O Concello de Barcelona puxo en marcha unha nova convocatoria de subvencións para apoiar iniciativas orientadas á promoción do catalán na cidade. As axudas estrutúranse en dúas modalidades, unha centrada en crear espazos de lecer ou formación para practicar a lingua e outra dedicada á produción de contidos dixitais innovadores en catalán.

Fonte: Diari de la Llengua

A Generalitat de Cataluña abriu unha nova convocatoria de axudas dirixida a empresas e profesionais para reforzar o uso real do catalán no ámbito empresarial. A iniciativa aposta por impulsar plans lingüísticos de carácter estratéxico que integren a lingua no funcionamento interno, na oferta de produtos e servizos e na atención á clientela. As subvencións buscan consolidar un uso habitual e sostido do catalán, especialmente nas interaccións orais e escritas, tanto presenciais como dixitais.

Fonte: El Triangle

A plataforma Picardemans.cat xurdiu para impulsar o uso espontáneo do catalán nos patios escolares mediante xogos tradicionais de palmas e cancións populares adaptadas á lingua propia. A iniciativa responde á perda de presenza do catalán entre a infancia e ofrece recursos audiovisuais con versións catalás, incluídas variedades dialectais, de temas que se cantaban habitualmente noutras linguas. A experiencia en centros educativos amosa que o enfoque lúdico favorece unha incorporación natural do idioma ao xogo diario e estende o seu uso tamén ao ámbito familiar.

Fonte: El Punt Avui

Un estudo revela que arredor do 60 % da poboación catalá apenas ten en conta o catalán na configuración dos seus dispositivos dixitais, malia existir opcións técnicas para empregar esta lingua. A investigación amosa que a mocidade é o grupo menos sensibilizado, mentres que as persoas maiores e con estudos universitarios presentan unha maior conciencia lingüística. O informe tamén sinala unha clara contradición entre o apoio social a esixir contidos en catalán e a escasa implicación individual á hora de escollelo nos aparellos, unha situación que limita a súa presenza no ámbito dixital.

Fonte: Diari de la Llengua

A Generalitat pechou con éxito a primeira experiencia de conversas de reforzo en catalán, un servizo telemático de práctica oral dirixido a profesionais da saúde. A iniciativa, complementaria á formación regrada, facilitou o uso efectivo da lingua no exercicio sanitario mediante sesións individuais flexibles e adaptadas á realidade laboral. As valoracións salientan unha mellora na fluidez e na seguridade comunicativa, así como unha maior garantía dos dereitos lingüísticos das persoas atendidas. Tras os resultados obtidos, prevese ampliar o programa a outros perfís e cursos ao longo de 2026.

Fonte: Generalitat de Catalunya

O Departamento de Política Lingüística reforzou nos anos 2024 e 2025 a tradución ao catalán de obras de ensaio e non ficción para ampliar a presenza da lingua en diferentes ámbitos do coñecemento. No conxunto dos dous exercicios apoiouse a versión en catalán de máis de 350 títulos procedentes de numerosas linguas e editoriais, cun claro predominio de disciplinas como historia, ciencias sociais, filosofía, divulgación científica e pensamento contemporáneo. Esta liña de axudas consolidou un catálogo diverso que contribúe a normalizar o uso do catalán máis alá da creación literaria e a fortalecer a súa proxección académica e divulgativa.

Fonte: Generalitat de Catalunya

O portal Totjoc ampliou polo Nadal o seu buscador de xogos e xoguetes en catalán, até reunir 1530 produtos e preto de 600 establecementos onde adquirilos, co obxectivo de normalizar o lecer nesta lingua. A iniciativa reforzouse con recomendacións audiovisuais e titoriais difundidos a través de YouTube, coa colaboración do comercio especializado. En paralelo, o presentouse un dicionario específico de xogos de mesa e de rol, integrado na colección de recursos en liña do Termcat, concibido como ferramenta aberta e ampliable para consolidar o vocabulario deste ámbito en catalán.

Fonte: Diari de la Llengua

Un estudo impulsado pola Universidade de Barcelona e diversas institucións públicas analizou, con datos de 2010 a 2019, as traxectorias do alumnado dos cursos presenciais de catalán do Consorcio para a Normalización Lingüística (CPNL) para comprender os factores de continuidade e abandono. A investigación amosa que a deserción se concentra sobre todo nos niveis iniciais e básicos, mentres que diminúe de forma notable nos tramos avanzados, e que os cursos trimestrais de 45 horas ofrecen un equilibrio axeitado entre permanencia e eficacia formativa.

Fonte: Universitat de Barcelona

O Departamento de Política Lingüística, en colaboración co CPNL, puxo en marcha «Benvinguts a Catalunya, benvinguts al català», unha acción de acollida que informa a poboación acabada de chegar a Cataluña sobre a relevancia de aprender a lingua. O programa destaca o catalán como ferramenta de cohesión social e de participación e ofrece materiais de benvida que xa se distribúen en 21 concellos. A iniciativa inclúe un código QR que dá entrada a un portal multilingüe con buscador de cursos e grupos de conversa, con máis de 400 puntos formativos co obxectivo de favorecer a integración social, educativa e laboral e de reforzar a igualdade de oportunidades.

Fonte: Generalitat de Catalunya

A Fundación Vincle organizou a unha xornada na que se discutiron os retos e oportunidades para mellorar o uso do catalán no ámbito empresarial, ante a preocupación polo retroceso desta lingua. Neste evento fíxose fincapé na necesidade de integrar o uso do catalán na responsabilidade social corporativa, ao igual que se fai con outros temas como o medio natural.

Fonte: Diari de la Llengua