a representación territorial da lingua. Entre os termos engadidos figuran préstamos internacionais, vocabulario gastronómico e variantes dialectais, mentres que as actualizacións perfeccionan definicións e usos en ámbitos como a tecnoloxía, as locucións coloquiais ou a denominación de bebidas. A obra normativa continúa así o proceso de revisión iniciado tras a súa segunda edición de 2007, coas actualizacións dispoñibles de inmediato na versión en liña.

Fonte: Diari de la Llengua

A Enquisa de usos lingüísticas de 2023 confirma que Cataluña presenta realidades sociolingüísticas moi diversas, condicionadas por dinámicas demográficas propias de cada zona. A maioría dos territorios manteñen niveis de coñecemento e uso do catalán por riba da media, mentres que o ámbito metropolitano de Barcelona fica por debaixo debido á forte diversidade de procedencias. O conxunto dos datos mostra que o aumento de novos falantes non compensa o impacto das chegadas e provoca unha perda porcentual do uso do catalán.

Fonte: Generalitat de Catalunya

A Enquisa de Usos Lingüísticos de 2023 mostra un forte cambio demográfico no Val d’Aran pola chegada de nova poboación, mais tamén unha notable estabilidade no coñecemento e o uso do aranés. A maioría das persoas nadas na zona manteno como lingua inicial, habitual e de identificación, e a transmisión interxeracional continúa sólida. Porén, o uso social segue limitado en ámbitos como o comercio, a sanidade e as administracións non locais. As institucións aranesas e catalás propoñen facilitar a aprendizaxe para a poboación chegada recentemente e reforzar a presenza do idioma entre a mocidade e nos sectores profesionais para garantir o seu futuro.

Fonte: Generalitat de Catalunya

O Departamento de Política Lingüística concedeu as Beques Propulsió 2025, ás que se presentaron 355 propostas e das que resultaron seleccionados 40 proxectos de creación de contidos en catalán. A iniciativa, que duplicou o número de axudas respecto da primeira edición, confirma a vitalidade dun sector esencial para fortalecer a lingua no ámbito dixital.

Fonte: Generalitat de Catalunya

O salón SAGA presentou a súa cuarta edición como un grande escaparate do videoxogo en catalán, con máis espazo expositivo, novas competicións e actividades dirixidas a públicos diversos. A organización salientou o avance da industria, que xa incorpora o catalán na maioría dos títulos creados en Cataluña, e apuntou á vontade de reforzar a presenza da lingua nun sector tradicionalmente pouco multilingüe.

Fonte: Generalitat de Catalunya

O Concello de Lleida consolidou o seu compromiso co catalán ao adherirse ao Pacto Nacional pola Lingua, nun acto no que o alcalde salientou o labor municipal para facer da lingua un recurso accesible e presente na vida urbana. Ademais, anunciou que o Concello creará en 2026 unha unidade específica de política lingüística, destinada a coordinar accións de acollida, formación e asesoramento.

Fonte: Ajuntament de Lleida

O Termcat e o Departamento de Saúde puxeron en marcha unha campaña para favorecer o uso do catalán nos espazos sanitarios mediante a difusión de carteis e vídeos que recollen vocabulario básico do corpo humano, do material médico e do equipamento clínico. Estes recursos, destinados a profesionais e pacientes, repartiranse en centros sanitarios e tamén estarán dispoñibles como infografías interactivas e vídeos en liña. A iniciativa compleméntase co acceso ao dicionario Terminologia de salut bàsica, que ofrece definicións e equivalentes noutras linguas, e integrarase nos portais especializados para ampliar a difusión entre o persoal sanitario.

Fonte: Termcat

O Consello Social da Lingua de Signos Catalá (LSC) celebrou unha nova sesión na que se avaliaron os avances do último ano e se presentaron as prioridades para 2026, cunha clara aposta por fortalecer a presenza e o recoñecemento social da LSC. Para o vindeiro ano prevese abrir novos espazos formativos, actualizar o vocabulario básico e avanzar cara á certificación oficial desta lingua.

Fonte: Generalitat de Catalunya