Cataluña
A Base de Nomes Xeográficos de Cataluña supera os 400.000 rexistros que mostran a riqueza lingüística do catalán
A Base de Nomes Xeográficos do Instituto Cartográfico e Xeolóxico de Cataluña superou os 400.000 rexistros, consolidándose como un amplo inventario da toponimia catalá. A ferramenta permite preservar a diversidade lingüística e histórica do territorio, ademais de facilitar aplicacións prácticas como a cartografía, a xestión de emerxencias ou a planificación territorial.
Fonte: Diari de la Llengua
Un total de 500.000 novos dispositivos configurados en catalán sumase á campaña Configura.cat
A campaña Configura.cat conseguiu sumar 500.000 novos dispositivos configurados en catalán co obxectivo de aumentar a presenza dixital da lingua propia. A iniciativa, impulsada por varias entidades, busca que persoas usuarias e organizacións fagan visible a súa preferencia lingüística ante as plataformas tecnolóxicas e favorezan a incorporación do catalán en servizos dixitais.
Fonte: Diari de la Llengua
Ponse en marcha en Cadaqués unha campaña para dar a coñecer o catalán entre as persoas visitantes
O Concello de Cadaqués puxo en marcha unha campaña para achegar o catalán ás persoas visitantes mediante carteis e folletos con expresións básicas traducidas a varias linguas. A iniciativa, que incorpora gravacións de pronunciación a través dun código QR, busca divulgar a realidade lingüística e cultural do municipio desde unha perspectiva de acollida e descubrimento.
Fonte: Diari de la Llengua
A Generalitat de Cataluña consolida os seus programas formativos de catalán dirixidos aos profesionais do sistema sanitario
O Departamento de Saúde de Cataluña reforza a formación en catalán do persoal sanitario mediante os programas «Prescriu-te el català» e «T’acollim», que combinan cursos en liña, certificación oficial e contidos de acollida profesional. A iniciativa busca mellorar a comunicación asistencial, garantir os dereitos lingüísticos da cidadanía e promover boas prácticas nos centros sanitarios.
Fonte: Generalitat de Catalunya
Preséntase o InformeCAT 2026, que sinala que só unha quinta parte da poboación se dirixe en catalán a persoas descoñecidas
O InformeCAT 2026 advirte de que o hábito de abandonar o catalán nas interaccións con persoas descoñecidas dificulta a integración lingüística e debilita o seu papel como lingua de cohesión social. Malia este retroceso, o estudo salienta que o catalán conserva un elevado prestixio social, gaña presenza no ámbito dixital e continúa a rexistrar avances institucionais que poden contribuír a fortalecer o seu uso.
Fonte: Diari de la Llengua
Convócase a quinta edición da incubadora de series en catalán Serielizados Kick
Serielizados Kick abriu a convocatoria da súa quinta edición, coa que seleccionará dez proxectos inéditos de series, webseries ou miniseries de ficción en catalán. Cada proposta recibirá apoio económico, formación especializada e unha residencia creativa, antes de se presentar ante profesionais do sector nun foro final que busca facilitar o seu desenvolvemento e reforzar a creación audiovisual en lingua catalá.
Fonte: Audiovisual 451
Un estudo constata unha forte interferencia do inglés e do castelán no catalán empregado nas actividades dos ximnasios
O Instituto de Estudos Cataláns advirte, tras analizar vídeos de monitorado de ximnasio, dunha forte interferencia do castelán e do inglés no catalán empregado nas clases. O informe sinala carencias fonéticas, morfolóxicas, sintácticas e léxicas, ademais dun uso insuficiente da terminoloxía deportiva propia, polo que reclama maior coidado do rexistro profesional e máis conciencia lingüística no sector.
Fonte: Diari de la Llengua
A Generalitat de Cataluña e 3Cat poñen en marcha un proxecto para impulsar a autoaprendizaxe do catalán en diferentes sectores
A Generalitat prepara novos materiais de autoaprendizaxe de catalán dirixidos a colectivos profesionais, entre eles o sector do taxi, co propósito de facilitar a adquisición da lingua. Ademais, impulsa unha reforma da formación e da acreditación lingüística para persoas adultas, reforza a oferta de cursos e adapta os itinerarios ás necesidades laborais, en paralelo á futura lei de transporte, que prevé esixir competencias en catalán para garantir os dereitos lingüísticos da cidadanía.
Fonte: El Mon
A Generalitat de Cataluña lanza unha convocatoria de axudas para o fomento das linguas no ámbito universitario
A Generalitat abriu a convocatoria Interlingua, destinada a apoiar nas universidades catalás actuacións de fomento e uso do catalán, do aranés, da lingua de signos catalá e doutras linguas. As axudas contan cun orzamento de 1,66 millóns de euros, 200.000 máis ca na edición anterior. A convocatoria financiará accións de formación, acreditación, acollida lingüística e cultural, así como outras iniciativas universitarias vinculadas ao multilingüismo.
Fonte: Generalitat de Catalunya
A Universidade Pompeu Fabra lidera un estudo que constata a existencia de patróns comúns nas linguas para aforrar palabras
Un estudo internacional liderado pola UPF conclúe que preto de 2000 linguas comparten patróns para reutilizar palabras ou partes delas sen comprometer a claridade comunicativa. A investigación, publicada en Nature Human Behaviour, analizou case 2000 idiomas de 193 familias lingüísticas a partir da base de datos Lexibank. O traballo mostra que as linguas tenden a aforrar léxico cando o contexto evita a ambigüidade, mais crean formas diferenciadas cando existe risco de confusión.
Fonte: Diari de la Llengua
Boletín
Subscríbase ao boletín
