Cataluña
Amplíase o catálogo de xogos en catalán no portal Totjoc
O portal Totjoc ampliou polo Nadal o seu buscador de xogos e xoguetes en catalán, até reunir 1530 produtos e preto de 600 establecementos onde adquirilos, co obxectivo de normalizar o lecer nesta lingua. A iniciativa reforzouse con recomendacións audiovisuais e titoriais difundidos a través de YouTube, coa colaboración do comercio especializado. En paralelo, o presentouse un dicionario específico de xogos de mesa e de rol, integrado na colección de recursos en liña do Termcat, concibido como ferramenta aberta e ampliable para consolidar o vocabulario deste ámbito en catalán.
Fonte: Diari de la Llengua
Preséntase un estudo sobre o abandono e a continuidade dos cursos de catalán
Un estudo impulsado pola Universidade de Barcelona e diversas institucións públicas analizou, con datos de 2010 a 2019, as traxectorias do alumnado dos cursos presenciais de catalán do Consorcio para a Normalización Lingüística (CPNL) para comprender os factores de continuidade e abandono. A investigación amosa que a deserción se concentra sobre todo nos niveis iniciais e básicos, mentres que diminúe de forma notable nos tramos avanzados, e que os cursos trimestrais de 45 horas ofrecen un equilibrio axeitado entre permanencia e eficacia formativa.
Fonte: Universitat de Barcelona
A Generalitat de Cataluña pon en marcha unha iniciativa de acollida lingüística
O Departamento de Política Lingüística, en colaboración co CPNL, puxo en marcha «Benvinguts a Catalunya, benvinguts al català», unha acción de acollida que informa a poboación acabada de chegar a Cataluña sobre a relevancia de aprender a lingua. O programa destaca o catalán como ferramenta de cohesión social e de participación e ofrece materiais de benvida que xa se distribúen en 21 concellos. A iniciativa inclúe un código QR que dá entrada a un portal multilingüe con buscador de cursos e grupos de conversa, con máis de 400 puntos formativos co obxectivo de favorecer a integración social, educativa e laboral e de reforzar a igualdade de oportunidades.
Fonte: Generalitat de Catalunya
Unha xornada analiza a situación do catalán na empresa
A Fundación Vincle organizou a unha xornada na que se discutiron os retos e oportunidades para mellorar o uso do catalán no ámbito empresarial, ante a preocupación polo retroceso desta lingua. Neste evento fíxose fincapé na necesidade de integrar o uso do catalán na responsabilidade social corporativa, ao igual que se fai con outros temas como o medio natural.
Fonte: Diari de la Llengua
A Generalitat de Cataluña aproba unha axuda para financiar o Observatorio da Calidade Lingüística
O Goberno aprobou unha axuda de 2 millóns de euros para financiar o Observatorio da Calidade Lingüística do Instituto de Estudos Cataláns, en cumprimento do Pacto Nacional pola Lingua. Este proxecto, que se centrará na calidade do catalán en diferentes ámbitos (administración, xustiza, educación, saúde etc.) durante o período 2025-2028, xerará datos para establecer accións políticas orientadas á mellora da lingua.
Fonte: Generalitat de Catalunya
A Universidade Pompeu Fabra incrementa nun 56 % o número de inscricións nos cursos de catalán
A Universidade Pompeu Fabra rexistrou un forte aumento na aprendizaxe de catalán, cun incremento global do 56 % nas matrículas durante o primeiro trimestre do curso. Destaca especialmente o curso en liña para persoas principiantes, que multiplicou a súa demanda e permite iniciar o estudo da lingua antes de chegar a Cataluña. Tamén medraron con forza os programas presenciais de acollida lingüística e os cursos dirixidos a persoal docente e investigador.
Fonte: Diari de la Llengua
O Concello de Barberà del Vallès reforza o seu compromiso co catalán a través dunha nova campaña
O Concello de Barberà del Vallès reforza o seu compromiso coa lingua catalá coa campaña «A Barberà, parlem-nos en català», destinada a promover o seu uso cotián en todos os espazos de convivencia do municipio. A iniciativa fai visible a centralidade do catalán nos servizos públicos e na atención á veciñanza. Desde o consistorio destácase o valor da lingua como eixo de identidade local e ferramenta de cohesión social nun contexto de diversidade.
O Diario Oficial da Generalitat de Cataluña publica 76 novos termos cataláns
O DOGC deu conta da aprobación de 76 novos termos en catalán fixados polo Termcat no segundo cuadrimestre de 2025. As incorporacións céntranse sobre todo en ámbitos como as ciencias da terra, a comunicación accesible, as bebidas e os servizos sociais. Tamén se normalizou léxico vencellado ao senfogarismo, á corrupción política, ao ensino e a disciplinas científicas e sanitarias. O proceso responde á detección de novas necesidades terminolóxicas e á colaboración con entidades especializadas.
Fonte: Diari de la Llengua
Netflix incorpora ao seu catálogo 83 novos audios en catalán
A plataforma Netflix duplicou a súa oferta de filmes dobrados ao catalán grazas á incorporación de 83 novos audios producidos maioritariamente por 3Cat, que se engaden aos xa existentes ao abeiro do convenio coa Generalitat. A medida incorpora títulos moi populares de distintos xéneros e reforza a presenza do catalán no ámbito audiovisual, nun contexto no que tamén outras plataformas como HBO Max ou Filmin aumentan os seus contidos. Esta estratexia procura ampliar de maneira sostida a dispoñibilidade e o consumo de produtos audiovisuais en catalán mediante convenios, subvencións e programas específicos.
Fonte: Generalitat de Catalunya
O teléfono de emerxencias CAT112 estrea unha canle cun sistema de videoconferencia en lingua de signos catalá
O servizo de emerxencias CAT112 lanzou unha nova canle de comunicación en lingua de signos catalá para persoas con discapacidade auditiva, dispoñible as 24 horas do día. Este sistema, accesible a través da páxina web do 112 e das apps de Fesoca e Svisual, permitirá realizar videochamadas coas que se poderá transmitir a información ao servizo de emerxencias para a súa xestión.
Fonte: Gente
Boletín
Subscríbase ao boletín
