Cataluña
Posen en marcha en Barcelona unha proba piloto para impulsar o uso do catalán en espazos frecuentados pola mocidade
O Concello de Barcelona e o Instituto de Estudos Cataláns puxeron en marcha unha proba piloto en espazos de mocidade e clubs deportivos de Sants-Montjuïc para reverter a caída do uso social do catalán. O proxecto busca promover a lingua entre adolescentes a través de actividades de lecer e deporte, integrándoa nos contextos cotiáns da mocidade. A iniciativa, baseada no método IEC 360°, pretende avaliar os resultados e estender o modelo a outros distritos. Ademais, inclúe cláusulas lingüísticas en concursos públicos e unha campaña de comunicación que presenta o catalán como signo de identidade moderna e diversa.
Fonte: Diari de la Llengua
Condenan o Concello de Vic por esixir un nivel demasiado elevado de catalán para un posto de traballo
O Xulgado do Contencioso n.º 15 de Barcelona condena o Concello de Vic por esixir un nivel de catalán demasiado alto nun concurso para operario de cemiterio. A sentenza declara discriminatorio o requisito de nivel B2, polo que anulan as bases e establece que o mínimo esixible sexa A2, suficiente para conversas cotiás. O Concello deberá pagar 1000 euros de multa.
Fonte: 20minutos
Segundo unha enquisa, nove de cada dez habitantes de Cataluña móstranse favorables a que o persoal sanitario atenda en catalán e en castelán
Unha enquisa da Generalitat de Cataluña de 2025 revela que a maioría da poboación apoia a atención en catalán, castelán e aranés en sanidade, comercio e hostalaría, con porcentaxes que se manteñen entre o 70 e o 90 %. Ademais, un 89 % defende que se lles garanta ás persoas acabadas de chegar o acceso á aprendizaxe do catalán.
Fonte: 20minutos
O Concello de Barcelona presente a Casa da Creación Dixital en Catalán
A Casa da Creación Dixital en Catalán é un espazo destinado a impulsar contidos dixitais nesta lingua e fomentar o seu uso entre a xuventude. O proxecto ofrecerá formación, mecenado e incubación de novos talentos e contará cun orzamento para 2026 e 2027 que ascende a 3 millóns de euros.
Fonte: Diari de la Llengua
A Generalitat de Cataluña convoca axudas para a promoción da lingua de signos catalá
O Departamento de Política Lingüística convoca unha nova liña de subvencións para fomentar e difundir a lingua de signos catalá (LSC) cun orzamento ampliado de 75 000 € tras a primeira convocatoria de abril. Os apoios destínanse a actividades de uso, creación de contidos e divulgación da LSC, e están abertos a persoas, entidades sen ánimo de lucro e empresas.
Fonte: Generalitat de Catalunya
Optimot, o servizo de atención en temas de lingua catalá, alcanza as 100 000 consultas lingüísticas
O servizo de consultas lingüísticas Optimot alcanzou a consulta número 100 000 no seu servizo de atención personalizada o pasado 11 de setembro. Esta cifra súmase ás máis de 18,5 millóns de consultas anuais no buscador en liña e ás cada vez máis frecuentes a través das redes sociais.
Fonte: Generalitat de Catalunya
A Generalitat de Cataluña organiza obradoiros de sensibilización lingüística dirixidos ao ámbito deportivo
O Departamento de Política Lingüística organiza no último trimestre de 2025 un total de 33 obradoiros de sensibilización lingüística no marco do Plan de impulso do catalán no deporte. Dirixidos a monitoras/es, adestradoras/es e profesionais que traballan con infancia e mocidade, céntranse sobre todo en fútbol, baloncesto, excursionismo e actividades de ximnasio. As sesións, de 2,5 horas e con grupos reducidos, buscan concienciar estes referentes deportivos para que actúen como modelos lingüísticos e favorezan un uso natural do catalán nas actividades formais e informais.
Fonte: Generalitat de Catalunya
Segundo unha enquisa, case unha cuarta parte do persoal de bares e restaurantes de Barcelona non entende o catalán
Un informe sobre o sector da restauración en Barcelona revela que só o 52,4 % do persoal fala catalán e que un 24,2 % nin sequera o entende, cifras que empeoran respecto ao ano anterior. Ante estes datos, o Concello comprometeuse a reforzar a inspección e mellorar a aplicación da normativa lingüística para frear a regresión do catalán nos establecementos.
Fonte: Diari de la Llengua
A Coordinadora de Asociacións pola Lingua Catalá comeza unha campaña para chegar aos 300 grupos de conversa para practicar o catalán
A campaña busca chegar a 300 grupos Xerrem de conversa en catalán, como vía de reforzar o uso social da lingua e fomentar a cohesión. Actualmente existen arredor de 230 grupos de distintos niveis, polo que fai un chamamento a voluntariado, persoas colaboradoras... para acadar este obxectivo.
Fonte: Diari de la Llengua
A marca Aiwa ofrece manuais en lingua catalá para máis de 120 produtos
A empresa xaponesa AIWA ofrece xa manuais en catalán para máis de 120 produtos de son, froito dun compromiso adquirido no Mobile World Congress de 2024 coa Plataforma per la Llengua. Trátase dun avance decisivo para normalizar o idioma no sector tecnolóxico, aínda que tamén reclaman que a compañía inclúa o catalán na súa web e amplíe a súa presenza en todos os ámbitos.
Fonte: El Món
Boletín
Subscríbase ao boletín
