Cataluña
Modifícase o proxecto de Lei de atención ao cliente para garantir os dereitos lingüísticos das persoas consumidoras
Os cambios na Lei de atención ao cliente buscan garantir que a cidadanía poida ser atendida en catalán. As empresas con máis de 250 persoas empregadas ou máis de 50 millóns de facturación deberán ofrecer servizo na lingua oficial que escolla o consumidor, e o persoal terá que recibir formación en catalán. A medida abrangue sectores como enerxía, banca, telecomunicacións ou transporte.
Fonte: Diari de la Llengua
As persoas que conduzan taxis e VTC en Cataluña deberán acreditar un nivel B1 de catalán
O Parlamento de Cataluña recibirá unha proposta de lei que obrigará as persoas condutoras de taxis e VTC a acreditar un nivel mínimo de catalán B1 no prazo de dous anos, incluíndo quen xa estea en activo. A iniciativa pretende reforzar os dereitos lingüísticos da clientela e podería marcar un precedente para outros sectores profesionais. As entidades promotoras seguen a reclamar que o requisito sexa un B2 e demandan recursos públicos para facilitar a aprendizaxe da lingua.
Fonte: Diari de la Llengua
Segundo unha enquisa, case nove de cada dez habitantes de Cataluña consideran que o catalán é unha fonte de oportunidades
Un estudo revela que case o 89 % da poboación de Cataluña considera que aprender catalán abre oportunidades laborais, culturais e persoais ás persoas de orixe migrante, o que consolida a idea de que é unha lingua de promoción social. A enquisa mostra tamén un amplo consenso transversal entre votantes de practicamente todas as formacións políticas, con maior adhesión entre a mocidade.
Fonte: Diari de la Llengua
O Tribunal Superior de Xustiza de Cataluña anula parte do decreto que blindaba o catalán como lingua vehicular nos centros educativos
O alto tribunal anulou varios artigos do decreto de 2024 sobre o réxime lingüístico educativo que establecían o catalán como lingua principal de ensino e administración, así como a obrigatoriedade de dominio do persoal docente e non docente, por non garantir a presenza mínima do castelán. A sentenza recalca que ambas linguas oficiais deben ter un uso equilibrado para asegurar a competencia plena do alumnado en catalán e castelán.
Fonte: Diari de la Llengua
A Universidade Autónoma de Barcelona publica unha nova versión do máis completo dicionario de frases feitas do catalán
A lingüista Maria Teresa Espinal publica a segunda versión en liña do Diccionari de sinònims de frases fetes, actualización da obra impresa que reúne miles de expresións lexicalizadas da lingua catalá. O recurso proporciona información gramatical e semántica de cada entrada, así como relacións entre expresións similares, o que o converte no máis completo do seu ámbito. A nova edición mellora máis da metade dos rexistros e amplía significativamente os conceptos recollidos. O dicionario está dispoñible en acceso aberto en formato electrónico.
Un estudo revela que o 15 % das tendas dos centros comerciais incumpre a normativa sobre os uso do catalán
Plataforma per la Llengua denuncia que máis do 15 % dos comercios nos centros comerciais de Cataluña incumpren a obriga de ofrecer a sinalización, como mínimo, en catalán. A entidade constata que moitas franquías non respectan a normativa e que as xerencias teñen escaso control sobre os alugueiros.
Fonte: El Nacional
A Generalitat de Cataluña convoca axudas para a incorporación do catalán a produtos tecnolóxicos
O Departamento de Política Lingüística amplía as subvencións para fomentar o uso do catalán en tecnoloxías dixitais, abríndoas a empresas e entidades sen ánimo de lucro que desenvolvan proxectos de produtos tecnolóxicos, aprendizaxe dixital ou tecnoloxías da lingua en catalán. Os proxectos poderán executarse entre 2025 e 2026, e as axudas cubrirán ata o 70 % do custo, con límite de 60 000 euros.
Fonte: Generalitat de Catalunya
A Generalitat de Cataluña convida os concellos a adherirse ao Pacto Nacional pola Lingua
O Goberno da Generalitat insta os concellos a sumarse ao Pacto Nacional pola Lingua a través do envío dunha moción modelo para aprobalo formalmente nos plenos municipais. Esta iniciativa busca que o catalán se integre en todas as políticas locais co obxectivo de asegurar a súa presenza en ámbitos educativo, cultural, deportivo e administrativo.
Fonte: Generalitat de Catalunya
O Concello de Lleida impulsará o catalán a través do deporte
A Concellería de Deportes de Lleida integra o catalán como eixe transversal nas súas actuacións, co obxectivo de consolidalo como instrumento de inclusión, educación e cohesión social. Entre as actividades previstas figura formación para profesionais, sensibilización da cidadanía e promoción do uso da lingua nas actividades deportivas de cara a normalizar a súa presenza nas instalacións deportivas e favorecer a súa práctica entre toda a poboación.
Fonte: Ajuntament de Lleida
A oferta de cursos de catalán alcanza un récord histórico
Xa está aberto o novo período de inscrición para 1700 cursos de catalán, que supoñen un aumento do 15 % nas prazas con respecto ao ano anterior e que alcanzan as 40 000. A oferta inclúe cursos presenciais e en liña, con prioridade para a modalidade presencial para os niveis iniciais e básicos.
Fonte: Generalitat de Catalunya
Boletín
Subscríbase ao boletín
