Cataluña
O Departamento de Política Lingüística da Generalitat de Cataluña fai balance do seu primeiro ano de traballo
O Departamento de Política Lingüística concluíu a primeira fase do Pacto Nacional pola Lingua, co apoio de axentes sociais e políticos para reforzar o uso do catalán como lingua común e sostible. Ao longo do ano, puxéronse en marcha actuacións transversais en diversos ámbitos (ensino, sanidade, xustiza, administración local e internacional), entre as que destaca o incremento de cursos para persoas adultas, a mellora da formación profesional e o impulso da lingua catalá e aranesa, así como da lingua de signos catalá.
Fonte: Generalitat de Catalunya
Os comercios de Xirona recibirán clases de catalán nos propios establecementos
O Concello de Xirona e o CPNL impulsan clases de catalán directamente nos comercios para facilitar que o persoal poida atender a clientela nesta lingua. A formación, de 15 sesións de media hora, adáptase a cada participante e ao seu sector profesional, e impartirase no propio establecemento durante o horario laboral. Actualmente participan catro negocios e agárdase sumar outros dous no outono, co obxectivo de mellorar a competencia oral básica do persoal que non falan catalá ou só o usa de forma moi limitada.
Fonte: El Món
O proxecto Xerrem Junts recibirá financiamento da Generalitat de Cataluña para expandir o seu modelo de grupos de conversa en catalán
O proxecto Xerrem Junts contará co apoio do Departamento de Política Lingüística para crear uns sesenta novos grupos de conversa e chegar a 2400 participantes. A iniciativa, activa desde 2007, ofrece espazos non formais onde persoas que aprenden catalán practican oralmente coa axuda de voluntariado. Actualmente existen uns 230 grupos en ámbitos diversos, presenciais e en liña, cunha metodoloxía adaptada a distintos niveis de coñecemento da lingua.
Fonte: Generalitat de Catalunya
Finaliza a primeira tempada de «En Ruta», un proxecto audiovisual de divulgación científica en catalán
Rematou a primeira tempada de En Ruta, un proxecto audiovisual de divulgación científica en catalán dirixido á mocidade e emitido en plataformas dixitais como YouTube, Instagram e TikTok. A serie percorreu diversas zonas de Cataluña para abordar temas científicos e ambientais e promover así o uso da lingua nun ámbito atractivo para as novas xeracións. A iniciativa enmárcase nas accións de Plataforma per la Llengua para reforzar a presenza do catalán nos espazos dixitais máis populares entre a xente nova.
Fonte: Plataforma per la Llengua
As radios privadas incumpren as cotas de música en catalán, que apenas alcanza o 12,4 %
Plataforma per la Llengua denuncia que a maioría das emisoras privadas que operan en Cataluña continúan sen cumprir a cota legal do 25 % de música en catalán, a pesar do fin das exencións aprobado polo Consello do Audiovisual de Cataluña (CAC). Segundo un estudo da entidade, o tempo de emisión nesta lingua apenas supera o 7 % e moitas cancións difúndense fóra das horas de máxima audiencia.
Fonte: Diari per la Llengua
O Voluntariado pola Lingua mantén a súa actividade durante o verán en Cataluña grazas á súa flexibilidade
Este programa ofrece durante o verán un espazo flexible para practicar catalán en contornas informais e culturais. As parellas lingüísticas poden atoparse presencialmente ou por videoconferencia, segundo as súas necesidades. O obxectivo é reforzar a fluidez e a confianza no idioma sen interrupcións estacionais.
Fonte: Generalitat de Catalunya
O Diario Oficial da Generalitat de Cataluña publica preto dun cento de novos termos cataláns normalizados
O Termcat acaba de incorporar 92 novos termos cataláns ao seu repertorio normativo, que abranguen ámbitos como as TIC, a zooloxía, a economía e a comunicación. Destacan os conceptos ligados á intelixencia artificial, os nomes das especies de morcegos e novas formas na linguaxe inclusiva e clara.
Fonte: Diari de la Llengua
Increméntase o alumnado dos cursos de catalán da Universidade Pompeu Fabra
O número de persoas que deciden estudar catalán na Universidade Pompeu Fabra medrou un 15 % no curso 2024-2025. Este interese ascendente, que se mantén desde hai cinco anos, reflicte o éxito das políticas de acollida lingüística e cultural da universidade, así como o compromiso por ampliar a formación en catalán para toda a comunidade académica.
Fonte: Diari de la Llengua
Increméntase o persoal do Departamento de Política Lingüística da Generalitat de Cataluña
O Goberno de Cataluña aprobou o reforzo do Departamento de Política Lingüística cun total de 41 novas prazas para tres anos. Este incremento estrutural e temporal servirá para executar as medidas do Pacto Nacional pola Lingua e para potenciar o uso do catalán nas tecnoloxías da lingua e no ámbito dixital, así como para ampliar os servizos das unidades actuais.
Fonte: Generalitat de Catalunya
O Concello de Barcelona contará cun espazo virtual para denunciar vulneracións dos dereitos lingüísticos
O Pleno do Concello de Barcelona acordou crear caixa do correo virtual polo catalán, na que a veciñanza poderá denunciar vulneracións dos seus dereitos lingüísticos, e ampliar a oferta de cursos e prazas para aprender esta lingua.
Fonte: El Nacional
Boletín
Subscríbase ao boletín
