Ante a redución do apoio institucional ás linguas propias de Aragón por parte do actual goberno autonómico, o executivo estatal aprobou axudas para fomentar o catalán e o aragonés. Ao tempo, a Universidade de Zaragoza e a Academia Aragonesa da Lingua asinaron un convenio para promover, normalizar e protexer estes idiomas mediante accións culturais, educativas e tecnolóxicas.

Fonte: Diari de la Llengua

O Departamento de Política Lingüística abriu unha nova liña de bolsas para o curso 2025-2026, co obxectivo de captar novo talento e aumentar o número de profesionais titulados en filoloxía catalá e en estudos occitans.

Fonte: Generalitat de Catalunya

Co fin de incrementar a oferta total de prazas para aprender catalán, a Generalitat de Cataluña abriu unha nova liña de axudas dirixida a concellos pequenos, consellos comarcais e entidades sen ánimo de lucro para ofrecer cursos gratuítos de catalán para adultos nos niveis A1 e A2 para o curso 2025-2026.

Fonte: Generalitat de Catalunya

Despois de 22 anos de actividade, a Escola Catalá de Dobraxe anuncia o seu peche. A entidade foi pioneira na formación de actores e actrices de dobraxe en catalán e deixa tras de si unha xeración de profesionais que traballan no sector audiovisual. A falta de apoio institucional e a precariedade do sector contribúen á súa clausura.

Fonte: Diari de la Llengua

A 43ª edición da Semana do Libro en Catalán celebrarase nun novo emprazamento cunha programación de récord que inclúe 93 casetas, 312 expositores e 300 actividades. Promovida polo Departamento de Política Lingüística, a feira incorporará novos espazos dedicados á conversa, á lectura, ás familias e a outros ámbitos.

Fonte: Diari de la Llengua

Ao se faceren 15 anos da Lei 20/2010 do Cinema, a Plataforma pola Lingua alerta que, por falta de regulación e sancións, esta norma non se aplica, deixando o cinema en catalán nunha situación “de precariedade absoluta”. Aínda que a lei esixía inicialmente que o 50 % dos filmes comerciais se proxectasen en catalán (reducido ao 25 % en 2017), en ningún caso se atinxiron estes niveis.

Fonte: Diari de la Llengua

O Departemento de Política Lingüística de Cataluña habilitou o procedemento para que entidades, institucións e empresas se sumen ao Pacto Nacional pola Lingua, presentado o pasado 13 de maio. Trátase dun compromiso colectivo para garantir o futuro do catalán até 2030, promovendo accións en todos os ámbitos e sostendo a oficialidade plena do idioma dentro do marco do plurilingüismo e da diversidade que caracteriza a Cataluña de hoxe.

Fonte: Generalitat de Catalunya

O Instituto de Estatística de Cataluña (Idescat) publicou máis resultados da Enquisa de usos lingüísticos da poboación do ano 2023. Os novos datos permiten analizar como se inicia e mantén o uso das linguas nas conversas, as preferencias sobre que linguas se deberían falar no futuro e as opinións sobre a unidade do catalán. Por exemplo, grazas a esta análise, sábese que máis do 70 % da poboación adapta a súa lingua á do interlocutor, xa sexa cara ao catalán ou ao castelán.

Fonte: Generalitat de Catalunya

Galàxia é unha nova plataforma que reúne máis de 250 ferramentas dixitais dispoñibles en catalán, grazas á colaboración de Accent Obert e Softcatalà. A iniciativa busca facilitar o uso da lingua no ámbito tecnolóxico e achegar opcións prácticas ás persoas usuarias.

Fonte: Diari de la Llengua

O Departamento de Política Lingüística da Generalitat de Cataluña abriu por primeira vez unha liña de axudas para promocionar a subtitulación de longametraxes en catalán nas salas comerciais de cinema.

Fonte: Generalitat de Cataluña